1999
* 15 qyrkúıekte Prezıdent Nursultan Nazarbaev tuńǵysh resmı saparmen Bolgarııaǵa bardy. Bolgarııa Prezıdenti P.Stoıanov pen Qazaqstan basshysy dostyq qarym-qatynastar men yntymaqtastyqty odan ári damytý jónindegi deklarasııaǵa qol qoıdy.
* 17 qyrkúıekte Qazaqstan Prezıdenti Nursultan Nazarbaev resmı saparmen Ýkraınaǵa bardy. Prezıdent L.Kýchmamen júrgizilgen kelissózdiń negizgi qorytyndysy – eki eldiń 2009 jylǵa deıingi yntymaqtastyǵy týraly shartqa qol qoıylǵany boldy.
* 23 qyrkúıekte elimizge Reseı Premer-mınıstri V.Pýtın resmı saparmen keldi. Jýrnalıstermen suhbat barysynda V.Pýtın «Qazaqstan-Reseı arasyndaǵy qarym-qatynas jýyrda bolǵan raketa apatynan shıelenisip ketken joq pa?» degen saýalǵa naqty jaýap berdi. «Bul rette Qazaqstan jaǵy óte qarymdy áreketter jasap, ózderiniń ulttyq múddelerin tastúıin qorǵaı bildi», – dedi ol.
* 29 qyrkúıekte Astanada Qazaqstan, Qyrǵyzstan, Tájikstan jáne О́zbekstan mádenıeti men ǵylymy qaıratkerleriniń halyqaralyq kezdesýi ótti. Kezdesýde Prezıdent N.Nazarbaev sóz sóıledi. Elbasy sózi «Egemen Qazaqstan» gazetiniń 1 qazan kúngi nómirinde «Jańa myńjyldyqta da jubymyz jazylmaıdy» taqyrybymen jaryq kórdi.
* 5 qazanda Prezıdent N.Á.Nazarbaev Iranǵa resmı saparmen bardy. Ekijaqty kelissózder nátıjesinde Qazaqstan men Iran arasyndaǵy ózara qarym-qatynas týraly deklarasııaǵa, sondaı-aq, Qazaqstan-Iran úkimetaralyq 5 mańyzdy hattamaǵa qol qoıyldy.
* 12 qazanda Prezıdent Jarlyǵymen Qasym-Jomart Toqaev Qazaqstan Premer-Mınıstri bolyp taǵaıyndaldy.
* 26 qazanda Máskeýde Keden odaǵyna qatysýshy elderdiń memleketaralyq keńesiniń májilisi ótti. Onda Keden odaǵy jáne Birtutas ekonomıkalyq keńistik týraly Máskeý deklarasııasyna qol qoıyldy. Basqosýda Qazaqstan Prezıdenti Nursultan Nazarbaevqa «Altyn Atlant» halyqaralyq tehnologııalyq syılyǵy tabys etildi.
* 29 qazanda Qazaqstanǵa Polsha Prezıdenti A.Kvasnevskıdiń alǵashqy resmı sapary boldy. Kelissóz barysynda eki eldiń ekonomıkalyq qatynastaryna baılanysty mańyzdy máseleler qozǵaldy.
*1 qarashada Almatyda A.S.Pýshkınniń 200 jyldyǵyna oraı aqynnyń eskertkishi qoıyldy. Saltanatty rásimde Prezıdent Nursultan Nazarbaev sóz sóıledi.
* 3 qarashada Belarýs Prezıdenti Aleksandr Lýkashenko Qazaqstan astanasyna resmı saparmen keldi. Sapar aıasynda eki el arasyndaǵy yntymaqtastyqtyń 1999-2008 jyldardaǵy kezeńge baǵdarlanǵan Sharty bekitildi.
*5 qarashada Kókshetaý qalasynyń bas alańynda qazaqtyń uly hany Abylaı hanǵa eskertkish ashyldy. Saltanatty rásimge Elbasy qatysyp, sóz sóıledi. Bul týraly «Egemen Qazaqstan» gazetiniń 6 qarasha kúngi sanynda «Abylaı rýhy eline qaıta oraldy» taqyrybymen maqala jarııalandy.
