Jańalyqshyl ustazdar jıyny

Táýelsizdiktiń 25 jyldyǵy men jańa oqý jylynyń bastalýyna oraı «KATEV» halyqaralyq qoǵamdyq qorynyń uıymdastyrýymen «Máńgilik El» – jas urpaqty Qazaq eliniń ulttyq ıdeıasyna biriktirýshi faktor» atty taqyrypta qazaq-túrik lıseıleri arasynda respýblıkalyq konferensııa ótti. Elimizdiń túkpir-túkpirinen kelgen jańalyqqa jany qumar ustazdar bilim berýdiń mazmunyn jańartý, ol úshin tıimdi orta qalyptastyrý máseleleri jaıly pikir almasty. Konferensııa qonaǵy Bilim jáne ǵylym mınıstrliginiń mektepke deıingi jáne orta bilim berý departamentiniń dırektory J.Jontaeva bilim berý mazmunyn jańartýda oqýshylardyń tanymdyq belsendiligi men ózindik oılaryn qamtamasyz etetin damytýshy, syndarly bilim berý modeline kóshý qajettiligin atap ótti. «KATEV» halyqaralyq qoǵam­dyq qorynyń dırektory Darhan О́te jáne vıse-prezıdent Abdýrahmen Sel óz sózderinde bilikti maman daıyndaý, olardy synaqtan ótkizý, ádisteme jumystaryn júıe­leý, qazaq jáne aǵylshyn til­derinde qosymsha oqýlyqtar men oqý quraldaryn jasaý, bilim salasynda Qordyń jáne qazaq-túrik oqý oryndarynyń qyzmetin damytý men jetildirý máselelerine baılanysty aqparat berip, daryndy balalarǵa bilim berý júıesin álemdik deńgeıge kóterý kerektigine basa nazar aýdardy. Qordyń bul salada atqarǵan is-sharalary da az emes. Tamyz aıynda aǵylshyn tili pániniń muǵalimderi men ınformatıka, hımııa, bıologııa, fızıka pánderin aǵylshyn tilinde júrgizetin ustazdar úshin uıymdastyrǵan oqytý semınaryna 1227 muǵalim qatysyp, oqytylatyn pánderi boıynsha daǵdy men sheberlikterin shyńdady. Atalǵan is-sharalar ulttyq bilim berý júıesiniń halyqaralyq bilim berý úlgilerine kiriktirilýine jáne jaratylystaný-matematıka baǵytyndaǵy pánderdi oqýshylardyń aǵylshyn tilinde oqyp, úırenýine teńdeı qoljetimdilikti qamtamasyz etýge qosqan úlesimiz bolyp tabylady. Jas urpaqty Qazaq eliniń ult­tyq ıdeıasy – «Máńgilik El» baǵy­tynda tárbıeleýdiń mazmuny men ma­ńyzdylyǵyn uǵyndyrýdy maqsat etken konferensııa uıymdas­tyrýshylary E.Slambekov, S.Tal­dyahmetov jáne E.Ábdirásilov bul úshin jastardyń boıyna Jańa Qazaq­standyq Patrıotızm rýhyn  sebý kerek degen mindet júktedi. Sondaı-aq, túrli salada tabysty kóshbasshylyqqa talpynystaryn yntalandyratyn sebepter men qundylyqtar qalyptastyrý úshin qajetti aqparattar men nusqaýlyqtar berdi. Qatysýshy muǵalimder «USTAZ» kásibı jetildirý ortalyǵyna bilimdi jańǵyrtýǵa baǵyttalǵan semınar jumysyn uıymdastyrǵany, ótkizilgen is-sharalardyń mazmu­ny joǵary bolǵany úshin rızashy­lyqtaryn bildirdi. Baqyt AITMÝRZINA ASTANA