Jergilikti polısııa jumysy jandanady

Keshe Premer-Mınıstr Kárim Másimov Astana qalasyndaǵy ishki ister departamentiniń birqatar nysandaryn aralap kórdi. Budan soń Premerdiń tóraǵalyǵymen Ishki ister mınıstrliginde jergilikti polısııa qyzmetin damytý máseleleri boıynsha keńes boldy. Atalǵan jıynǵa Úkimet músheleri men birqatar mınıstrlikter men vedomstvolar basshylary qatysty. Sondaı-aq, onyń jumysyna Joǵarǵy Sot Tóraǵasy Qaırat Mámı, Prezıdent Ákimshiligi Basshysynyń orynbasary Marat Beketaev, Bas prokýror Jaqyp Asanov, sonymen qatar, Densaýlyq saqtaý jáne áleýmettik damý, Qarjy jáne Ulttyq ekonomıka mınıstrlikteriniń basshylary da shaqyryldy. Otyrysta baıandama jasaǵan Ishki ister mınıstri Qalmuhanbet Qasymov jergilikti polısııa qyzmetiniń qalyptasý barysy men ony jetildirý sharalaryn baıandady. Mınıstr bes ınstıtýttyq reformany júzege asyrý jónindegi «100 naqty qadam» – Ult Josparynyń 30-qadamyn oryndaý barysynda jergilikti polısııa qyzmeti ishki ister organdaryna qoǵamdyq qaýipsizdik pen tártipti qamtamasyz etýdiń jańa nysanyna kóshýge múmkindik jasaǵandyǵyn erekshe atady. «Atalǵan qyzmettiń jergilikti qoǵamdastyqqa esep berý mindettiligi zańmen bekitildi, al ákimder jergilikti polısııa qyzmetine jańa mindetter qoıyp, olardyń oryndalýyn baqylaý quqyǵyna ıe bolyp otyr. Jergilikti polısııa basshylary únemi máslıhat pen halyq aldynda esep beredi, dedi Qalmuhanbet Nurmuhanbetuly. Jalpy, jyl basynan beri ýchaskelik polısııa ınspektorlarynyń halyq aldyndaǵy 14,5 myńǵa jýyq eseptik kezdesýi ótip, olarǵa mıllıonǵa jýyq azamat jáne 7,6 myńnan astam jergilikti atqarýshy organ ókilderi qatysqan eken. Osyndaı keleli kezdesýler barysynda ishki ister jáne ózge de memlekettik organdar qyzmetine qatysty 11,7 myńnan astam eskertpeler men usynystar kóldeneń tartylǵany belgili boldy. Mundaı eseptik kezdesýler barysy buqaralyq aqparat quraldary betterinde jarııalanyp otyrǵany da atalmaı qalmady. Kezdesýler jergilikti polısııa jumysyn uıymdastyrýǵa ózindik oń yqpalyn tıgizedi. О́ıtkeni, polısııanyń jergilikti atqarý organdarymen tyǵyz qa­tynas ornatýyna jáne atalǵan qyzmet ju­my­syna ekijaqty baqylaý ornatýǵa baryn­sha múmkindik beredi. Sonyń nátıje­sinde jergilikti atqarýshy organdarmen jáne turǵyndarmen ózara seriktestikke negizdelgen qarym-qatynastar ornamaq. Bul óz kezeginde polısııa jumysynyń tıimdiligi men ashyqtyǵyn arttyrýǵa septigin tıgizedi. Májilis barysynda, sonymen birge, birqatar aýmaqtyq jergilikti polı­sııa qyzmeti men ishki ister departa­ment­teri bastyqtarynyń esepteri tyńdal­dy. Odan belgili bolǵandaı, jergilik­ti polısııa qyzmetiniń birinshi jarty­jyl­dyq qorytyndysy boıynsha polı­sııa jumysynyń jeke kórsetkishteri jaq­sarǵan. Tarqatyp aıtqanda, jol-patrýl­dik polısııa jasaǵy qatysýymen ashylǵan qylmystardyń kórsetkishteri 15,2%-ǵa, al ýchaskelik ınspektorlardyki 16,8%-ǵa jaqsarǵan. Budan basqa, ákimshilik quqyq buzýshylyqtardy anyqtaýdyń sany 9,4%-ǵa artqan. Keshendi sharalar qabyldaý nátıjesinde jol-kólik oqıǵalary 2%-ǵa, jolda qaza tapqandar 10,4%-ǵa, al jaraqat alǵandardyń sany 1,5%-ǵa azaıǵan. Reti kelgende aıta ketý kerek, qazirgi kezde jergilikti polısııa qyzmeti quramyna kirgen bólinister sany 25 myń birlikke jetip otyr. Áıtse de, jergilikti polısııa qyzmetiniń materıaldyq-tehnıkalyq jabdyqtalýy áli de jetildirýdi qajet etedi. Bul turǵydan alǵanda, Úkimet jergilikti atqarýshy organdarmen birlesip jergilikti polısııa qyzmetin avtokólik, beınetirkegishter, baılanys quraldary, kompıýterlik tehnıkamen jabdyqtaý jáne t.b. boıynsha birqatar sharalar qabyldaǵan. Joǵaryda atap ketkenimizdeı, keńes jumysy bastalar aldyn­da Premer-Mınıstr Kárim Másimov elor­da­daǵy jergilikti polısııa qyzmetiniń bir­qatar nysandary men qurylymdaryn aralady. Aldymen elordanyń sol jaǵa­laýynda oryn tepken «Astana Innova­tions» AQ-ta bolǵan K.Másimov osyn­daǵy «Qaýipsiz qala» jobasy aıasynda engizilgen jańa tehnologııalarmen tanys­ty. Úkimet basshysy Astana qalasy tynys-tir­shiliginiń qaýipsizdigin keshendi qamta­masyz etý júıesiniń múmkindigi kórsetildi. Sonymen qatar, Premer-Mınıstr «Saryarqa» aýdandyq IIB-de bolyp, jergilikti polısııa qyzmetiniń jumysy nátıjesimen, IID JPQ Jol-patrýldik polısııa polki jáne departamenttiń arnaıy jedel áreket etý jasaǵymen tanysty. Asqar TURAPBAIULY, «Egemen Qazaqstan»