Byltyr kórshi Reseıdiń Omby qalasynda XXIV Eýrazııalyq ulttyq kıimderdiń sán baıqaýy ótip, oǵan Astananyń irgesindegi Qoıandy aýylynyń turǵyny, aıtýly qolóner sheberi Bulbulhan Serǵazyqyzy qatysyp, II orynnan kórinip, ulttyq sán úlgisiniń mereıin ústem etti. 2025 jyldyń qarashasynda uıymdastyrylǵan «Etno-Erato» atty eýrazııalyq ulttyq kıimder sán baıqaýynda 40 memleketten 300-ge jýyq úmitker jarysqa túsken. Osynshama qatysýshynyń arasynan oza shaýyp, ulttyq kıim úlgileriniń dızaıneri retinde aq kımeshek toptamasyn usynǵan Bulbulhan apaı júldeli oryn ıegeri atandy. Onyń eńbegin qazylar alqasynyń 19 múshesi biraýyzdan qoldap, joǵary baǵalady. О́zi bolsa, «qoldaý bildirgen barsha qazylar alqasyna alǵysym sheksiz» deıdi.
Bulbulhan Serǵazyqyzy – 58 jasta, elde jáne shetelderde ótken túrli qolóner baıqaýlarynyń jeńimpazy. Respýblıkalyq «Aq kımeshek – ult ajary» atty baıqaýda bas júldeni ıelense, Aqmola oblysynda ótken «Sándi sáýkele men kıeli kımeshek sheberi» baıqaýynda da bas júldege qol jetkizip, týǵan aýyly Qoıandynyń mereıin ústem etti.
30 jyldyq tájirıbesi bar qolóner sheberi ájelerdiń aq kımeshegi men basqa da ulttyq buıymdarǵa amanat dep qarap, ata-babadan jetken asyl murany nasıhattaýdan jalyqqan emes. Bulbulhan Serǵazyqyzy ónerin múmkindigi shekteýli jandarǵa jáne ósip kele jatqan jas urpaqqa úıretip, ulttyq qundylyqtardy dáriptep júr.
Alpys jasqa taıap qalsa da, ol «urpaqqa bererim áli de kóp» dep, izgilik jolyndaǵy eńbegin talmaı jalǵastyryp keledi.
