Kóshbasshy qaıratkerge – jańa kózqaras

Qazaq ult-azattyq qozǵa­lysynyń jetekshisi, Alash­orda avtonomııalyq úkime­tiniń tóraǵasy  Álıhan Bókeı­hanovtyń 150 jyldyǵyn IýNESKO kóleminde atap ótý sha­ralarynyń aıasynda Abaı atyn­daǵy Qazaq ulttyq pedagogı­kalyq ýnıver­sıteti men Qa­zaqstan tarıh­shy­lary qaýym­dastyǵy­nyń uıymdastyrýy­men «Eýra­zııanyń túrki jáne musylman halyqtarynyń saıası kósh­bas­shylary: tulǵalar, ıdeıalar, taǵdyrlar. HH ǵasyrdyń basy» atty halyqaralyq ǵy­lymı-tájirıbelik konferensııa ótti. Jıynda qazaqtyń azattyǵy jolynda ter tógip, egemendik úshin eńbek sińirgen, alǵashqy ulttyq ıdeologııanyń negizin qalaǵan qaıratkerdiń saıası kelbeti týraly belgili tarıhshylar baıandama jasap, Alash ıdeıasyn bıik ustaıtyn ta­nymal tulǵalar sóz aldy. Konferensııa qatysý­shy­lary Á.Bókeıhanovtyń ult tarı­hyndaǵy ornyn, qoǵam qaıratkeri, Ult-azattyq qoz­­ǵa­­lysynyń jetekshisi re­tin­­degi qyzmetin búgingi kóz­qaras jáne metodologııalyq us­­ta­­nym turǵysynan qorytý máse­­­lelerin talqylady. Tarıh ǵyly­mynyń doktory, profes­sor M.Qoıgeldıev barlyq ult­shyl­dardyń kóshbasshysy bol­ǵan qaıratkerdiń qazaq ultyna qajet reforma úshin kúresi týraly aıta kelip, qazaq ulttyq ıdeıasynyń maqsatyna jete al­maý sebebi men Alash qozǵa­lysynyń jeńilý sebep­teri­ne toqtalsa, «Egemen Qazaq­stan» respýblıkalyq gazeti» AQ Basqarma tóraǵasy, profes­sor Darhan Qydyráli Álı­han Bókeıhanovtyń túrki ha­lyq­tarymen baılanysy jáne túrki álemi ıdeıasynyń tutas­tyǵy týraly áńgime­ledi. Ulttyq bolmysty joıý­ǵa um­tylǵan saıası júıeniń mádenı muramyzdy talqandaý maq­satymen tutas ultty qaırat­ker­lerinen, iskerlerinen, rýhanı jetekshilerinen, bilimdi­leri­nen aıyrǵan ozbyr saıasatyna qaıratker tulǵanyń qar­sy­lyǵy Memlekettik qyzmet salasyndaǵy Astana О́ńir­lik ha­bynyń basqarýshy ko­m­ı­teti tóra­ǵasy Álıhan Baı­me­novtiń oıymen tarqatyldy. Al Qorǵanys mınıstr­liginiń Áskerı-tarıhı mýzeıi­niń ǵylymı qyzmetkeri, saıa­sattanýshy Berik Ábdiǵalı «Á.Bókeıhanov pen Alash áskeri» máselesin sóz ete turyp, Alash ıdeıasynyń jeńi­lis tabýynyń taǵy bir sebebin birneshe ret úndeý jasalsa da, múddeles odaqtastyń, qara­jat pen mamannyń bolmaýynan atoı sala almaǵan Alash úkimetiniń áskerimen baılanys­tyryp, kópshilikke beımálim bolyp kelgen alashordanyń áskeri jaıly muraǵattardan tabylǵan tyń derektermen bólisti. Professor Kóshim Esma­ǵan­betov qaıratkerdiń ǵyly­mı muralaryn sóz etip,  jańa­dan tabylǵan 40-qa jýyq eńbe­giniń kóptomdyq jınaqqa enbeı qalýyna qynjylys tanyt­ty. J.Balasaǵun atyn­daǵy Qyrǵyz ulttyq ýnıver­sı­tetiniń professory Asqarbek Bedelbaev pen Ishanaly Ara­baev atyndaǵy Qyrǵyz memle­kettik ýnıversıtetiniń dosenti Jumaǵul Baıdildeev Álıhan Bókeıhanovtyń qyrǵyz zııalylarymen baılanysyn tarıhı derektermen sabaqtastyra otyryp áńgimeledi. Konferensııanyń ekinshi bólimi Alashqa aıanbaı qyzmet etip kele jatqan abyroıly ǵalym, álıhantaný isine zor eńbek sińirgen professor Mámbet Qoıgeldıevtiń 70 jyl­dyq mereıtoıyna arnalyp, aıtýly ǵalymnyń ǵyly­mı qyzmeti men azamattyq kel­­betine baǵa bergen quttyq­taýlar joldandy. Aıgúl Ahanbaıqyzy, «Egemen Qazaqstan»