Abaıdyń ájesi Zerege eskertkish ornatyldy

Shyǵys jurty taǵy da bir eleýli is atqardy. El táýelsizdiginiń 25 jyldyǵyna oraı, qazaqtyń birtýar aqyny Abaıdyń ájesi Zerege arnalǵan eskertkish Jarma aýdanynyń Qalbataý aýylynda boı kóterdi. Asyl analarǵa degen qurmet, izgilik, iltıpat kórsetý jas urpaqtyń boıynda patrıotızmdi qalyptastyrý maqsatynda «Uly dalanyń uly analary» atty is shara aıasynda qolǵa alynǵan bolatyn. Igilikti bastamanyń uıytqysy bolǵan Jarma aýdanynyń ákimi Nurlan Sydyqov el analaryna degen qurmettiń eskerýsiz qalmaıtynyn aıtady. «Urpaq sabaqtastyǵyn jalǵastyrýshy ultty tárbıeler asyl jandarymyzǵa taǵzym etý qashanda paryzymyz», – deıdi ol. Torqaly toıǵa qatysqan Qunanbaı fılminde basty róldi somdaǵan Dosjan Joljaqsynov óz oıyn bylaı tarqatty: «Jumaq analardyń tabanynyń astynda. Alyp anadan týady deıdi halqymyz. Álemniń bar asyly – danyshpan ǵalym da, sóz bastaǵan sheshen de, el bastaǵan kósem de ananyń kókireginen nár alyp, tamyr jaıady. Kórkem óner salasynda eńbek etken adamdarǵa, aýdan jurtyshylyǵyna alǵysym sheksiz». Ádemi úılesim tapqan músinniń beınesin Ertis Tátıev pen onyń uly Erkebulan Ertisuly jasap shyqqan eken. Eskertkishte Zereniń aldynda bala Abaı beınelengen. Olardyń aıtýynsha, bul ıdeıa romannan alynǵan úzindige negizdelip jasalǵan. «Abaı joly» roman-epopeıasynda Abaı ájesi Zereniń tárbıesinde bolǵanyn, jastaıynan qıssa dastandardy estip, kókeıine toqyp óskenin bilemiz. Qoly altyn sheberlerdiń osyndaı týyndylary tarıhymyzdyń ashylmaǵan syrlaryn, aqtańdaq betterin aq paraqqa túsirýmen teń. Asyldyń synyǵy, tulpardyń tuıaǵy bolǵan ardaqty analarǵa qandaı qurmet kórsetse jarasymdy. Bul ıgilikti is ózge óńirlerde de jalǵasyn taýyp jatsa quba-qup. Aıman MUQYShEVA