Qazaqstan 2018 jyly 20 jańa sý qoımacyn salýdy bastaıdy

Qazaqstan 20 jańa sý qoımanyń qurylysyn 2018 jyly qolǵa alady dep kútilýde. Bul týraly búgin Aýyl sharýashylyǵy mınıstrliginde ótken baspasóz máslıhatynda mınıstrliktiń sý resýrstary komıteti sý sharýashylyq mekemelerin damytý jáne paıdalanýǵa berý basqarmasynyń jetekshisi Murat Beısenov málim etti, dep habarlaıdy QazAqparat. Basqarma basshysy sóz basynda Qazaqstandaǵy sý qoımalardyń sanyna jáne olardy basqarý prınsıpine toqtaldy. «Osy jyldyń 1 qazanyndaǵy málimetke súıensek, Qazaqstan Respýblıkasynyń aýmaǵynda 309 sý qoımasy bar. Onyń ishinde 83-i respýblıkalyq menshikte, 191 sý qoıma kommýnaldyq  menshikte, 35-i jekemenshik. Sý resýrstary komıtetiniń aýmaqtarda segiz basseındik ınspeksııasy bar. Jalpy, Qazaqstanda sý resýrstaryn basqarý prınsıpi basseındik prınsıpke negizdelgen. Sondyqtan da, sý resýrstary komıtetiniń basseıindik ınspeksııalary iri sý qoımalarynyń jumysyna únemi monıtorıng júrgizedi»,-dep habarlady M.Beısenov. Eki jyl buryn osy sý resýrstary komıtetiniń basshylyǵy Qazaqstan 2020 jylǵa deıin 20 jańa sý qoıma salý týraly baǵdarlama ázirledi dep habarlaǵan edi. QazAqparat tilshisiniń osy másele tóńiregindegi suraǵyna jaýap bergen M.Beısenov ol sý qoımalardy qarjylandyrý tek 2017-2018 jyldary bastalatynyn habarlady. «Elbasynyń tapsyrmasy boıynsha, sý resýrstaryn basqarý jónindegi memlekettik baǵdarlama aıasynda 21 sý qoıma salynady dep kózdelgen. Ázirge, ekonomıkadaǵy daǵdarysqa baılanysty, aqsha bólingen joq. Búgingi tańda «Qazsýshar» respýblıkalyq memlekettik kásipornynyń mamandary jańa sý qoımalaryn salý jónindegi tehnıkalyq negizdeme  ázirlep jatyr. Qarajat 2017 jyldan bastap áýeli tehnıkalyq ekonomıkalyq negizdeme ázirleýge, sodan keıin jobalaý-smetalyq qujattamalaryn ázirleýge, 2018 jyldan bastap osy jobalardy júzege asyrýǵa aqsha bólinedi dep josparlanyp otyr. Búgingi tańda ázirge qarjy bólingen joq. Bıýdjettik kodekske sáıkes, biz jańa talaptardy oryndap, ulttyq ekonomıkalyq mınıstrliktiń qorytyndysyn alýymyz kerek», - dep túsindirdi M.Beısenov.