Áleýmettik joba qoldaý tapty

Aqmola oblystyq jumyspen qamtýdy jáne áleýmettik baǵdar­lamalardy úılestirý basqarmasynyń uıymdastyrýymen Kókshetaý­daǵy Dostyq úıinde úzdik áleýmettik jobalar kórmesi bolyp ótti. Atalmysh kórme oblysymyzda osymen úshinshi jyl qatarynan ótkizilip otyr. О́tken jyly «Men bárin isteı alamyn! Meniń qolymnan bári keledi!» atty jobany usynǵan Kókshetaý qalasyndaǵy psıhonevrologııalyq aýytqýlary bar jáne tirek-qımyl júıeleri buzylǵan múgedek balalarǵa medısınalyq áleý­mettik kómek kórsetetin mekeme baıqaý jeńimpazy atan­ǵan bolatyn. Bıylǵy jyly baıqaýǵa jeti joba qatystyrylyp otyr. Olardyń basym kópshiligi ómirde qıyn jaǵdaıǵa tap bolǵan múgedek balalardy ońaltýdy, qoǵamda óz oryndaryn tabýǵa kómektesýdi maqsat etken jobalar. Jınalǵandar aldynda quttyqtaý sóz sóılegen oblystyq jumyspen qamtýdy jáne áleýmettik baǵdarlamalar­dy úı­lestirý basqarmasy basshysynyń oryn­basary Sholpan Rahmatýllına múmkindigi shekteýli jandardy ońaltý maqsatynda jyl saıyn oblystyq bıýdjetten qomaqty qarjy bólinip kele jatqanyn aıta kele, búgingi kúni oblys aýmaǵynda 20 myń múgedek tirkelgenin jáne osy salada eńbekterimen kózge túsken birqatar úkimettik emes uıym­dar­dyń belsendiligine rızashylyq bildirdi. Olardyń arasynda «Aqkóldegi №1 bala­lar úıi» memlekettik mekemesi, Kók­she­­taýdaǵy «Shans» múgedekterdi ońaltý ortalyǵy» qoǵamdyq birlestigi, Step­nogordaǵy «Erlik» tirek-qımyl apparaty zaqymdanǵan múgedekterdiń qoǵamy, «Balapan» múgedek balalardy tárbıelep otyrǵan ata-analar qoǵamy, Atbasar qalasyndaǵy «Selına» qoǵamdyq qory jáne Jar­qaıyń aýdanyn­daǵy «Aqmola oblysy múgedek balalardy qol­daý qaýym­dastyǵy» qoǵamdyq birlestigi bar. Qazylar alqasy qyzý talqylaýdan keıin «Kókshetaý qalasy men Krasnoıar kentinde I toptaǵy múgedekterge jáne 18 jasqa tolmaǵan qozǵalyp júrýi qıyn balalarǵa úılerine baryp, pallıatıvti kómek kórsetý ortalyǵyn uıymdastyrý» jobasyn usynǵan Kókshetaý qalasyndaǵy «Shans» múgedekterdi ońaltý ortalyǵy» qoǵamdyq birlestigin jeńimpaz dep tanydy. Endi bul ujym aldaǵy ýaqytta irikteýden ótse, Shymkent qalasynda ótetin respýblıkalyq kórmede oblys namysyn qorǵaıtyn bolady. Baqbergen AMALBEK, «Egemen Qazaqstan» Aqmola oblysy