«Qazǵarysh» mektebiniń qýanyshy

Mektep – bilim men tárbıeniń kıeli de qasıetti mekeni. Al bilim uıasynyń tiregi – muǵalim ekeni belgili. Búgingi kúni bilim berý júıesinde bolyp jatqan ózgerister óte ózekti. Onyń bastysy bilim sapasyn kóterýde bolyp tur. Bul is ujymnyń is-tájirıbesindegi bereke-birlikke táýeldi ekeni anyq. Osyndaı jumystardy atqarýda elordadaǵy Raıymbek batyr atyndaǵy №50 «Qazǵarysh» mektep-lıseıi ózindik jetistikterimen kózge túsip, bıik talap deńgeıinen kórinip keledi. Astana qalasynyń ákimi «Eń úzdik mektep» báıgesin jarııalaǵan edi. Ol el Táýelsizdiginiń 25 jyldyǵyna arnalǵanyn eske sala ketsek deımiz. Onda ár bilim uıasy óziniń jyl boıǵy atqarǵan jumystaryn saralaı kelip, úzdik jobalaryn usynýǵa tıis bolatyn. Sonyń jaqynda qorytyndysy shyǵyp, atalmysh mektep «Eń úzdik mektep» grantyn jeńip aldy. – Biz bilim berýmen birge, tárbıeni de soǵan ushtas júrgizip otyrmyz. Ata-ana – bala – ustaz – osy úshtikti myqty qolǵa alǵan jerde oqý sapasy artyp, tárbıe tálimdi bolary haq. Sodan da bolý kerek, ótken oqý jylyndaǵy jetistikterimiz úzdikter qataryna qosty. Al jańa oqý jylynda alǵa qoıǵan mindet-maqsat ta jetip artylady. Muǵalimderimiz oqýshylardyń bilimin shyńdaýmen qosa, egemen eline, qasıetti Otanyna degen olardyń patrıottyq sezimin oıatyp, táýelsizdiktiń qadir-qasıetin boılaryna sińirip, oılaryna darytý maqsatynda qyrýar jumystar atqarý ústinde. Bizdiń ujym músheleri egemen elimizdiń shırek ǵasyrlyq merekesine joǵary bilim sapasymen óz úlesterin qosýdy maqsat etip otyr. Onyń ústine, elordadaǵy «Eń úzdik mektep» grantyn jeńip alý senimin odan ári jalǵastyryp, osy bıikti ósire berý nıetindemiz, – deıdi mektep dırektory Roza Bolataeva. «Egemen-aqparat»