Astrahandaǵy medıa-forýmǵa qatysýshylar Astanada ótetin EKSPO-2017 kórmesiniń mańyzyna erekshe yqylas tanytty
Ár eldiń ekonomıkalyq órkendeý joly ózgeshe. Saıası turaqtylyǵyn aıtpaǵanda, demokratııalyq talaptary árqıly bolatyny daýsyz. Osy oraıda, Astrahanda ekinshi márte ótip jatqan Kaspıı mańy elderindegi buqaralyq aqparat quraldary ókilderiniń medıa-forýmyna qatysýshylar tarapynan Qazaq eliniń ekonomıkalyq damý úderisine qyzyǵýshylyǵy anyq baıqaldy. Muny, ásirese, medıa-forýmǵa qatysýshylarǵa Astanada aldaǵy jyly ótkizilýi josparlanǵan EKSPO-2017 kórmesine daıyndyq barysy tanystyrylymynan ańǵardyq.
Búkil álem nazar aýdaryp otyrǵan kórmeni ótkizýge daıyndyq barysy, onyń negizgi taqyryby – jasyl ekonomıka týraly arnaıy beınerolıkke Kaspıı jaǵalaýyndaǵy bes eldiń 300-ge jýyq jýrnalısi erekshe yqylas tanytty. Olardyń bári de Qazaqstannyń qýatty qadamyna qyzyǵyp qaraıdy. Qazaqstan Respýblıkasynyń Prezıdenti Nursultan Nazarbaevtyń álemde bir-birimen arazdasqan elderdiń tatýlasýyna, sóıtip, ekonomıkalyq, iskerlik baılanysyn qaıta jalǵaýyna araaǵaıyndyq jasap, bitimgershilikti kózdegen maqsatyn qýattaıtynyna ekpin túsirdi.
– El men eldiń, halyq pen halyqtyń arasyndaǵy ózara syılastyqtyń burynǵydan da bekı túsýine buqaralyq aqparat quraldarynyń tıgizer paıdasy orasan zor, – dedi medıa-forým qatysýshylaryna sáttilik tilegen Qazaqstan Respýblıkasynyń konsýly Ashat Syzdyqov. – Sol sebepten, aqparattyq baılanystyń keńı túskeni jón.
Medıa-forýmda sóz alǵandardyń barlyǵy derlik aqparattyń shynaıy bolǵanyn qalaıdy. Máselen, Astrahan oblysynyń gýbernatory Aleksandr Jılkınniń pikirinshe, Kaspıı mańy elderiniń arasynda eshqashan dúrdarazdyq ta, kelispeýshilik te bolǵan emes. San ǵasyrlar teńiz jaǵalaýyndaǵy elder bir-birimen ekonomıkalyq damý turǵysynan qarym-qatynasyn baıyta tústi. Ata-babalarymyz salǵan dostyq, áriptestik baılanys búginde tek ekonomıkalyq qana emes, aqparattyq salada da qarqyn ala bastady.
Ázerbaıjan Respýblıkasynyń Baılanys jáne joǵary tehnologııalar mınıstriniń orynbasary Elmır Velızade, Iran Islam Respýblıkasynyń bas konsýly Alı Mohamadı, sonymen birge, «Neıtralnyı Týrkmenıstan» gazetiniń ókili Irına Imamkýlova, «Komsomolskaıa pravda» gazetiniń bas redaktory Vladımır Sýngorkın jáne «National Geographic Russia» jýrnalynyń ǵylymı redaktory Andreı Jýravlev Kaspıı mańy elderindegi jańalyqtar men problemalardyń BAQ-tarda kórinis tabýy ortaq aqparattyq keńistik qalyptastyrýǵa alǵyshart jasaıtynyna toqtaldy.
Al medıa-forým barysyndaǵy pikirtalasta belsendilik tanytqan BAQ ókilderi Kaspıı teńizindeı tuıyqtyq tanytqan joq. Bir-birimen áriptes bolýǵa, aqparatpen bólisýge qulshynyp turdy. Máselen, atalǵan medıa-forýmda Atyraý oblysynda tirkelgen ATPress.kz aqparattyq portalynyń tanystyrylymynan soń, onymen seriktestik baılanys ornatýǵa aldymen Ázerbaıjan men Qalmaqııadan kelgen áriptesterimiz yqylas bildirdi.
Sondaı-aq, «Kaspıı armany» taqyrybymen jarııalanǵan halyqaralyq konkýrstyń júldegerleri anyqtaldy. Olardyń arasynda Atyraýdaǵy «Prıkaspııskaıa kommýna» gazetiniń tilshisi Nadejda Shılman da boldy.
Joldasbek ShО́PEǴUL,
«Egemen Qazaqstan» –Astrahannan
(Reseı Federasııasy)
Sýretti túsirgen
Rahym QOILYBAEV
