Qyrǵyz Respýblıkasy Qarýly kúshteri Bas shtabynyń Balyqshy qalasyndaǵy «Edelveıs» polıgonynda Shanhaı yntymaqtastyq uıymy múshe memleketteriniń «Beıbit mıssııa-2016» birlesken áskerı lańkestikke qarsy komandalyq-shtabtyq oqý-jattyǵýynyń resmı ashylýy ótti.
Saltanatty is-sharaǵa bes eldiń, ıaǵnı Qazaqstan Respýblıkasy, Qyrǵyz Respýblıkasy, Qytaı Halyq Respýblıkasy, Reseı Federasııasy jáne Tájikstan Respýblıkasy Qarýly kúshteriniń áskerı kontıngentteri qatysty.
Jalpy alǵanda, oqý-jattyǵýǵa 2 myńǵa jýyq áskerı qyzmetshi, shamamen 300 birlik áskerı tehnıka jumyldyrylsa, olardyń birshamasy jańǵyrtylǵan jáne zamanaýı qondyrǵymen jabdyqtalǵan, sondaı-aq, qurlyq áskerleriniń is-qımylyn qalqalaýdy qamtamasyz etýge arnalǵan 40-qa jýyq jaýyngerlik avıasııa tartyldy.
«Mundaı oqý-jattyǵýlardyń ótkizilýi qazirgi zaman talabyna saı ári ShYU jaýapkershiligi óńirinde jáne jalpy álemde qalyptasqan halyqaralyq jaǵdaı negizinde óziniń ózektiligi men mańyzdylyǵyn talaı márte dáleldegen», – dep «Beıbit mıssııa-2016» birlesken oqý-jattyǵýynyń jetekshisi polkovnık R.Muqambetov aıtyp ótti. – Oqý-jattyǵýdyń qoıylǵan maqsattaryna qol jetkizý úshin birge barynsha kúsh-jigerimizdi salatynymyzǵa senimdimin. Sebebi, qazirgi oqý-jattyǵýlar «jaýyzdyqtyń úsh kúshimen», ıaǵnı lańkestikpen, ekstremızmmen jáne separatızmmen kúresýden basqa, memleketterimiz Qarýly kúshteriniń anaǵurlym tyǵyz áskerı yntymaqtastyǵyna yqpal etedi».
Qazaqstannan oqý-jattyǵýǵa Qazaqstan Respýblıkasy Qarýly Kúshteri Aeroutqyr áskerleriniń áskerı qyzmetshileri qatysýda.
«Egemen-aqparat»
