Shartarapty shaıtanarbamen sharlaıdy

Jýyrda Sharbaqty aýdany ákimdiginiń ókilderi men aýyldastary velosıpedshi О́mirjan Oshanovty Qazaqstan-Qytaı baǵyty boıynsha velojoryqqa shyǵaryp saldy. Ol buǵan deıin Jeńistiń 70 jyldyǵyna oraı Pavlodardan bastalǵan 3800 shaqyrymdyq joldy velosıpedpen 22 kúnde júrip ótken-di. Máskeýge jetip, merekelik sherýge qatysty. Áýesqoı veloshabandozdy Kremldiń aldynda jerlesterimiz kútip alǵan edi. Árıne, velosıpedpen uzaq qashyqtyqqa, Máskeýge qaraı jolǵa shyqqanda kúnine 150 shaqyrymnan júrip otyrdym. Keıin 210 shaqyrymǵa deıin jetkizdim. Jańbyr jaýdy, aýa raıy qolaısyz boldy. Oral taýy mańynan ótkende qıynshylyqtar kezdesti. Bárin de jeńýge týra keldi, – deıdi О́mirjan Oshanov. Kelesi bir rekordy – byltyr Ertis ózeniniń 70 shaqyrym aralyǵyn 10 saǵat ishinde brass ádisimen júzip ótti. Júzgishti sońynan qaıyqpen erip otyrǵan tótenshe jaǵdaılar mamandary, dárigerler baqylap otyrdy. – Brass – qoldy, deneni syrtqa shyǵarmaı, sý ishinde keýdemen uzynnan jatqan qalpynda qol-aıaqpen sımmetrııaly esip júzýdiń túri. Buǵan deıin 25 metrlik basseınde 4 saǵat boıy tolassyz jattyǵýdy ádetke aınaldyrdym. Al Máskeýge jolǵa shyǵý úshin kún saıyn 10 shaqyrym qashyqtyqqa júgirip jattyqtym. О́zimniń bul velojoryǵymdy soǵysta sheıit bolǵan atalaryma, basqa da maıdangerlerge arnadym,  – degen edi. О́mirjannyń jasy 54-te. Ol jastaıynan sportpen aınalysypty. Sharbaqty aýylyndaǵy mektepte dene shynyqtyrý páni­nen sabaq beredi, talapty balalardy qazaqsha kúreske baýlıdy. Endi, mine, О́mirjan taǵy da alys jolda, maqsaty – Mońǵolııa, Qytaı, Reseı elderin velosıpedpen júrip ótpekshi. Ázirge eshqaıda tirkelmegen О́mirjannyń rekordtary da kúnderdiń kúninde esepke alynyp, elener dep oılaımyz. Al ázirge sát-sapar tilep, aman-esen oralýyn kútemiz. Farıda BYQAI, «Egemen Qazaqstan» Pavlodar oblysy