1994
*10 mamyrda Qazaqstannyń tuńǵysh platınasynyń quımalary alyndy. Olar AQSh-tyń «Sabın metall korporeıshn» fırmasynyń zaýytynda Qazaqstan shıkizatynan balqytyldy. Alty quımanyń jalpy salmaǵy – 14 kılogramm.
* 23 mamyrda Prezıdent Nursultan Nazarbaev Tashkentte bolyp, Qazaqstannyń О́zbekstandaǵy kúnderiniń resmı ashylýyna qatysty.
Bul týraly «Egemen Qazaqstan» gazetiniń 26 mamyryndaǵy nómirinde «Tamyry tereń, taǵdyry ortaq» taqyrybymen maqala jarııalandy.
* 27 mamyrda Qazaqstan NATO-nyń «Beıbitshilik úshin seriktestik» baǵdarlamasyna qosyldy. Qazaqstan bul baǵdarlamanyń 19-múshe memleketine aınaldy.
* 1 shildede taǵy bir qazaq azamaty – Talǵat Musabaev ǵarysh kógine kóterildi.
* 6 shildede depýtattar Elbasy Nursultan Nazarbaevtyń baıandamasyn talqylaı kelip, Prezıdenttiń astanany Almatydan Aqmolaǵa kóshirý týraly usynysymen kelisti. Sonymen, Qazaqstan tarıhynda taǵy bir belesti kezeń bastaldy.
*8 shildede О́zbekstan Prezıdenti Islam Karımov pen Qyrǵyzstan Prezıdenti Asqar Aqaev joǵary dárejeli úshjaqty kezdesýge qatysý úshin Almatyǵa keldi. Úsh respýblıka basshylary qabyldaǵan birlesken málimdemede týysqan elderdi jaqyndastyrý úderisiniń jandanýy atap ótildi.
* 7 tamyzda Prezıdent Nursultan Nazarbaevtyń Reseıdiń Sankt-Peterbýrg qalasyna, Estonııa, Lıtva men Ýkraınaǵa saparlary bastaldy. Tamyzdyń 11-ine deıin ótken san túrli kezdesýler Qazaqstannyń ekonomıkasyna tıimdiligin kórsetti.
* 21-25 qyrkúıek aralyǵynda Prezıdent N.Á.Nazarbaevtyń Italııa Respýblıkasyna resmı sapary boldy. Sapar barysynda Nursultan Nazarbaev Italııa Premer-mınıstri S.Berlýskonımen kezdesti.
* 25-28 qyrkúıek aralyǵynda Prezıdent N.Á.Nazarbaev Saýd Arabııasyna resmı saparmen bardy. Elbasy Saýd Arabııasynyń Koroli Fahd Bın Abdel Azızben, Taq murageri Abdalla bın Abdel Azızben, Qorǵanys jáne avıasııa mınıstri prıns Sýltan bın Abdel Azızben kezdesti.
* 16-17 qazan kúnderi Prezıdent N.Á.Nazarbaev Túrkııaǵa resmı sapar jasady. Sapar aıasynda Ázerbaıjan, Qazaqstan, Qyrǵyzstan, О́zbekstan, Túrkııa, Túrikmenstan prezıdentteri Ystanbulda bas qosty.
* 21 qazanda Máskeýde TMD memleketteri basshylary keńesiniń kezekti májilisi ótti. Májilistiń kún tártibinde Memleketaralyq ekonomıkalyq komıtet qurý týraly másele qaraldy.
*23 qazanda Qazaqstannyń jańa ordenderi men medaldary alǵash ret tapsyryldy. Osy oraıda Elbasy jańa ordender men medaldar – bizdiń memlekettigimizdiń taǵy bir kórinisi ekendigin atap kórsetti. Sondaı-aq, Nursultan Nazarbaev Qazaqstannyń san mıllıondap esepteletin kópultty halqy arasynda nagrada týraly oılanyp jatpastan óz tájirıbesi men sheberligin, talanty men shabytyn Otan ıgiligine rııasyz jumsaıtyn adamdar kóp ekendigin, Qazaqstannyń erteńgi kúniniń jarqyn bolatyndyǵynyń kepili – san myńdaǵan jany jaısań otandastarymyzdyń eren eńbegi men jan jylýy ekenin jetkizdi..
