Vıtalıı Hýdıakov – Azııanyń eki dúrkin chempıony

Qazirgi kúnderi Vetnamnyń Dananga qalasynda ótip jatqan V Azııa jaǵajaı oıyndarynda qazaqstandyq sýda júzýshi Vıtalıı Hýdıakov eki dúrkin chempıon atanyp úlgerdi. Bizdiń jerlesimiz Oıyndardaǵy birinshi altyn medalin jarystyń úshinshi kúni, 23 qyrkúıekte ashyq teńizde 10 shaqyrymdyq qashyqtyqqa júzýde jeńip aldy. Bul úshin ol 2:02:07.2 nátıje kórsetti. Ekinshi oryn­ǵa qytaılyq Vang Venhao (2:04:55.9) kóterilse, úshinshi orynǵa sırııa­lyq Mohammad Saleh (2:06:20.4) jaı­ǵas­ty. Osy qashyqtyqta synǵa túsken qazaqstandyq kelesi sportshy – Kene­sary Kenenbaev 2:24:56.0 kórsetkishimen márege 10-shy bolyp keldi. – Búgin aýa raıy bizdi onshalyqty qýandyra qoımasa da, teńizdiń beti barynsha tynshyp jatyp, bári sátti aıaqtaldy. Álbette, men elim úshin altyn medal jeńip alǵanyma óte qýanyshtymyn. Bul jarysta mundaı júldelerdiń kóp bolatynyna sengim keledi, – dedi sý jańa chempıon júzip kelgennen keıin. Qazaqstandyq sańlaq ekinshi altyn medaline jeksenbi, 25 qyrkúıek kúni qol jetkizdi. Bul joly ol 5 shaqyrymǵa júzip jarysýda 58:03.3 nátıjesimen aldyna jan salmady. Ekinshi orynǵa Mohammed Saleh ornalassa, úshinshi oryn vetnamdyq Tran Tanǵa buıyrdy. Bizdiń Kenesary Kenenbaev besinshi orynǵa taban tiredi. Osy kúni qazaqstandyq 18 jasar sportshy Ksenııa Romanchýk ashyq teńiz­de 10 shaqyrymdyq qashyqtyqqa júzýde 2:14:20.0 kórsetkishimen qola medaldyń ıegeri atandy. Al alǵashqy eki oryndy qytaılyqtar Shın Shın (2:14:01.6) men Iаng Dandan (+13.2) jeńip aldy. Qazaqstan Ulttyq olımpııalyq komıtetiniń prezıdenti Tımýr Quly­baev eki sportshyny da osynaý aıtýly jeńisterimen quttyqtady. «Sizdiń 5 jáne 10 shaqyrymdyq qashyq­tyqtarda eshkimge des bermeı, jeńis tuǵyrynan kórinýińiz – jyldar boıǵy jattyǵýlar men maqsatqa jetýdegi tabandylyǵyńyzdyń aıqyn kórinisi», – dep atap kórsetti ol Vıtalıı Hýdıakovqa joldaǵan jedelhatynda. Al Ksenııa Romanchýkke básekelestiktiń óte joǵary bolǵanyna qaramastan, sol synaqtyń júgin qaıyspaı kóterip shyqqanyna alǵys bildiriledi.  Damır QOJAMQUL