Almatyda Qazaqstan men Túrkııa arasyndaǵy Joǵary deńgeıdegi strategııalyq yntymaqtastyq keńesi aıasynda strategııalyq josparlaý jónindegi birlesken tobynyń kezekti otyrysy ótti. Eki tarap ta tabysty tarqasqan jıynǵa Qazaqstan men Túrkııa Syrtqy ister mınıstrleri Erlan Ydyrysov pen Mevlıýd Chavýshogly tóraǵalyq etti.
Keshe Tashkentte ótken Islam Yntymaqtastyq Uıymynyń otyrysynan keıin ile-shala búgin Almatyda toǵysqan eki eldiń syrtqy ister mınıstrleri bul jıynda óńirlik qaýipsizdik máselelerinen bastap, ózge de jáıtterdi keńinen kelisip alýǵa qol jetkizdi. Jabyq esik jaǵdaıynda ótken jıynnan keıin mınıstrler eki memlekettiń BAQ ókilderimen baspasóz máslıhatyn ótkizip, jýrnalısterdiń saýaldaryna jaýap berdi.
«Qazaqstan men Túrkııa – erekshe áriptester. Bizdiń baýyrlastyǵymyzdan bólek, kezdesýlerimiz de jasampaz sıpatqa ıe» degen Qazaqstannyń syrtqy ister mınıstri bul jıynda kelesi jyly Túrkııada ótetin atalmysh Keńestiń kezekti otyrysynyń kúntártibi keńinen talqylanǵanyn atady.
«Bizdiń búgingi kezdesýimizdiń maqsaty – Qazaqstan men Túrkııa arasyndaǵy Joǵary deńgeıdegi strategııalyq yntymaqtastyq keńesiniń kezekti otyrysynyń kúntizbesin talqylaý boldy. Búgingi kezdesýden keıin jáne alda kele jatqan keńes otyrysy eki eldiń qarym-qatynasyn jańa satyǵa kóteredi dep senemiz. Keńestiń III otyrysy kelesi jyly Túrkııada ótedi. Búgingi jıynda biz saıası, áskerı, mádenı saladaǵy taqyryptardy jan-jaqty talqyladyq, sonymen qatar, konsýldyq qarym-qatynastar da jıynnyń kúntártibinde boldy», dedi Mevlıýt Chavýshogly.
О́z tarapynan mınıstr Erlan Ydyrysov: «Biz eki eldiń ózara yntymaqtastyǵyndaǵy máselelerge jeke-jeke toqtaldyq. Onyń ishinde, saýda-ekonomıkalyq, ınvestısııalyq suraqtar kóterildi. Naqtyraq aıtqanda, «Jańa Sınergııa» birlesken ekonomıkalyq baǵdarlamasy men Qazaqstan-Túrkııa arasynda ındýstrııalyq aımaqtar týraly iri jobalarymyz bar. Sonymen qatar, aýyl sharýashylyǵy jáne ınfraqurylymdyq jobalarǵa baǵyttalǵan ınvestısııalyq kelisimder bar. Álbette, búgingi jıynnyń nátıjesi retinde Qazaqstan men Túrkııa arasyndaǵy Joǵary deńgeıdegi strategııalyq yntymaqtastyq keńesiniń III kezekti otyrysyn ótkýzge keliskenimizdi aıta ketý kerek. Keńeske Elbasy Nursultan Nazarbaev qatysady. Sondaı-aq, búgin EKSPO-2017 taqyryby da kóterildi. О́zderińiz biletindeı, Túrkııa bul kórmege belsendi qatysýshy. Bizdiń delegasııalar sarapshylar deńgeıinde tústen keıin otyrysty jalǵastyrady» dedi.
Erlan Ydyrysov Qazaqstan túrik kompanııalary men óndiris oryndaryna Eýrazııalyq ekonomıkalyq odaqtyń, Ortalyq Azııa men Reseı, Qytaı naryǵyna shyǵýda aımaqtyq hab bola alatyndyǵyn atap ótti. Al EAEO aıasynda taýar, kapıtal, jumys kúshi men qyzmet túrleriniń erkin aınalymyna kepildik berilgen. Sondyqtan Túrkııanyń isker ortasy Qazaqstandy 180 mıllıon halqy bar ortaq rynok retinde qarastyrýy tıis dedi.
Mevlıýt Chavýshogly túrik iskerleriniń qazaqstandyq áriptesterimen belsendi qarym-qatynasqa qashan da daıyn ekendigin atap ótti.
Aınash Esalı, Almaty
