Dinı ekstremızmmen kúres – dinmen taıtalasý emes

Almaty qalasy ákimdigi janyndaǵy Qoǵamdyq keńestiń kezekti otyrysy ótti. Bul joly «Turan» ýnı­ver­sıte­tiniń májilis zalyna jınalǵan keńes músheleri qo­ǵamdyq talqylaýǵa túsip jatqan «Terrorızm men dinı ekstremızmge qarsy kúres» týraly zań jobasyna engiziletin ózgerister men tolyqtyrýlarǵa qatysty pikir almasty. Jıyn­ǵa Almaty qalasyndaǵy me­shitterdiń ımamdary men Qa­zaqstan Musylmandary dinı basqarmasynyń ókilderi shaqy­ryldy. – Sońǵy kezderi oryn alyp jatqan oqıǵalar qoǵamdy beıjaı qaldyrmaıtyny anyq. О́ıt­keni, tynyshtyǵymyz buzyla jazdady. Beıbit turǵyndar men tártip saqshylaryna qarsy oq atyldy. Bul – terrorızm atty tajal­dyń tyrnaǵy bizdiń elimizge de qandy izin sala bastady degen sóz. Budan ári qol qýsyryp otyrýǵa bolmaıdy. Sol sebepten de elimizdegi birqatar zań­dar qaıta qaralyp, ózgertiledi. Jáne bul engiziletin ózgertýler qoǵamdaǵy máselelerdi zert­tep, mamandarmen aqyldasa otyryp jasalmaqshy. Bizdiń qoǵamdyq keńestiń mindeti – taqyrypqa ún qosyp qana qoımaı, naqty usynystardy jınap, ekshep alý, – dedi qoǵamdyq keńes tór­aǵasy, Almaty qalalyq máslıhatynyń depýtaty Rah­man Alshanov jıyn barysynda. Qoǵamdyq talqylaý barysynda belgili saıasattanýshy Aıdos Sarym zań jobasyna engiziletin ózgeristerdi talqylaýǵa eliniń, urpaǵynyń bolashaǵyna beıjaı qara­maıtyn árbir azamat múddeli bolýy kerektigin aıtty. «Ter­rorızm men dinı ekstremızmge qarsy kúres týraly zańdy talqylaý tek Májilis depýtattary men arnaıy qyzmet­tiń ǵana jumysy emes. Bul – meniń, seniń, bárimizdiń azamat­tyq paryzymyz. Ter­rorızm men dinniń atyn jamyl­ǵan lańkestik qaýpine «E, menen aýlaq...» dep salǵyrt qa­raı­tyn bolsaq, úıimizden de, elimizden de bereke ketedi. Ári bul zańdy qabyldaý barysynda birjaqtylyq oryn almaýy tıis. Bul tek kúshtik qurylymdardyń qyzmetin naqtylap, qosymsha quqyq berýshi qujat emes, qoǵamdyq sanany aǵartýshy, aldyn alýshy, saýyqtyrýshy, qysqasy adamdardyń múddesin kózdeıtin zań bolýy tıis. Son­da ǵana lańkestikpen kúres nátıjeli bolady. Ol úshin mamandardyń, ásirese din sala­synyń ókilderiniń pikiri, bilimi aýadaı qajet» deıdi saıasattanýshy. Dál osyndaı pikirdi Al­maty qalasynyń bas ımamy Nurbek qajy Esmaǵam­bet te qýattaıdy. «Dinı ekstre­mızmmen kúres týraly zań­nyń qabyldanǵany, qataıtylǵany durys. Elimiz­diń qaýipsizdiginen qymbat eshnárse joq. Sol sııaqty dini­mizdiń qaýipsizdigin de qorǵaýymyz kerek. Tek osy dinı ekstremızmmen kúresý quraldary dinmen kúresýge baǵyttalyp ketpeýi kerek. Terrorızmmen kúresýge bi­lektiń kúshi ǵana emes, bilim­niń qýatyn da qoldanaıyq. Qabyldanatyn zańda osy má­sele naqty kórinis tabady dep senemiz. Bul turǵydaǵy naqty usynystarymyzdy qoǵamdyq keńeske usyndyq. Sol sııaqty qoǵamdaǵy ımamdardyń statýsyn anyqtaý máselesi ótkir tur. Sebebi, din memleketten bólek bolǵanymen, zaıyrly qoǵam ókilderi úshin meshit qulshylyq etetin jer ǵana emes, tárbıe oshaǵy ispetti. Jalpy, elimizge Dinı birlestikter týraly zańdy da qaıta qarap, Qazaqstan musylmandary dinı basqarmasynyń da mártebesin naqtylaıtyn kez jetti. Din – buljymaıtyn qaǵıdalardyń kıeli jıyntyǵy bolǵanymen, jamaǵatty ımandylyq jolyna shaqyrýdaǵy jumystarǵa jańashyldyq kerek...», – deıdi qalanyń bas ımamy. Qoǵamdyq keńeste aıtylǵan ordaly oılar usynys retinde qabyldanyp, tıisti deńgeıdegi jumys komıssııalaryna joldanatyn boldy.  Qalmahanbet MUQAMETQALI, «Egemen Qazaqstan» ALMATY