Orman úshin arnaıy baǵdarlama qajetsiz

Ústimizdegi jyldyń maýsym aıynda Májilis depýtattary Sáken Qanybekov pen Ýálıhan Qaınazarov Úkimet basshysyna saýal joldap, tómendegi jaıttardy jetkizgen edi. Qazaqstan bıologııalyq alýan túrliligi men landshaftardyń baılyǵy jóninen kórshiles Ortalyq Azııa res­pýblıkalarynan edáýir alda tur. Solaı bola tura, Qa­zaqstan ormany az memleketter qa­taryna jatady. Ormandar respýblı­ka aýma­ǵynyń tórt paıyzdan joǵary ǵana bóli­gin kómkergen jáne de bul kórsetkishke sek­seýil ekpeleriniń arqasynda ǵana qol jetip, olar orman alqaptarynyń teń jartysyna jýyǵyn alyp jatyr. Respýblıka aýmaǵynyń aýqymdy bóligindegi klı­ma­tynyń kúrt qubylmalyǵy qalyń orman ósýine kedergi bolyp, bul ormandardy molyqtyrýdy qıyndata túsedi. Búgingi tańda orman sektoryn damytý basymdyqtarynyń biri bolyp tabylatyn – ormandardy qalpyna keltirý ju­mystary báseńsip, salanyń dáıekti damýy­na kedergi bolyp otyrǵanyn atap ótý kerek. Eldiń orman resýrstaryn saq­taý jáne utymdy paıdalaný máseleleri bo­ıynsha uzaq merzimdi baǵdarlamanyń bolmaýy – orman salasynyń problemalaryn sheshý jónindegi memlekettik organ­dardyń kúsh-jigerin júıesiz jáne bere­kesiz sıpat­qa alyp kelip otyr. Jergilikti atqarýshy organdar tarapynan da jasyl aımaqtardy damytýǵa tıisti dárejede kóńil bólinbeıdi. Memlekettik «Qalalardyń jasyl aımaq­tarynyń quramy jáne mólsheri» atty stan­dartyna sáıkes, jasyl aımaqtar kólemi – 326 myń ga bolýy tıis. Alaıda, respýb­lı­kalyq mańyzy bar qalalar men oblys ortalyqtarynyń jasyl aımaqtary­nyń kólemi – 111 myń gektardan aspaıdy. Odan ári depýtattar ormandardy saqtaý, aǵash kesý jumystaryn shektemeý jáne t.b. orman qorynyń azyp-tozýyna soqtyryp otyrǵanyn birneshe mysaldarmen aıtady. Sondaı-aq, orman qorǵaý qyzmetkerleri jalaqysynyń tómendigin, áleýmettik jaǵynan qorǵalmaýyn da tilge tıek etedi. Osynyń bárin aıta kelip depýtattar «orman sharýashylyǵy eko­nomıkasynyń ornyqty damýy úshin jáne salada qordalanyp qalǵan problemalyq máselelerdi sheshý úshin strategııalyq qujat qabyldaý» qajettigin jazady. Depýtattardyń máseleni uzaq zerttep, jan-jaqty tolǵanyp jazǵan saýaldaryna Úkimetten qysqasha ǵana jaýap keldi. Onda ormandy saqtaý jáne ony utymdy paıdalaný máseleleri boıynsha uzaq merzimdi strategııalyq qujat, ıaǵnı baǵdarlama qabyldaý múmkin emes delingen. О́ıtkeni, delinipti jaýapta: «100 naqty qadam» – Ult josparynyń 92-qadamynda memlekettik baǵdarlamalar sanyn qysqartý jáne salalyq baǵdarlamalardy jabý kózdelgen. Osyǵan baılanysty memlekettik jáne úkimettik baǵdarlamalardy ońtaılandyrý barysynda orman sharýashylyǵyn damytý máseleleri Aýyl sharýashylyǵy mınıstrliginiń Strategııalyq josparyna jáne jergilikti atqarýshy organdardyń aýmaqtardy damytý baǵdarlamasyna biriktirilgen. Sóıtip, artyq baǵdarlama qabyldan­baı­tyndyqtan, depýtattar orman sharýa­shylyǵyn damytý máselesin Aýyl sharýa­shylyǵy mınıstrligi men jergilikti atqa­rýshy organdardan ǵana suraıtyn bolypty. Ázirlegen Jaqsybaı SAMRAT, «Egemen Qazaqstan»