Astanada ótip jatqan Jambyl oblysynyń aýylsharýashylyq jármeńkesinde tańqýraı men qurǵaq jemisterge halyqtyń suranysy joǵary bolyp tur, dep habarlaıdy Egemen-aqparat.
Jármeńkede satylyp jatqan aýylsharýashylyq ónimderiniń baǵasy mynandaı: jylqy etiniń kılosy – 1250, jaıa – 1400, qazy – 1500 teńge. Sondaı-aq jylan balyq, sazan, jaıyn sııaqty balyqtardyń kılosy 500 teńgeden satylýda. Taýyq etiniń kılosy – 550, al 10 tal jumyrtqa – 200 teńge. Kartop pen buryshtyń kılosy – 60, alma – 150, qaýyn – 60 teńge. Qymyzdyń lıtri – 400, al bal 1800 ben 2000 teńge aralyǵynda saýdalanyp jatyr.
Jármeńkege otbasymen kelgen Serik Muratálıev esimdi qala turǵyny keıbir taýarlardyń baǵasy qala basshylary kelip ketkennen keıin kóterilgenin aıtady.
«Ettiń baǵasy arzan ekenin kórip otyrmyn. Mysaly, jylqy eti bazardaǵydan 300 teńgege arzan. Kartop pen buryshtyń baǵasy qala ákimi júrgen kezde 40 teńge edi, al qazir 60 teńge bolyp ketken. Tańqýraı bir-aq jerde satylyp jatyr, ony alý úshin adamdar uzaq kezekte tur. Meniń kezegim jetkenshe ol 50 teńgege qymbattap ketipti», – deıdi qala turǵyny.
Tańqýraı jármeńkeniń syrtynda da satylyp jatyr. Biraq satýshylar onyń Bishkekten ákelingenin aıtady.
Budan bólek, Jambyl oblystyq fılarmonııasy jáne «Alataý» ansambli sııaqty óner ujymdary jármeńkege kelgen jurtqa ásem án men tátti kúı tartý etti.
Egemen-aqparat
