Qazaqstanda ishki týrızm jyl basynan beri 6 paıyzǵa ósti

Almaty, Alakól, Buqtyrma, Býrabaı burynǵydaı tanymal baǵyttar bolyp esepteledi, dep málimdedi Investısııalar jáne damý mınıstri Jeńis Qasymbek Ortalyq kommýnıkasııalar qyzmetinde ótken baspasóz konferensııasynda. «Týrızmdi damytý týrızm salasyn damytýdyń 2020 jylǵa deıingi Tujyrymdamasyna sáıkes júrip jatyr. 20 ekonomıkalyq damyǵan elder úshin búgin vızasyz rejım jumys jasaıdy, negizinen bul bizdiń iri ınvestorlarymyz. 2017 jyldyń qańtarynan bastap Ekonomıkalyq yntymaqtastyq jáne damý uıymy (EYDU) elderi men 14 ekonomıkalyq damyǵan jáne saıası turaqty memleketter úshin vızasyz rejım engiziledi. Barlyǵy – 48 memleket. Bul Qazaqstandaǵy elge kelýshiler týrızmine jańa serpin beredi», dedi J.Qasymbek. Mınıstrdiń aıtýynsha, sońǵy eki-úsh jylda Reseı, Germanııa, Nıderlandy jáne Ulybrıtanııadan kelgen týrıster sany artyp otyr. «Ishki týrızmniń ósimi baıqalýda. Birinshi jartyjyldyqta ósim ótken jyldyń sáıkes kezeńimen salystyrǵanda shamamen 6 paıyzdy qurady. Burynǵydaı Býrabaı, Almaty, Alakól jáne Buqtyrma halyq kóp baratyn negizgi baǵyttar bolyp otyr. Osyǵan baılanysty biz bul baǵyttardaǵy ınfraqurylymdardy salý boıynsha josparlardy retteımiz. Qonaq úıler sany artyp keledi. Eger 10 jyl buryn Qazaqstanda barlyǵy 871 qonaq úı bolsa, búgin olardyń sany 2 445. Qyzmet kórsetý kólemi 2015 jyldyń qorytyndysy boıynsha 73 mlrd teńgeni qurady», dedi J. Qasymbek. Egemen-aqparat