2000
*24 qazanda Parlament palatalarynyń birlesken otyrysy boldy. Onda Prezıdent Nursultan Nazarbaev Qazaqstan halqyna jyl saıynǵy dástúrli Joldaýyn arnady. Elbasy Joldaýda memlekettiń ekonomıkalyq damýynyń keleshegi, qoǵamdy demokratııalandyrý talaby, memlekettik saıasattyń negizi bolyp tabylatyn ulttyq qaýipsizdiktiń problemalary týraly jan-jaqty qamtı aıtyp, keler jylǵa naqty mindetter qoıdy. «Egemen Qazaqstan» gazetiniń 25 qazan kúngi nómirinde Joldaý mátini jarııalandy.
*25 qazanda Prezıdent Nursultan Nazarbaev Danııa koroldigine resmı saparmen bardy. Danııa korolevasy Margrete II-men, eldiń premer-mınıstri P.N.Rasmýssenmen kezdesýlerde ekijaqty qarym-qatynastardyń túbegeıli máseleleri talqylandy.
*30 qazanda Prezıdent N.Á.Nazarbaevtyń Ispanııaǵa resmı sapary boldy. Sapar kezinde Memleket basshysy Ispanııa Úkimetiniń Tóraǵasy Hose Marııa Aznarmen jáne isker toptarmen kezdesti. Sapar nátıjesinde taraptar túrli salalardaǵy ózara tıimdi baılanystardy nyǵaıtýǵa múddeli ekendikterin qýattady. Halyqaralyq avtomobıl qatynasy týraly kelisim jáne 2000-2003 jyldarǵa arnalǵan bilim jáne mádenıet salasyndaǵy yntymaqtastyq baǵdarlamasy sekildi mańyzdy qujattarǵa qol qoıyldy. «Talgo» kompanııasynyń júrdek jolaýshy poıyzdaryn paıdalanyp, «Almaty – Astana baǵyty boıynsha júrdek poıyzdardyń júrisin 12-14 saǵatqa deıin qysqartý», «Astana qalasynyń turmystyq qaldyqtaryn alysqa tógýdi jáne ekologııalyq ahýalyn jaqsartýdy jańǵyrtý» jobalary úshin memlekettik emes zaemdardy tartý týraly ýaǵdalastyqqa qol jetkizý sapardyń naqty nátıjesi boldy.
*1 qarashada Astanaǵa kelgen Saýdııa bekzadasy Sultan bın Abdýl Ázız Ál Saýd pen Qazaqstan Prezıdenti Nursultan Nazarbaevtyń kezdesýi ótti. Elbasy Saýdııa koroli Fahdtyń Astana qalasynda Parlament Senaty ǵımaratyn salý maqsatyna qaıtarymsyz 15 mıllıon dollar bólmek nıetine shyn yqylasty rızashylyǵyn jetkizdi. Sondaı-aq, 1875-1876 jyldary Mekkege barǵan Qunanbaı qajynyń óz qarajatyna turǵyzǵan ǵımaratyn taýyp, qalpyna keltirýge járdemdesý jónindegi ótinishin de aıtty. «Biz eki musylman memleketiniń qarym-qatynasyn qaı salada da damytýǵa ázirmiz. Qajylyq saparlaryn uıymdastyrýdan da qarjy aıamaımyz», dep aqtaryla sóılegen bekzada Astana men Qaraǵandy arasyn jalǵaıtyn avtokólik jolyn qalpyna keltirýge 12 mıllıon dollar bólýge kelisimin berdi. Qarashanyń 2-sinde Esildiń sol jaq betinde Parlament Senaty ǵımaratynyń qadasyn qaǵý rásimi bolyp ótti.
*6 qarashada Prezıdent N.Á.Nazarbaev Pákistan Islam Respýblıkasy atqarýshy bıliginiń basshysy Pervez Mýsharrafpen kezdesti. Kezdesý barysynda taraptar ekijaqty qatynastardyń jáne Ekonomıkalyq yntymaqtastyq uıymy (OES) sheńberinde aımaqtyq yntymaqtastyqtyń mańyzdy aspektilerin talqylady.
