Prezıdent Sıngapýrdyń Parlament múshesimen kezdesti

Memleket basshysy Sıngapýrdyń Qurmetti aǵa mınıstri, Parlament múshesi Go Chok Tongpen kezdesti. Bul týraly Aqordanyń baspasóz qyzmetine silteme jasaǵan Egemen-aqparat habarlady. Kezdesýde ekonomıkanyń túrli salalaryndaǵy ekijaqty yntymaqtastyq máseleleri jan-jaqty talqylandy. Elbasy Sıngapýrdyń ınnovasııa, tehnologııa jáne qarjy salalaryndaǵy tájirıbesi asa baǵaly ekenin atap ótti. – Táýelsizdiktiń 25 jylynda biz Sıngapýrmen tyǵyz qarym-qatynas júrgizip kelemiz jáne sizderdiń elderińizdi árdaıym ózindik baǵdar retinde baǵalaımyz. Sıngapýr qala-memleket ekenine qaramastan, álemniń kóptegen elderi úshin damýdyń tıimdi úlgisi bola bildi. Bizdiń memleket qurýdaǵy joldarymyz kóp jaǵdaıda uqsas. Osyǵan baılanysty túrli baǵdarlamalar men strategııalar ázirleý jáne iske asyrý barysynda sizdiń eldiń tájirıbesin muqııat zerdelep otyramyz, – dedi Qazaqstan Prezıdenti. Go Chok Tong Qazaqstanǵa shaqyrǵany jáne kórsetken qonaqjaılylyǵy úshin Nursultan Nazarbaevqa alǵys bildirdi. – Men sizdiń elde alǵash ret bolyp otyrmyn jáne onyń damý qarqynyna tántimin. Elderimizdiń arasynda tyǵyz seriktestik baılanys ornaǵanyna qýanyshtymyn. Qazir Qazaqstan men Sıngapýr arasyndaǵy yntymaqtastyqtyń barlyq basty baǵyttary aıqyndalǵan, – dedi Go Chok Tong. Sońynda Elbasy men Go Chok Tong elderimiz arasyndaǵy ekijaqty qarym-qatynastyń odan ári nyǵaıa beretinine senim bildirdi. Egemen-aqparat