Memlekettik buqaralyq aqparat quraldary taıaý keleshekte kórermen men oqyrman kóńilinen shyǵatyn bolady. Bul týraly búgin QR Aqparat jáne kommýnıkasııalar mınıstrliginiń alqa otyrysynda vedomstvo basshysy Dáýren Abaev aıtty, dep habarlaıdy QazAqparat.
«Qazirgi ýaqytta «Kazakh TV» men «Bilim jáne mádenıet» telearnalaryn «Kazakh TV» logotıpi aıasynda biriktirý júzege asyrylýda. Telearnanyń tusaýkeseri taıaý ýaqytta ótedi. «Habar 24» telearnasynyń taralym sebeti barynsha ózgerdi, jańalyqtar kontenti qysqartyldy jáne aqparattyq-saraptamalyq ári kórkem baǵdarlamalar óndirisi arttyryldy. Dál osyndaı jumystar barlyq memlekettik telearnalarda, sonymen birge bizdiń gazetterde de júrgiziletin bolady. Biz munyń júıeli prosess ekendigin jáne eshkim de bir sáttegi nátıjege ýáde bermeıtindigin túsinýge tıispiz. Biz qysqa merzimdi keleshekte memlekettik BAQ-tar kórermen men oqyrman iltıpaty reıtınginde barynsha joǵary pozısııaǵa shyǵaryna senimdimiz», - dedi ol.
Sonymen qatar Abaev qazirgi ýaqytta mınıstrlik memlekettik aqparat saıasatyna qatysty jańa ádisterdi júzege asyrýǵa baǵyttalǵan jumystardyń júrgizilip jatqanyn eske saldy. Bul baǵytta Aqparattyq jumys strategııasy ázirlengen. Onda kontent qalyptastyrýdyń eki basty parametri bar.
«Ol qoǵamnyń rýhanı tiregin nyǵaıtýǵa, otbasy qundylyqtaryn, bilim, otansúıgishtik jáne «Máńgilik el» patrıottyq aktisinde belgilengen basqa da qundylyqtardy ilgeriletýge baǵyttalǵan «Qundylyqtar kartasy». Ekinshisi - azamattarǵa salalyq baǵdarlamalar týraly aqparat berýge baǵyttalǵan «Memlekettik PR-strategııa». Bul eń aldymen «100 naqty qadam» ult josparyna qatysty. 2017 jyldan biz biryńǵaı respýblıkalyq jáne 16 óńirlik medıa josparǵa kóshýdi josparlaýdamyz. Mysal úshin aıta keteıin, qazirgi ýaqytta bizdiń aqparattyq pýlymyz 58 medıa jospar boıynsha jumys isteıdi. Olardy júzege asyrý algorıtimi ortalyq memlekettik organdar men ulttyq kompanııalardyń aqparattyq jumystary erejesinde bekitiletin bolady», - dedi Abaev.
Ol aqparttandyrý salasy boıynsha respýblıkalyq bıýdjetke salmaq salmaı, kvazımemlekettik sektorlar, jeke ınvestorlar qarjylandyrýdy kózdeıtin «Sıfrlyq Qazaqstan» memlekettik baǵdarlamasynyń jobasy ázirlengenin aıtty. Bul qadam basqa da áleýmettik mańyzdy jobalarǵa baǵyttaýǵa bolatyn memleket qarajatyn únemdeýge múmkindik beredi. Osyǵan oraı, «Sıfrlyq Qazaqstan» baǵdarlamasy sheńberinde iske asyrýǵa josparlanǵan jobalar úshin ınvestısııalar tartý qamtamasyz etilmek.
Mınıstrlik qyzmetiniń negizgi baǵyttarynyń biri memlekettik qyzmetterdi ońtaılandyrý men «Elektrondyq úkimetti» damytý bolsa, bul salada da talaı is atqarylyp jatyr dedi Dáýren Abaev. Prezıdenttiń tapsyrmasymen, 4 memlekettik kásiporyndy biriktirý nátıjesinde Memlekettik korporasııa quryldy. Ol 1 qazanǵa deıin 29 mıllıon qyzmet kórsetti. Búgingi kúni memlekettik qyzmetter tizbesinde 739 qyzmet túri bolsa, solardyń 530-yn elektrondyq úkimet portaly nemese Memlekettik korporasııa arqyly alýǵa bolady. Jalpy, bul sharalar memlekettik aqparattyq saıasatty barlyq deńgeıde tıimdi júrgizýge múmkindik berýde» dedi Dáýren Abaev.
Láıla Edilqyzy