*15 qarashada Prezıdent Nursultan Nazarbaevtyń Ulybrıtanııa men Soltústik Irlandııaǵa úsh kúndik resmı sapary bastaldy. Ulybrıtanııa patshaıymy Elızaveta II Qazaqstan basshysyn Qazaqstanda saıası jáne ekonomıkalyq turaqtylyqty qamtamasyz etýge, zańdylyq pen demokratııany ornatýǵa, sondaı-aq, jahandyq aýqymda ıadrolyq qarýdy taratpaý isine sińirgen eńbegi úshin «Áýlıe Mıhaıl men áýlıe Georgııdiń Úlken Kresi» ordenimen marapattady. Premer-mınıstr Tonı Blermen kezdesý barysynda Qazaqstan ekonomıkasyna ınvestısııa salýdan Ulybrıtanııa álem elderi arasynda ekinshi orynda turǵany razylyqpen aıtyldy. N.Á.Nazarbaev Londonnyń Ekonomıka mektebinde dáris oqyp berdi.
*18 qarashada Ulybrıtanııaǵa jasaǵan resmı saparynan qaıtar jolda Qazaqstan basshysy Nursultan Nazarbaev Máskeýge soǵyp, Reseı Prezıdenti Vladımır Pýtınmen kezdesti.
*27 qarashada Tıimdi ulttyq saqtandyrý ındýstrııasyn qalyptastyrý jáne onyń basym baǵyttaryn odan ári damytýdy qamtamasyz etý maqsatynda Qazaqstan Respýblıkasynda saqtandyrýdy damytýdyń 2000-2002 jyldarǵa arnalǵan memlekettik baǵdarlamasy jáne ony iske asyrý jónindegi is-sharalar jospary bekitildi.
*4 jeltoqsanda Mınsk qalasynda Táýelsiz Memleketter Dostastyǵy elderi basshylarynyń sammıti ótkizildi. Bul týraly «Egemen Qazaqstan» gazetiniń 5 jeltoqsan kúngi nómirinde «Tirlik úshin birlik kerek» taqyrybymen maqala jarııalandy.
*8 jeltoqsanda Prezıdent janyndaǵy Shetel ınvestorlary keńesiniń otyrysy ótip, onda «Qazaqstanda jumys isteıtin sheteldik ınvestorlardyń etıka kodeksi týraly» deklarasııa qabyldandy. Qujatta Qazaqstan Respýblıkasynyń kez kelgen ókili qatysatyn bıznesti júrgizý barysyndaǵy barlyq mámileler men operasııalarda eń joǵary prınsıpterdi saqtaý, Qazaqstan zańdaryn durys qoldanbaý nemese aınalyp ótý bolyp tabylatyn qandaı da bir áreketterge barmaý, zańsyz nemese qajet emes tólemderge baılanysty áreketterge nemese kelisimderge tikeleı nemese janamalaı ádeıi qatyspaý sııaqty kóptegen mindettemeler kórsetilgen. Munyń ózi ýaqyt talabynan týǵan oryndy sheshim edi.
*13 jeltoqsanda Prezıdent N.Á.Nazarbaev «Habar» telearnasy arqyly tikeleı efırde respýblıka halqymen júzdesti.
*15 jeltoqsanda Qazaqstan halqy Assambleıasynyń VII sessııasy boldy. Sessııada Prezıdent N.Á.Nazarbaev sóz sóıledi. Elbasy óz sózin ıtalıan saıasatshysy Kavýrdyń pikirin beıimdeı ózgertip, «Biz Qazaqstandy somdadyq, endi qazaqstandyqtardy somdaıyqshy!» degen tilekpen aıaqtady.
*30 jeltoqsanda Elimizdiń rýhanı ortalyǵy Almaty qalasynda halqymyzdyń mádenı ómirinde eleýli oqıǵa boldy: Qazaqtyń Abaı atyndaǵy memlekettik akademııalyq opera jáne balet teatry kúrdeli jóndeýden keıin qaıta ashyldy. Qazaqstan Respýblıkasynyń Prezıdenti N.Á.Nazarbaevtyń Jarlyǵymen «Mádenıetti qoldaý jyly» dep jarııalanǵan 2000 jylda atqarylǵan qyrýar ıgi isterdiń biri osy boldy.
