1993
* 4 mamyrda Abaı atyndaǵy opera jáne balet teatrynda Abaı qorynyń tusaýkeser rásimi ótti. Jıynda sóz sóılegen Prezıdent Nursultan Nazarbaev 1995 jyldy Abaı jyly retinde atap ótýge IýNESKO-ǵa usynys jasaǵanyn habarlady.
*8 mamyrda Almatynyń bas alańynda Táýelsiz Qazaqstannyń alǵashqy áskerı sherýi ótti.
*11 mamyrda Almatyda memlekettiń ıdeologııalyq qyzmetiniń máseleleri jónindegi respýblıkalyq keńes ótkizildi. Keńeste baıandama jasaǵan Prezıdent N.Á.Nazarbaev Qazaqstan qoǵamynyń aldynda turǵan mańyzdy mindetterdiń biri azamattyq kelisim men ultaralyq tatýlyqtyń nyǵaıýy ekenin jarııalady.
Baıandama mátini «Egemen Qazaqstan» gazetiniń 13 mamyrdaǵy nómirine basyldy.
* 15 mamyrda Qazaqstan Respýblıkasy Joǵarǵy Keńesi Tóralqasynyń «Qazaqsha jer-sý attaryn, ataýlardy orys tilinde dál jazýdy tártipke keltirý jáne Qazaqstan Respýblıkasy jekelegen ákimshilik-aýmaqtyq mekenderiniń ataýlaryn ózgertý týraly» qaýlysy jarııalandy. Qaýlyǵa sáıkes Djambýlskaıa, Djývalınskıı, Djezdy, Djetysaı, Chý, Kýrdaı degen sııaqty qoldan buzylǵan ataýlar, Novorossııa, Ilıch, Dzerjınskıı, Kalının, Volodarskıı, Ermak, Andreev, Novotroıskoe sııaqty kóptegen aýdan, eldi meken attary aýystyrylyp, halqymyzdyń ardaqty uldarynyń esimimen atalatyn tutas aýdandar, qazaqy toponımıkany qalpyna keltirgen jatyq ta jarasymdy ataýlar jerdiń sánin kirgizip, eldiń kóńilin kóterip tastady.
* 18 mamyrda Prezıdent Nursultan Nazarbaevtyń Túrikmenstanǵa resmı sapary bastaldy. Úsh kúnge sozylǵan resmı sapar barysyndaǵy Elbasynyń Túrikmenstan Prezıdenti S.Nııazovpen kezdesýleri Qazaqstan men Túrikmenstan arasyndaǵy ózara túsinistik pen senimniń joǵary deńgeıin kórsetti. Sondaı-aq, osy kúni «Jappaı saıası qýǵyn-súrginder qurbandaryn aqtaý týraly» Zańy baspasózde jarııalandy.
*21 mamyrda Almatyda Qazaqstan ınjenerleriniń I sezi ashyldy. Sezde Prezıdent N.Á.Nazarbaev sóz sóıledi. Elbasy respýblıka ınjenerleriniń aldynda turǵan ortaq mindetterdi atap kórsetti.
* 25 mamyrda Úndistan Respýblıkasynyń Premer-mınıstri Narasımha Rao Qazaqstanǵa resmı saparmen keldi. Qazaqstan Prezıdenti Nursultan Nazarbaev pen Úndistan úkimetiniń basshysy Narasımha Rao bastaǵan resmı delegasııalardyń kelissózi barysynda Elbasy saýda-ekonomıkalyq yntymaqtastyqtyń naqty máselelerin sheshýmen aınalysatyn arnaýly komıssııa qurý týraly úndi jaǵynyń usynysyn qoldady.
* 26 mamyrda Prezıdent Nursultan Nazarbaev «Ońtústik Qazaqstan oblysynda «Ordabasy» ulttyq tarıhı-mádenı jáne tabıǵı qoryǵyn qurý týraly» qaýlyǵa qol qoıdy.
* 28 mamyrda kıeli Ordabasy jerinde úlken jıyn ótti. Shymkent qalasyna jaqyn jerdegi qasıetti Ordabasy bıiginde elimiz táýelsizdik alǵaly bergi ótken toılardyń shyrqaý bıigindeı bolǵan uly toı – Tóle bıdi, Qazybek bıdi, Áıteke bıdi eske alýǵa arnaldy. Júz elý myńǵa tarta adam jınalǵan toıǵa Qazaqstan, О́zbekstan jáne Qyrǵyzstan prezıdentteri qatysty.
«Egemen Qazaqstan» gazetiniń 27 mamyrdaǵy nómiri osy toıǵa arnaldy.
