Qyzǵaldaq qumda da qaýyz jarady

Arab memleketteri lıgasy men Birikken áıelder uıymy Kaır qalasynda «Arab aımaǵynda beıbitshilik pen qaýipsizdikti qamtamasyz etýdegi áıelderdiń róli» atty tuńǵysh konferensııasyn ótkizdi. Bul shara BUU Qaýipsizdik Keńesiniń 1325 qararyna sáıkes, aımaqtyq strategııany ózara birlese júzege asyrýǵa baǵyttaldy. Qarar shıelenisterdiń aldyn alyp, ony sheshýdegi, beıbit kelisimderge kelýdegi áıelderdiń mańyzdy rólin bekitip, olardyń beıbitshilik pen qaýipsizdikti nyǵaıtýda teńdeı dárejede belsendi qatysýyna mán beredi. Alqaly jıynǵa áıelder máselesimen aınalysatyn Arab memleketteri lıgasynyń Bas hatshysy Ahmed Abýl Geıt, Egıpettegi áıelder jónindegi Ulttyq keńestiń prezıdenti Maııa Morsı, Iordanııa áleýmettik damý mınıstri Khval Ibragım Armoýtı sekildi birneshe arab mınıstrleri men yqpaldy ókilderi qatysty. 22 arab elderi mınıstrleriniń ishinde bas baıandamashy retinde shaqyrylyp, beıbitshilik úshin ómir súrip, jumys isteýge daıyn 3,6 mlrd áıeldiń analyq júreginiń tilegin ózge aı­maq­tan kelip qatysqan Beıbitshilik jolyndaǵy halyq­aralyq áıelder tobynyń tóraıymy (IWPG) Kım Nam Hı hanym jetkizdi. Ol álemdegi ynty­maq­tastyqtyń órkendeýine kúsh salyp júrgen áıelder qaýymynyń beıbitshilik ornatýda da jetekshi ról atqarýyn basa aıtty. Dúnıejúzilik damýda dál bilim sekildi il­geri jyljytatyn kúsh kemde-kem. Genderlik te­pe-teńdik bilimnen bastaý alýy tıis, álemdik pikir­talastarda áıelderdiń de úni estilýi kerek. Áıelderdiń qatysýymen ótken beıbitshilik keli­simderi, gýmanıtarlyq qoldaýlar men ekonomıkalyq damýdyń úzdik nátıjeleri onyń oń sıpat tanyta bastaǵanyn kórsetip otyr. Bizde adam­zatty beıbitshilikke bastaıtyn qýatty kúsh bar. Sol arqyly beıbitshilik ornatyp, ony bala­larymyzǵa syılaıyq, dedi Kım Nam Hı konferensııada. Hı hanym konferensııaǵa qatysqan Arab áıelderi uıymynyń bas dırektory Mervat Tallaýı, Arab elderi lıgasynyń Áıelder, balalar men otbasy isi jónindegi departamenttiń dırektory Inaıa Mekavı, Palestınanyń Áıelder isi jónindegi mınıstri Haıf ál-Aga sekildi joǵary dárejeli resmı ókildermen kezdesý ótkizip, arab aımaǵyndaǵy áıelderdiń múmkindigin keńeıtý týraly máselelerdi talqylady. Konferensııadan keıin Kım Nam Hı arab áıelderiniń jańa betburysqa beıimdiligin kórip qýattanǵanyn, al munyń beıbitshilik jolyndaǵy Halyqaralyq áıelder toby (IWPG) qurǵan álemdik jelilermen ózara árekettestikte altyn kó­pir bola alatynyn aıtty. Basqosýda usy­nyl­ǵandaı, bul Egıpetten bólimshe qurýǵa negiz bola alady. Aıta ketý kerek, IWPG beıbitshilikke jetý jolynda áıelderdiń jasyna, násiline qaramastan birikken, álemdegi barlyq áıeldermen jumys isteıtin úkimettik emes uıym bolyp sanaldy. Túıinin aıtqanda, arab áleminde de áıelderdiń beıbitshilik úshin qyzmeti bastaldy. Aıgúl AHANBAIQYZY, «Egemen Qazaqstan» ALMATY