* 4 qarashada «Soıýz TM-19» ǵarysh kemesiniń quldılaý apparaty Qazaqstan topyraǵyna, Arqalyq qalasyna taıaý jerge jaılap kelip qondy. Ekinshi qazaq ǵaryshkeri Talǵat Musabaev pen onyń ǵaryshta birge bolǵan seriktesterin jumys babyndaǵy saparmen sol óńirge barǵan Prezıdent Nursultan Nazarbaev ystyq yqylaspen quttyqtady.
*1 jeltoqsanda Prezıdent N.Á.Nazarbaev elimizge resmı saparmen kelgen Mońǵolııa Prezıdenti P.Jasraıdy qabyldady.
* 5 jeltoqsanda Eýropadaǵy qaýipsizdik pen yntymaqtastyq jónindegi keńestiń Býdapeshtegi joǵary dárejeli kezdesýinde Reseıdiń, AQSh-tyń jáne Ulybrıtanııanyń basshylary Ýkraına, Belarýs jáne Qazaqstan qaýipsizdiginiń kepildikteri týraly memorandýmǵa qol qoıdy. Nursultan Nazarbaev: «Qazaqstan ıadrolyq qarýdy jáne ony jetkizý quraldaryn joıý isinde AQSh-pen jáne basqa eldermen yntymaqtasýǵa úmit artady», dedi.
* 14 jeltoqsanda Almatydaǵy Respýblıka saraıynda Turar Rysqulovtyń, Sultanbek Qojanovtyń, Sáken Seıfýllınniń, Ilııas Jansúgirovtiń, Beıimbet Maılınniń týǵanyna 100 jyl tolýyna arnalǵan tarıhı kesh bolyp ótti. Halqymyzdyń aıaýly bes perzentiniń ómiri men qyzmeti týraly Prezıdent Nursultan Nazarbaev baıandama jasady.
* 18 jeltoqsanda Prezıdent N.Á.Nazarbaev Almatyǵa kelgen Latvııa Prezıdenti Gýntıs Ýlmanıspen kezdesti.
* 21 jeltoqsanda El gazeti «Egemen Qazaqstannyń» 75 jyldyq mereıtoıyna oraı Prezıdent Nursultan Nazarbaev gazet qyzmetkerlerimen, oblystardaǵy tilshilermen júzdesip, ashyq-jarqyn áńgime ótkizdi. Prezıdent ulttyń bas basylymynyń jýrnalısterine «Sizder Elbasynyń eldegi qulaǵy men kózisizder» dep baǵa berip, amanat júgin arqalatty.
Bul týraly «Egemen Qazaqstan» gazetiniń 27 jeltoqsan kúngi nómirinde «Sizder – Elbasynyń eldegi qulaǵy men kózisizder» taqyrybymen maqala jarııalandy.
* 31 jeltoqsanda Prezıdent N.Á.Nazarbaevtyń Qazaqstan halqyna jańajyldyq Úndeýi jarııalandy. «Osy jyl bizdiń qazaqstandyqtar úshin eldigi men erligin tanytqan jyl boldy. Respýblıka halqy ınflıasııanyń ashy dámin tatyp, qıyn shaqtardy bastan keshirdi. Osyndaı kúrdeli jaǵdaıǵa qaramastan bizdiń adamdardyń boıynda tamasha qasıetter qalyptasa bastady: ótpeli kezeńniń bolmaı qoımaıtyn aýyrtpalyqtaryna túsinistikpen qarady, eń bastysy – árkimniń kókiregine bolashaqqa, qalap alǵan baǵytymyzǵa degen senim uıalady», dedi Elbasy.
