Jeńip turyp jeńilip qaldy

  О́tken jeksenbide Astananyń «Barysy» Qurlyqtyq hokkeı lıgasy chempıonatynda Máskeýde jergilikti «Spartakpen» kúsh synasty. Onda elordalyqtar aıdyn ıelerine 4:5 esebimen ese jiberdi. Negizi esepti bizdiń jigitter ashqan bolatyn. Astanalyqtar 4-mınýtta Evgenıı Rymarevtiń kómegimen alǵa shyqty. Arada 3 mınýt ótkende, Brendon Bochenskı esepti eseledi. Bul eki shaıba da oıynshy basymdyǵy kezinde soǵyldy. Qarsylastarynan mundaı qarqyn kútpegen «Spartak» oıynshylary 9-mınýtta esep aıyrmasyn qysqartýǵa múmkindik tapty. Mergendigimen kózge túsken – Raıan Stoa. Alaıda, osy goldan keıin bar bolǵany 10 sekýnd óter-ótpesten Edýard Zankovestiń shákirtteri esepti 3:1-ge jetkizdi. Bul joly Naıdjel Doýstyń qanjyǵasy maılandy. Ekinshi kezeńniń basynda, ıaǵnı 22-mınýtta «Spartak» sapynan Lýkash Radıl nátıjeli soqqy jasap, komandasynyń ekinshi shaıbasyn soqty. Úziliske deıin bul esep ózgergen joq. Kezdesýdiń úshinshi bóligi máskeýlikter golymen bastaldy. Urymtal sátti utymdy paıdalanǵan Alekseı Kırıllov bolatyn. Oıynnyń 47-mınýtynda Doýs dýbldiń avtory atanyp, «Barys» kezekti ret alǵa shyqty. Degenmen, sońǵy sátke deıin shabýyldaǵan alań ıeleri taǵy eki shaıba soǵyp, jeńisti julyp áketti. Aldymen 54-mınýtta Stoa tarazy basyn teńestirse, 56-mınýtta Metıý Gılroı jeńiske jetkizdi. Osylaısha, bıylǵy maýsymda 10 kezdesý ótkizgen «Barys» jetinshi ret jeńildi. Ázirge bizdiń komanda Shyǵys konferensııasynda 14-orynda tur. Ol kelesi kezdesýin búgin Sochıde qala attas jergilikti komandamen ótkizedi. Elaman QOŃYR