«Balapannyń» kórermenge tartýy

«Han Shatyr» saýda, oıyn-saýyq ortalyǵynda «Balapan» telearnasynyń alty jyldyq belesine oraı balalarǵa arnalǵan merekelik shara ótti. «Balapan» telearnasyna týra alty jyl  tolyp otyr. Otandyq jalǵyz bala­lar arnasynyń osy jyldarda kish­ken­taı kórermender kóńiline jol tap­qany anyq. Ata-ájelerine serıal kór­set­peı, «Balapanǵa qoıamyn» dep pýlt­ke tala­satyn botaqandar sonyń aıǵaǵy. Bizdiń árqaısymyzdyń balapandarymyz telearna usynyp júrgen «Álı men Aııa», «Sálem, Astana!», «Kójekter», «Danyshpan qarǵa» syndy otandyq mýlthıkaıalardy jaqsy kóredi. Telearnanyń «Alǵyr altaý», «Oılan, tap!», «1000 túrli suraq» baǵdarlamalary da balalardyń oılaý kókjıegin keńeıtedi, shapshańdyqqa baýlıdy dep esepteımiz. «Balapannyń» týǵan kúnine oraı uıymdastyrylǵan merekelik shara «Han Shatyr» saýda oıyn-saýyq ortalyǵynda ótti. Merekelik sharanyń alǵashqy bóliminde búldirshinder «Sálem, Astana!» mýlthıkaıasynyń ánin oryndap, saıys­qa tústi. Temir tulpardy tizgindegen 6 bal­ǵyn shabandozdyq qabiletterin synap kórdi. Odan soń «Oılan, tap!» baǵdarla­masynyń júrgizýshisi Rıza Danııar saıqy­­mazaq beınesine kirip, kishkentaı kórer­menderge merekelik kóńil kúı syılady. Baldyrǵandar sırkten ákelingen maı­myl­dyń da ónerine tánti boldy. Merekelik shara barysynda «Bala­pannyń» úzdik kórermenin anyq­taý maq­satynda úlken ekran arqyly keıip­ker­lerdi tabý tapsyryldy. Keıip­kerler ishinde «Kójekter» mýlt­hıkaıasyn­daǵy Úrkek, «Djýnglı kitabyn­daǵy» Balý, «Aıjul­dyzdaǵy» Tóre men Zere, Álı men Aııa, Maııalar balalarǵa jasyryldy. «Balapannyń» kishkentaı kórer­menderge daıyndaǵan tartýynyń biri –lotereıa oıyny. Bul tek balaqaılar úshin emes, ata-analar úshin de qyzyqty oıyn boldy. «Balapandy» týǵan kúnimen quttyqtaýǵa kelgen «Nursáýlemaı-Erketaı», «Qaraqat» stýdııasynyń baldyrǵandary jıylǵan kópshilikke ónerlerin tartý etti. Aıta keteıik, merekelik sharada sıqyr­shylar óner kórsetti. Sharany barlyq balalar tikeleı efır arqyly tamashalady. Sondaı-aq, almatylyq balaqaılar tikeleı efır arqyly «Balapanǵa» tátti tilekterin arnady. Merekelik shara «Balapannyń» ánuranymen qorytyndylandy. Aıgúl SEIILOVA,                «Egemen Qazaqstan» Sýretti túsirgen Erlan OMAROV, «Egemen Qazaqstan»