Bıyl Kókshetaýda 350 kombaın konveıerden shyǵady

  Elimizdegi iri agrarly aımaq­tardyń birinen sanalatyn Aq­mo­la oblysynda jyl saıyn dán­di daqyldardan turaqty ónim aly­nýǵa qol jetkizilip keledi. Ob­lys boıynsha sońǵy úsh jylda jylyna ortasha eseppen 4,7 mıl­lıon tonna astyq jınalyp, ár gektardyń shyǵymdylyǵy 11,6 sentnerden aınaldy. Al dál búgingi derek boıynsha, gek­tar túsimdiligi 13 sentnerden aınalyp otyr. Bul jalpy ónim­niń 5,5 mıllıon tonnaǵa jete­tinine negiz qalaıdy. Munyń barlyǵy agrokeshenniń ozyq úlg­i­degi tehnıkalyq jaraqta­nýyna tikeleı baılanysty eken­­digi belgili. Osy oraıda, Kók­shetaýdaǵy kombaın qurastyrý zaýyty dıqandar qolyn uzartyp otyrǵanyn aıtýǵa bolady. Búgingi kúni óndiristi ıgerýde jańa tehnologııalardy qol­danatyn, ónimdilikti turaq­ty arttyratyn, úzdik álemdik stan­darttar negizinde jumys isteı­tinderge tabys kózi ashylmaq. Buǵan Kókshetaý kásiporny óz úlesin qosatyny anyq. О́ıtkeni, qazirgi kezde osy baǵytta aý­qymdy sharalar qolǵa alynyp, tıisti qaıtarymyn berýde. Dala kemelerin Aqmola oblysynyń ǵana emes, elimizdiń búkil egistik alqaptarynan kórýge bolady. Bul suranystyń jyl sanap artyp otyrǵanyn bildiredi. Kókshetaý qalasynyń ındýstrııalandyrý kartasynda «Vektor» kombaın zaýyty 2011 jyly paıda boldy. Kásiporyn dırektory Iýrıı Bashýrovtyń aıtýynsha, aldymen qańyrap bos turǵan ǵımarat bássaýda arqyly satyp alynǵan. Kóp uzamaı qurastyrý sehy ashyldy. Búgingi tańda «QazAgroQarjy» jáne «Rostselmash» kombaın zaýyty» aksıonerlik qoǵamdary arasyndaǵy mámile negizinde qurylǵan Qazaqstan-Reseı birlesken kásiporny «Vektor-410 KZ» markaly dala kemelerin qurastyryp, kepildendirilgen ser­vıstik qyzmet kórsetýmen aına­lysýda. Qajetti bólshekter Reseı jáne Belarýs elderinen jetki­ziledi. Zaýyttyń qýaty jylyna 300 kombaın qurastyrýǵa múmkindik beredi. Dırektordyń keltirgen derek­terine qaraǵanda, «Vektor-410 KZ» kombaınynyń Qazaqstan naryǵyndaǵy úles sany jyl sanap artyp keledi. Naqtylaı aıtsaq, respýblıkamyzdaǵy egin jınaý tehnıkasynyń 50 paıyzǵa jýyǵy osy kombaındardyń enshisinde. «Vektor-410 KZ» óńi­ri­mizdiń klımattyq erekshe­likterine beıimdelgen, jeńil bas­qarylady ári jergilikti jaǵdaıda jóndep te alýǵa bolady. Al ónim­diligi jaǵynan sheteldik kom­baındardan qalyspaıdy. О́nim­niń ótkizilý máselesinde de qıyndyq joq sııaqty. Bul is «Rostselmash» kompanııasymen on jyl boıy áriptestik baıla­nystaǵy «QazAgroQarjy» aksıo­nerlik qoǵamy júıesi arqy­ly júzege asyrylady eken. Iаǵnı, memlekettik múddedegi kepil­dik bar. Qazirgi kúni zaýyttyń óndi­ris­tik alańdary jańǵyrtylyp, qýat­tandyrylǵan. Osynyń ná­tı­je­sinde óndiris kólemi de ulǵaı­tylǵan. Eń bastysy, ja­ńa keden rejimi talaptaryna sáı­kes, tehnıkany qosymsha qun sa­ly­ǵynsyz bosatý arqyly kom­baınnyń baǵasy arzandap, aýyl eńbekkerleri úshin aıtarlyqtaı jeńildikter týyp otyr. Máselen, 2015 jyly zaýytta barlyǵy 222 dana «Vektor-410 KZ» kombaıny qurastyryldy. Ústimizdegi jyly konveıerden besjúzinshi kombaın shyǵaryldy. Aıta keterlik jaǵdaı, qazirshe kombaın bólshekteriniń 70 paıyzy she­telden tasymaldansa, jyl sońyn­da onyń deńgeıi 10 paıyzǵa tómen­demek. Demek, óndiristik kezeń­degi qazaqstandyq úles arta túspek. – О́zimizde servıstik qyzmet kórsetý ortalyǵy bol­ǵan soń, óńirdegi kóptegen sharýa­shylyqtarǵa qyzmet kórsetý­demiz. Aldaǵy ýaqytta ony da ke­ńeıtetin bolamyz. Bizdiń jumys munymen shektelip qalmaıdy. Aldaǵy josparlarymyz da aýqymdy. Máselen, «Bıznestiń jol kartasy-2020» memlekettik baǵdarlamasy sheńberinde ınfraqurylymdy damytý kózdelgen. Onyń ishinde, aldaǵy 2017 jyly zaýyt aýmaǵynda qazirgi zamanǵy servıstik qyzmet kórsetý ortalyǵyn, 2018 jyly №2 óndiristik seh pen qosymsha qoıma salý josparlanyp otyr. Sondaı-aq, óndiristik jelini keńeıtý arqyly ónimniń otandyq úlesin 40 paıyzǵa jetkizetin bolamyz. Qazirdiń ózinde kóptegen qajetti qosalqy bólshekterdi otandyq zaýyttardan alyp otyrmyz. 2015-2016 jyldary óndiristi ártaraptandyrý baǵytynda naqty sharalar qolǵa alynyp, qazirgi zamanǵy «Agrosoıýz-Horsh» tuqym sebý keshenderi men kombaındaryn shyǵarý jobasy da qolǵa alynýda. Osy maqsatta mamandarymyzdy Rostovtaǵy zaýytta oqytý ústindemiz. Jobanyń júzege asyrylýy óńirde jańa jumys oryndarynyń ashylýy­na septigin tıgizetin bolady. Osylaısha, óndiristi ıgerýde jańa tehnologııalardy qoldanatyn, ónimdilikti turaqty arttyratyn, úzdik álemdik standarttar negizindegi tehnıkalar qatarǵa qosylatyn bolady, – deıdi «Vektor» kombaın zaýyty» JShS dırektory Iýrıı Bashýrov. Baqbergen AMALBEK, «Egemen Qazaqstan» Aqmola oblysy