Búgin Astanada Qorǵanys mınıstri Imanǵalı Tasmaǵambetov jeńil atlet, Rıo-de-Janeıroda ótken Olımpııalyq oıyndardyń qola júldegeri, Armııanyń ortalyq sport klýbynyń kapıtany Olga Rypakovaǵa qurmet kórsetti.
«Barlyq áskerı qyzmetshilerdiń jáne jeke ózimniń atymnan armııashy sportshylardyń kúsh-jigerin atap ótkim keledi. Sonyń ishinde Olımpıadada jeńil atletıka jarysynda qola júldeger atanǵan bizdiń Olga Rypakovany quttyqtaǵym kelip otyr. Elbasy – Qazaqstan Respýblıkasy Qarýly Kúshteriniń Joǵarǵy Bas Qolbasshysy atap ótkendeı, Olga Rypakovanyń qola medali altyn júldege ábden laıyq. Sebebi, London men Rıo Olımpıadalary arasynda ol sporttyq babyn saqtaı otyryp, eki ret ana atanyp úlgerdi. Dál siz sekildi adamǵa qarap barsha Qazaqstannyń jastary boı túzeıdi», - dedi qorǵanys vedomstvosynyń basshysy.
Osydan keıin Imanǵalı Tasmaǵambetov Elbasynyń atynan sportshyǵa «Parasat» ordenin, merziminen buryn kezekti «maıor» áskerı ataǵy men baǵaly syılyqtardy tabys etti.
Kezdesýde Olga Rypakova Elbasyǵa, Qorǵanys mınıstri men AOSK-nyń barlyq basshylyǵyna alǵysyn aıtty. «Barshalaryńyz maǵan jankúıer bolyp, qoldaý kórsettińizder. Qazaqstan Respýblıkasyna jáne sportqa qyzmet etemin! Men ári qaraı da barlyq álemdik arenalarda óner kórsetip, elimizdiń abyroıyn asqaqtatqym keledi», - dedi ol.
Qorǵanys mınıstrligi Armııa ortalyq sport klýbynyń áskerı qyzmetshisi Olga Rypakova Rıoda ótken Olımpıadada úsh márte sekirýde 14,74 metr nátıje kórsetti. Bul onyń maýsymdaǵy úzdik jeke nátıjesi boldy.
Dastan KENJALIN