* 18 qarashada Elbasy Nursultan Nazarbaev Ystanbulda ótken Eýropadaǵy qaýipsizdik pen yntymaqtastyq uıymynyń basqosýyna qatysty. Sammıt barysynda Qazaqstan Prezıdenti memleketter men úkimetter basshylarymen 26 kezdesý ótkizdi.
*22 qarashada Nursultan Nazarbaev resmı saparmen Mońǵolııaǵa bardy. Prezıdentter N.Nazarbaev pen N.Bagabandı ózara baılanystardy odan ári damytýdy, eki eldiń qarym-qatynasyn teń quqyly negizde órkendetýdi maqsat etetin Birlesken málimdemeni bekitti.
*23-27 qarasha aralyǵynda Qazaqstan Prezıdenti Nursultan Nazarbaevtyń Qytaı Halyq Respýblıkasyna resmı sapary ótti. QHR Tóraǵasy Szıan Szemınmen kelissózdiń nátıjesinde 4 qujatqa qol qoıyldy.
* 1 jeltoqsanda elimizdiń ekinshi saılanǵan qos palataly Parlamenti óz jumysyn bastady.
*6-8 jeltoqsan aralyǵynda Prezıdent Nursultan Nazarbaevtyń Japonııaǵa resmı sapary boldy. Nursultan Nazarbaev pen Japonııa Premer-mınıstri Keıdzo Obýtıdiń kelissózi nátıjesinde ózara strategııalyq áriptestik týraly Birlesken málimdemege qol qoıyldy.
* 16 jeltoqsanda Prezıdent N.Á.Nazarbaev Nıý-Iorkke sapary jolynda qysqa merzimge Madrıdke toqtady. Ispanııa koroli Hýan Karlos I-men jáne Ispanııa úkimetiniń tóraǵasy H.Ansarmen kezdesýleri boldy.
* 17-21 jeltoqsan aralyǵynda Qazaqstan Prezıdenti Nursultan Nazarbaevtyń AQSh-qa resmı sapary bastaldy. Sapar barysynda Nursultan Nazarbaev AQSh Prezıdenti B.Klıntonmen, vıse-prezıdent A.Gormen, BUU Bas hatshysy K.Annanmen kezdesip, kóptegen kúrdeli máselelerdi talqylady.
* Osy joly Nursultan Nazarbaevqa Halyqaralyq saılaý júıesi qorynyń «Demokratııany alǵa jyljytýǵa qosqan asa kórnekti úlesi úshin» dıplomy tabys etildi. Qor jetekshisi R.Sýdrıet bedeldi nagradany tapsyrý kezinde Qazaqstandaǵy saılaý úderisin tabandy túrde jetildirip otyrý, reformalardy júzege asyrý men tereńdetý respýblıkada demokratııany damytýǵa udaıy umtylýdyń belgisi ekenin atap aıtty.
*28 jeltoqsanda Prezıdent Jarlyǵymen 2000 jyl «Mádenıetti qoldaý jyly» dep jarııalandy.
*29 jeltoqsanda Prezıdent Nursultan Nazarbaevtyń tóraǵalyq etýimen Úkimet májilisi ótkizilip, onda 1999 jyldyń aldyn ala qorytyndylary qaraldy. Májiliste ekonomıkada ońdy ózgerister baıqala bastaǵany, eldiń altyn qory 2 mıllıard dollarǵa jýyqtaǵany, bul ulttyq valıýta aınalymǵa shyǵarylǵaly bergi eń úzdik kórsetkish ekeni, jyldy eńbekaqy jáne zeınetaqy qaryzdarynsyz qorytyndylaýǵa qol jetkeni, teńge baǵamynyń turaqtana túskeni atap ótildi. Elbasy, sondaı-aq, endigi jerde Astana qurylysyn shetel kompanııalaryna berýdi shekteý qajettigin, ózimizdiń qurylysshylar da álemdik úlgige saı nysandar sala alatynyn atap kórsetti. Sybaılas jemqorlyqpen kúres máselesine de basa nazar aýdaryldy.
