Elbasy «CNBC Arabia» telearnasyna suhbat berdi

Memleket basshysy suhbat barysynda Sırııadaǵy jaǵdaıdy tezirek sheshý úshin osyǵan múddeli barlyq memleketter bir mámilege toqtaýy tıistigin aıtty. Osy suhbattan beıne-úzindi Prezıdenttiń baspasóz qyzmetiniń feısbýktegi paraqshasynda jarııalandy. Telearna tilshisiniń «Sırııa máselesi óte kúrdeli. Áli sheshimin tapqan joq. Sizdiń oıyńyzsha, Sırııadaǵy daǵdarys jaqyn arada óz sheshimin taba ma, álde uzaqqa sozyla ma?» - degen suraǵyna Qazaqstan Prezıdenti: Eń birinshi, barlyq múddeli memleketter kelisip, bir jerden sóz shyǵarýy qajet. Ásirese, aralasyp jatqan úlken memleketter. О́kinishke oraı, árqaısysy ózderiniń múddesin qorǵap, ártúrli jaǵdaımen kirisedi. Árqaısysynyń óz múddesi bar. Lańkestikke qatysyp júrgen adamdar sony qoldanady. Birine birin qarsy qoıady. Sondyqtan, meniń usynysym - BUU aıasynda búkil dúnıejúzilik qoǵamdastyq birlesip lańkestikke qarsy turyp, Sırııanyń máselesin sheshýi kerek. Basqa jol joq dep sanaımyn. Sebebi, bul barlyq memleketterge qaýip. Bizdi bilmeıtin basqa dúnıe, Batys elderi munyń barlyǵy musylmandardan shyǵyp otyr dep oılaıdy. Lańkestik pen musylmannyń arasynda eshqandaı da teńdik (baılanys) joq. Barlyq elder birigip qarsy shyqsa, ony jeńýge bolady»,- dep jaýap bergen. Elbasy suhbat barysynda elimizdiń BUU Qaýipsizdik keńesiniń 2017-2018 jyldardaǵy turaqty emes músheligine, ıadrolyq qarýdy taratpaý isindegi kúsh-jigerine jáne respýblıkanyń áleýmettik-ekonomıkalyq damýyna qatysty qoıylǵan suraqtarǵa da jaýap berdi.