Áıel birikse, alynbaıtyn qamal joq

Parlament Májilisiniń depýtaty, áıel depýtattar tobynyń úılestirýshisi Maıra Aısına Parlamentte halyq qalaýlylary bolyp júrgen, buǵan deıingi shaqyrylymdarda Májilis depýtaty bolǵan, búginde elordada túrli basshylyq qyzmet atqaratyn hanymdardyń basyn qosty. Bul shýaqty kesh Qazaqstan Respýblıkasy Parlamentiniń 15 jyldyǵy, Qazaqstan Respýblıka­sy­nyń Táýelsizdigine 20 jyl tolýy men tuńǵysh ret ótkizilgeli otyrǵan áıelder quryltaıynyń qurmetine arnaldy. «Elimizdiń eńse kóterip, memleketimizdiń ny­ǵaıyp, irgemiz­diń bekı túsýine názik jandy sana­la­tyn áıel­der­diń qosqan úlesi ól­sheýsiz. Tarıh túkpirinen sóz tart­pa­ǵannyń ózin­de osy jıyrma jyl­da qazaq­tyń qyzdary er kóterer júk­ti ar­qa­laı bildi. Sol er minezdi qaı­sar qyzdar – sizder dep tanı­myz», – dep keshti bastady M.Aısına. Saltanatty kesh «Eldiń batyr qyzdary», «Halyq qalaý­ly­la­ry», «Mınıstr hanymdar», «Aýyr júk arqalaǵandar», «Ha­lyq úni», «Bizdiń úmit» degen ataýlarmen aıshyqtalyp, qatysyp otyrǵan ár áıeldiń ózindik ornyn anyqtady. Eliniń batyr qyzdary bolyp Memlekettik syılyqtyń laýre­ty, aqyn Farıza Ońǵarsynova, qo­ǵam qaıratkeri Záýre Qady­rova, memlekettik qyzmetkerler Raısa Sher men Lılııa Mýsına tanyldy. Olar Parlamenttiń ótken shaqyrylymdarynyń depý­tattary, Farıza apaı men Záýre apaıdyń mereıli mereıtoılaryn eskergen sińlileri tartý-taral­ǵylaryn da umytpady. Farıza apaı saıasatker sińlilerine Shyń­ǵys hannyń shapqynshylyǵy kezindegi Otyrar qalasyndaǵy áıel­derdiń erligin áńgimelep berdi de: «Memleket damýynda atqa­ryp otyrǵan eńbekterińe tabys, eldiń búgini men erteńin anaǵa tán júrekpen oılap júrgen jú­rekterińe alǵys tileımin. Parlamentte ótkir málimdemeler jasap, depýtattyq saýaldar joldap otyrǵan qyzdarymyz, zań daıyn­daǵan kezde de óz únderin tany­typ, óz talaptaryn qosyp otyr, sonyń arqasynda áleýmettik má­seleler oń sheshimin taýyp keledi. Aldymyzda Táýelsizdiktiń 20 jyldyǵy, prezıdenttik saılaý, Islam Konferensııasy Uıymyna tóraǵalyq, t.b. kóptegen jaýapty sharýalar tur. Onyń negizi myna sen­derdiń qoldaryńmen atqary­la­dy. Áıelder birikse, alyn­baıtyn qamal joq. Senderge sol jolda tabys tileımin!», – dep aq batasyn berdi. Merekeli, berekeli osy keshke ataqty skrıpkashy Aıman Musa­qo­jaeva, Qazaqstannyń isker áıelderi as­so­sıasııasynyń prezıdenti Raýshan Sársembaeva qa­ty­syp, ha­lyqtyń únin jetkizdi. Juldyz qyzdardyń jarqyra­ǵan keshinde kúıshi Murager Sár­senbaev, Astana fılarmonııa­sy­nyń ánshileri Aızada Qopanova, Estaı Muqashev, Bıbigúl Jan­uzaq jáne «Kantýs Nova» vokal­dy kvarteti óner kórsetti. Sáýle DOSJAN, jýrnalıst.