Jedel járdem aýrýhanasyna 40 jańa kólik berildi

Almaty qalalyq jedel járdem medısınalyq kómek stansasynyń avtoparki taǵy da sońǵy úlgidegi zamanaýı 40 kólikpen tolyqty. Qala ákimi Baýyrjan Baıbek kópsalaly jedel kómek kórsetetin kólikterdiń tehnologııalyq múmkindikterimen tanysyp, sonymen qatar atalmysh shara ótken qalalyq jedel shuǵyl kómek kórsetetin aýrýhana qyzmetkerlerin medısınalyq mekemeniń 120 jyldyq mereıtoıymen de quttyqtady. Kózdiń jaýyn alyp, qaz-qa­tar tizilgen, qurylǵylary álem­­dik stan­dartqa saı, sońǵy ınnova­sııa­lyq úl­gidegi quny 30 mln teńgelik 40 «Ford Transit» avtokóligi qala bıýdjeti esebi­nen alynǵan. S kla­syndaǵy reanımasııalyq salonnyń ishi keń, bıiktigi adam boıyna la­ıyqtalǵan, dárigerdiń naýqaspen jumys jasaýyna yń­ǵaıly. Al qabyrǵalaryna ornalastyrylǵan adam densaý­lyǵyna eń alǵashqy «altyn ýaqyt­ta» shuǵyl jedel kómek kórsetýge qajetti qazirgi zamanǵy medısınalyq qurylǵylardyń bári bar. Atap aıtar bolsaq, EKG apparaty, defıbrıllıator, denedegi synyq jaǵdaıynda qozǵalatyn pnevmomashına, ýlanǵanda, kúıik jaǵdaıyna qoldanatyn jıyntyq, reanımasııalyq mıks (sorǵysh), jaryq, dárilik qutyny ustaıtyn qurylǵy, t.b. Tipti, elektr nasos pen qol jýǵyshqa deıin qamtylǵan. Ásirese, naýqasty stasıonar bó­limshesine deıin jetkizetin arba óte yńǵaıly, jeńil, adamnyń qo­symsha kúshin qajet etpeıdi. Bir artyqshylyǵy, buǵan deıingi kóliktegi qurylǵylar tek eresekterge arnalsa, munda jasóspirimder men sábılerge de kómek qolyn sozyp, jasandy dem bere alady. Qala ákimdigi syıǵa tartqan kólikter qala ishindegi 9 jedel járdem stansasyna bólinip otyr. 40 kóliktiń 8-i reanımobıldik, 32-si belsendi terapııaǵa arnalǵan. Búginde Almaty turǵyndaryna «103» kómeginde 167 brıgada qyzmet kórsetip, onda 2400-den astam dá­riger men orta býyn medısına ma-mandary jumys jasaıdy. Olar qazirgi kezde otandyq óndirisimizde shyǵarylǵan «Kómek-03» júıesin qoldanýda. Zamanaýı reanımobıldi kólik­terdi burynǵy kóliktermen salys­tyryp, tańdanysyn jasyra almaǵan №8 qosalqy stansa meń­gerýshisi Aıdyn Sabyrǵalıuly elimizdegi densaýlyq saqtaý salasyna árqashanda kóńil bólip, qoldaý kórsetip otyrǵan Elbasy N.Nazarbaev pen Almaty qala­synyń ákimdigine Almaty qalalyq jedel járdem stansasy atynan alǵysyn bildirdi. «Men 19 jyldan beri jedel járdem stansasynda qyz­met jasaımyn. Lıtvada ótken jedel járdem qyzmeti arasyndaǵy halyqaralyq jarysta qazaqstandyq komanda tórt jyl qatarynan júl­deli orynǵa ıe boldy. 2013 jyly sol baıqaýdyń birine qa­tysqanymda osyndaı keremet reanımobılderdi kórip, qyzyǵyp ta, qyzǵanyp ta qaıtqan edim. Búgin sol armanym oryndalyp otyr» dep qýanyshymen bólisti. Zady, álemdik talap boıynsha 10 myń adamǵa bir brıgada bolýy qajet desek, ol qalanyń qaı jerinde bolmasyn kez kelgen jaǵdaıda 12 mınýtta jetip úlgerýi tıis. Búginde bul ýaqytqa almatylyq jedel járdemshiler qol jetkizgen. Kúngeıdegi bas qalada turatyn 2 mln-ǵa jýyq halyqtan kúnine eki jarym myńǵa jýyq shaqyrtýlar túsedi eken. Taǵy