Kazakh TV telearnasy jańa formatta shyǵa bastady

Búgin Astanadaǵy «Qazmedıa ortalyǵynda» QR Aqparat jáne kommýnıkasııalar mınıstri Dáýren Abaevtyń qatysýymen jańarǵan «Kazakh TV» arnasy resmı túrde iske qosyldy. «Aqparat keńistiginde ózindik orny bar «Kazakh TV» telearnasynyń jańa formatqa kóshýimen shyn júrekten quttyqtaımyn. Bıylǵy jyly elimizdegi basqa da memlekettik medıa qurylymdarmen birge «Habar» telearnasynyń resýrstaryn jańǵyrtý boıynsha úlken jumystar júrgizilip jatyr. Bul rettegi sharalar Elbasynyń otandyq buqaralyq aqparat quraldarynyń sapasyn arttyrý jónindegi tikeleı tapsyrmasy boıynsha atqarylýda. Búgingi kúni bizdiń aldymyzda birqatar mańyzdy mindetter tur. Solardyń biri elimizdi halyqaralyq deńgeıde nasıhattaýǵa baılanysty. Osyǵan oraı sheteldik aýdıtorııany qamtyǵan tuńǵysh otandyq «Kazakh TV» men «Bilim jáne Mádenıet» telearnalary biriktirilip, jańarǵan formatta habar taratýǵa kiristi. Osylaısha, elimizdiń saıası-ekonomıkalyq jáne mádenı jańalyqtary álem nazaryna keńinen usynyla bastaıdy»,-dedi Dáýren Abaev. Bul rette mınıstr «Bilim jáne Mádenıet» telearnasyndaǵy sapaly kontent osy úshin qoldanylatynyn atap ótti. Eń bastysy - jańarǵan telearnanyń habary sheteldik aýdıtorııaǵa memlekettik tilde jáne aǵylshyn tilinde taratylmaq. «Jalpy, buqaralyq aqparat quraldarynyń ishinde telearnanyń asa qýatty qural ekeni belgili. Osyny el maqsaty, ult múddesine utymdy paıdalana bilý asa mańyzdy. Jańarǵan arnanyń ujymy bul mindetti oıdaǵydaı atqarady dep senemin»,-dedi D. Abaev. Aıta keteıik, mınıstr atalǵan arnanyń ujymymen kezdesip, jańa mindetterdi júktedi. «Kazakh TV» jáne «Bilim jáne Mádenıet» arnalary bir «Kazakh TV» ataýymen taralady. Arna Qazaqstan tarıhy, mádenıet, dástúr, týraly baǵdarlamalar kórsetilimin jalǵastyrady. Arna HotBird 13B, Galaxy 19 jáne AsiaSat 5 spýtnıktik platformasynyń kómegimen qazaq jáne aǵylshyn tilderinde efırge shyǵady. Otandyq kórermenderge qazaq jáne orys tilderinde spýtnıktik jáne kabeldik arnalar arqyly qoljetimdi bolady. Jańa televızııalyq maýsymda arna kontenti sheteldik bıznestiń keleshegi, bıznes jáne demalys úshin týrıstik sektorlar múmkindigine toqtalatyn, sondaı-aq Qazaqstannyń mádenı-tarıhı murasyn beıneleıtin taqyryptyq bloktarǵa bólinip tolyǵady.