«Meksıka-Qazaqstan» parlamenttik dostastyq toby quryldy

Meksıka Qurama Shtattarynyń depýtattar Kongresinde Qazaqstannyń Meksıkadaǵy elshiliginiń bastamasymen «Meksıka-Qazaqstan» parlamenttik dostastyq toby quryldy. Bul týraly Syrtqy ister mınıstrliginiń baspasóz qyzmeti habarlady. 2016 jylǵy 29 qyrkúıekte Qazaqstannyń Meksıkadaǵy elshisi Andrıan Elemesov pen elshilik dıplomattarynyń qatysýymen atalǵan topty qurýdyń resmı rásimi bolyp ótti. Is-sharaǵa sondaı-aq Kongress depýtattary - «Meksıka-Qazaqstan» tobynyń músheleri, Meksıka Syrtqy ister mınıstrliginiń jáne buqaralyq aqparat quraldarynyń ókilderi qatysty. Saltanatty rásimdi ashqan Meksıka parlamenti tómengi palatasynyń depýtaty Hose Refýhıo Sandoval Rodrıges Qazaqstandy «Ortalyq Azııada eń damyǵan memleketterdiń biri jáne álemdegi eń tartymdy ınvestısııalyq ortalyqtardyń biri» dep atady. «Qazaqstannyń strategııasy halyqtyń ál-aýqatynyń negizin qalaıtyn jáne eldiń ındýstrııaldyq damý bazasyna yqpal jasaıtyn bıznes-klımat pen saıası turaqtylyqty damytýǵa baǵyttalǵan. Qazirgi ýaqytta memleketterimizdiń aldynda yntymaqtastyqty damytý úshin úlken múmkindikter turǵanyna baılanysty, Meksıka parlamenti tómengi palatasynyń depýtattary ekijaqty qatynastardy odan ári damytýǵa jaǵdaı jasaıtyn qazaqstan-meksıkandyq dostastyq tobyn qurý týraly sheshim qabyldady», dedi ol. Elshi A.Elemesov óz kezeginde Qazaqstan Respýblıkasynyń basty jetistikteri, elimizdiń halyqaralyq qatynastardaǵy róli, beıbitshilikti saqtaý men qarýsyzdanýdaǵy negizgi bastamalary, sondaı-aq Qazaqstannyń ınvestısııalyq klımatty jaqsartý baǵytynda qolǵa alyp jatqan sharalary týraly baıandap, ekijaqty ekonomıkalyq yntymaqtastyqtyń keleshegin aıqyndady. Is-sharanyń sońynda «Meksıka-Qazaqstan» parlamenttik tobynyń resmı qurylǵany týraly jarııalanyp, ony rastaý retinde taraptar Quryltaı aktisine qol qoıdy. A.Elemesov sondaı-aq Meksıka parlamentiniń qurmetti qonaqtarynyń kitabyna estelik jazba qaldyrdy. Egemen-aqparat