* 1 maýsymda Prezıdent Almatyǵa qysqa merzimdi jumys saparymen kelgen Grýzııa Prezıdenti E.Shevardnadzeni qabyldady.
* 5 maýsymda Mınıstrler Kabınetiniń sheshimimen respýblıkalyq kórkemóner kolledji men T.Júrgenov atyndaǵy Almaty memlekettik teatr-kórkemsýret ınstıtýtynyń osy saladaǵy fakýltetteri negizinde Qazaq memlekettik kórkemóner akademııasy qurylǵany jarııalandy. Úkimettiń sol kúngi taǵy bir qaýlysymen T.Júrgenov atyndaǵy Almaty memlekettik teatr-kórkemsýret ınstıtýty osy atpen Qazaq memlekettik teatr jáne kıno ınstıtýty bolyp qaıta quryldy.
* 8 maýsymda Qyrǵyz Respýblıkasynyń Prezıdenti Asqar Aqaev Qazaqstanǵa keldi. Prezıdentter – Nursultan Nazarbaev pen Asqar Aqaev eki jaqty qarym-qatynastyń barlyq salalaryn odan ári keńeıtip, tereńdetý máseleleri boıynsha áńgimelesti. Asqar Aqaev ulttyq valıýta – som engizilgennen keıingi óz respýblıkasyndaǵy ishki saıası jaǵdaı týraly Qazaqstan Prezıdentin habardar etti.
*9 maýsymda Prezıdent N.Á.Nazarbaev «Atqarýshy ókimettiń ortalyq organdarynyń júıesin retke keltirý týraly», «Memlekettik basqarý ortalyq organdarynyń tizbesi týraly» jáne «Qazaqstan Respýblıkasy Mınıstrler Kabınetiniń quramy týraly» jarlyqtaryna qol qoıyldy. Bul jarlyqtar boıynsha birqatar qurylymdar ózara qosylyp, Úkimet yqshamdala tústi.
* 14 maýsymda «Qazaqstan Respýblıkasyndaǵy bankiler týraly» Zań kúshine endi.
*15 maýsymda Memlekettik saıasat jónindegi ulttyq keńestiń birinshi májilisi ótti. Nursultan Nazarbaev memlekettik saıasattyń úsh basty mindeti retinde qoǵamdy reformalaýdyń basym baǵyttaryn taldap jasaýda, halyqtyń demokratııalyq sana-sezimin tárbıeleýde turaqtylyqty, etnosaralyq kelisimdi jáne azamattyq tatýlyqty qoldaý jónindegi memlekettik jáne basqa qurylymdardyń kúsh-jigerin úılestirip otyrýdy atap kórsetti.
*16 maýsymda Prezıdent «Qazaqstan Respýblıkasyndaǵy quqyqtyq reformanyń tıimdiligin arttyrý jónindegi sharalar týraly» Jarlyqqa qol qoıdy. Jarlyq boıynsha Prezıdent pen Mınıstrler Kabınetiniń zań shyǵarý bastamasy retinde daıyndalatyn zańdar jobalarynyń basty ázirleýshisi bolyp Ádilet mınıstrligi belgilendi.
* 17 maýsymda Nursultan Nazarbaevtyń Jarlyǵymen Prezıdent janynan Qazaqstan Respýblıkasynyń Qaýipsizdik keńesi quryldy. Sondaı-aq, osy kúni Elbasy «Qazaqstan Respýblıkasy ulttyq qaýipsizdik komıtetiniń áskerı ınstıtýtyn qurý týraly» Jarlyǵy shyqty. Bul ınstıtýt F.E.Dzerjınskıı atyndaǵy Almaty Joǵary shekaralyq komandalyq ýchılıshesi negizinde ashyldy.
* 23 maýsymda Memleket ıeliginen alý men jekeshelendirýdiń 1993-1995 jyldarǵa arnalǵan ulttyq baǵdarlamasyn júzege asyrý maqsatynda Prezıdent jarlyǵymen Investısııalyq jekeshelendirý kýpondary týraly ereje kúshine engizildi.
*3 shildede Taldyqorǵan óńirinde Salqam Jáńgir han men Jalańtós batyr bastaǵan sarbazdardyń Orbulaq shaıqasynda jońǵarlarǵa toıtarys bergen tamasha jeńisiniń 350 jyldyǵy atalyp ótti. Sol shaıqasta Jáńgir han 600 batyrymen 50 myń adamdyq dushpan qolyn toqtatqan. Al Samarqannan Jalańtós Bahadúr bastaǵan 20 myń sarbaz kómekke kelgen soń jońǵardyń 10 myń adamynyń kózi joıylǵan.