bir jaǵymdy jańalyq, qala ákimi Almaty qalasyndaǵy qoǵamdyq kólikke arnalǵan arnaıy jolaqtarda avtobýspen birge shuǵyl kómek kórsetetin avtokólikter de júretinin eskerte ketti. Aq halattylar qyzmetin jeńil­detip, qala turǵyndaryna sapaly qyzmet berýge atsalysatyn mańyzdy shara barysynda shahar basshysy tek qana qaladaǵy emes, elimizdegi baıyrǵy emdeý orny – qalalyq jedel shuǵyl medısınalyq kómek kórsetý aýrýhanasy ujymyn mereıtoıymen quttyqtady. – Bıylǵy jyly elimiz úshin mańyzdy birneshe mereıli datalar – el Táýelsizdiginiń 25 jyldyǵy men Almaty qalasynyń 1000 jyldyǵy qatar kelýde. Sol sııaqty otandyq medısına tarıhynyń kýágeri – Jedel shuǵyl medısınalyq kómek kórsetý aýrýhanasyna da 120 jyl tolyp otyr. Tarıh paraqtary­na úńilsek, aýrýhananyń otan­dyq medısınadaǵy orny erekshe. О́z­­derińiz kórip otyrǵandaı aýrýhananyń búgingi kúıi arqyly bir ǵasyrdan astam ýaqytta elimizdiń densaýlyq saqtaý salasynyń qanshalyqty deńgeıde damyǵanyn ańǵarýǵa bolady. Zamanaýı ǵımarat, eń sońǵy úlgidegi tehnıka, bilikti mamandar, barlyǵy derlik osynda shoǵyrlanǵan, – dedi B.Baıbek. Iá, Almaty qalasyndaǵy alǵash­qy emdeý orny sanalatyn bul aýrýhananyń negizi 1896  jyly qalanǵanda nebári syrqattarǵa arnalǵan 15 jatyn orny bolǵan. Alǵashqy qan quıý ortalyǵy da, balalar bólimi, juqpaly aýrýlardy emdeıtin oryn – barlyǵy osynda negizin qalaǵan. Al 1935 jyly 60 tósekke arnalǵan hırýrgııalyq ǵımarat salynady. Keıinnen aýrýhana ataýy birneshe ret ózgergen. Tek 1975 jyly qalalyq klınıkalyq Jedel medısınalyq kómek aýrýhanasy atanady. Eń alǵash aýrýhanany I.Sobolevskıı, odan keıin Iа.Sharohvostov, 1931-1953 jyldary L.Kanevskaıa basqarady. 1992 jyly 700 tósek-orynǵa jetken klınıkany 2006 jylǵa deıin marqum Amantaı Birtanov basqaryp, onyń kópsalaly qurylymyn jetildirip, damýyna aıtarlyqtaı úles qosady. 2007 jyly osy baıyrǵy emdeý orny bazasynda 395 tósektik Qalalyq kardıologııalyq ortalyq ashyldy. 2006 jyly atalmysh aýrýhana ornyna Elbasynyń «100 mektep, 100 aýrýhana» baǵdarlamasy aıasynda qurylys jumystary bastalyp, 2011 jyly aıaqtalady. Sóıtip, biregeı aýrýhananyń tarıhta jańa betteri ashylyp, emdeý ornyn 2011-2016 jyldary Manat Seıdýmanov, búginde Almas Jýashev basqarýda. Eski klınıkanyń ornyna táýelsiz elimizde eýropalyq jáne álemdik standarttarǵa saı salynǵan emdeý mekemesin Memleket basshysy Nursultan Nazarbaevtyń ózi kelip ashqanyna da bıyl bes jyl tolyp otyr. Búginde 350 tósektik 15 bólimshede 800-den asa bilikti maman jumys isteıdi. Jyl saıyn 5 myń ártúrli kúrdeli operasııa jasalyp, 117 myńǵa jýyq naýqas em qabyldaıdy. Ásirese, neırohırýrgııa, travmatologııa, hırýrgııa, ýrologııa men gınekologııada ınnovasııalyq tásilder tabysty engizilýde. Oǵan 2012 jy­ly Shveısarlyq sapa standarty ınstıtýty taǵaıyndaǵan birneshe halyqaralyq sertıfıkatqa ıe bolýy dálel bola alady. Mereıtoı kúni emdeý mekemesi qabyrǵasynda memorıaldy taqta ashyldy. Gúlzeınep SÁDIRQYZY, «Egemen Qazaqstan» Sýretti túsirgen Aleksandr PAVSKII