Qazaqstan men Vetnam mýzeıleri arasynda memorandým jasaldy

Hanoı qalasynda Qazaqstan Respýblıkasy Ulttyq mýzeıiniń dırektory Darhan Myńbaı men Vetnam tarıhy Ulttyq mýzeıiniń dırektory Ngýen Van Kýong eki mýzeı arasyndaǵy ózara yntymaqtastyq týraly memorandýmǵa qol qoıdy. Memorandýmnyń negizgi maqsaty – mádenı murany saqtaý, zertteý jáne taratý, sondaı-aq eki eldiń mýzeıleri arasyndaǵy ǵylymı jáne iskerlik baılanysty damytý. Qos taraptyń da ýaǵdalastyq jasaýǵa ózara múddeliligin eskere otyryp daıyndalǵan memorandým 7 baptan turady. Onda ǵylymı-zertteý jáne mádenı-bilim berý jobalaryn birlesip ázirleý jáne iske asyrý, birlesken ǵylymı jáne ǵylymı-praktıkalyq konferensııalarǵa, semınarlar men sımpozıýmdarǵa qatysý jáne ótkizý, birlesken kórmeler, jarııalanymdar uıymdastyrý tóńiregindegi máseleler qarastyrylǵan. Atalǵan memorandýmǵa qol qoıý arqyly eki tarap óz qyzmetkerleriniń biliktiligin arttyrý maqsatynda mamandarmen almasyp, ǵylymı qujattar men eksponattardyń, kolleksııalardyń kóshirmesin jasap, ózara baılanysty nyǵaıtýǵa múmkindik alady. Eki el mýzeıleriniń basshylary mańyzdy degen taqyryptardy ǵylymı ıgerýge baılanysty jobalarǵa erekshe basymdyq berýge ýaǵdalasty. Aldaǵy ýaqytta yntymaqtastyqtyń ózge de baǵyttary men taqyryptar tizbegi naqtylanyp eki jaqty kelisim boıynsha tolyqtyrylyp otyrady. Egemen-aqparat