Jánibek Álimhanuly Tokıo Olımpıadasyna daıyndalady

Qazaqstandyq belgili boksshy Jánibek Álimhanuly Rıo-de-Janeıro Olımpııalyq oıyndarynan keıin ózin kásipqoılar rınginde synap kórýge bel baılapty. Bul jańalyqty jalpaq jurtqa bylǵary qolǵap sheberiniń jeke jattyqtyrýshysy Murat Sıhymbaı jetkizdi. – Jasyratyny joq, Olımpıadadan keıin Jánibektiń kóńil kúıi bola qoımady, – dedi bapker keshe biz arnaıy habarlasqanymyzda. – Son­daı kóńiliniń hoshy bolmaı júrgen kún­derinde oǵan kásipqoılar rınginde baǵyn synap kórý jóninde usynys tústi. Biz sosyn ári-beri oılasa kelip, usynysty qabyl alǵandy jón kórdik. – Bul birjola kásipqoılarǵa ketedi degen sóz emes shyǵar? – Joq. Aldaǵy Olımpıadaǵa deıin áli tórt jyl bar. Soǵan deıin munda da shama-sharyqty kórip, tájirıbe tolystyra túsý kerek bolyp tur. Bir jaǵy, bul áýesqoı bokstan azdap tynys alý da bolyp tabylady. Ekinshiden, shákirtim ózin basqa qyrynan, basqa salada kórgisi keldi. Men onyń munysyn quptaımyn. Al Alla jazyp jatsa, Tokıonyń aldynda áreket jasap, lısenzııa alyp, Olımpıadaǵa qaıta qatysýǵa ábden bolady. – Jánibek bul synda asa qatty tosyla qoımas. – Men de solaı oılaımyn. Negizinde, Jánibek – óte kúshti jigit. Onyń 23 jasyna deıin álemniń de, Azııanyń da chempıony bolyp úlgergeni beker emes. Ras, Olımpııalyq oıyndarda alǵa qoıǵan maqsaty oryndalmaı qaldy. Degenmen, bul sátsizdikte biz oǵan qoldaý kórsettik. Munymen ómir toqtap qalǵan joq. Alda alatyn áli talaı asý bar dep bilemin. Jánibek Rıo rınginde úsh shaıqas ótkizdi. Ol 1/16 fınaldyq aıqasta brıtanııalyq Entonı Foýlerdi, 1/8 fınalda aljırlik Ilıas Abadıdi utty. Alaıda, shırek fınalda qazir Ázerbaıjan namysyn qorǵaıtyn burynǵy qazaqstandyq Kamran Shahsývarlydan utylyp qaldy. Jánibek Álimhanulynyń kásipqoılar sharshy alańyndaǵy alǵashqy jekpe-jegi 29 qazan kúni Almatyda bolatyn boks keshi sheńberinde ótkeli tur. Qazirge deıin onyń debıýttik jekpe-jegi kimmen ótetini de belgili boldy. Ol – 28 jastaǵy kolýmbııalyq Mılton Nýnes. Orta salmaqta synǵa túsip júrgen Nýnes buǵan deıin kásipqoılar rınginde 50 kezdesý ótkizip, solardyń 33-inde jeńgen, 29-yn nokaýt­pen aıaqtaǵan, taǵy 16 shaıqasynda jeńilis tapqan, bir jekpe-jekti teń bitirgen. Sol kúngi basty shaıqas qazaqstandyq Qanat Islam men WBA Fedelatin nusqasynyń birinshi orta salmaqtaǵy chempıony, ganalyq Patrık Alloteı arasynda ótedi.  Rýslan IGILIK