Qazaqstan jasyl ekonomıkaǵa yqpal etetin zań qabyldady

Búgin Parlament Senatynyń jalpy otyrysynda «Parıj kelisimin ratıfıkasııalaý týraly» zań jobasy qabyldandy. «2015 jylǵy 12 jeltoqsanda Parıj qalasynda BUU-nyń klımattyń ózgerýi týraly negizdemelik konvensııasynyń 21-shi taraptar konferensııasynyń qorytyndysymen Parıj kelisimi qabyldandy. Qazaqstan kelisimge 2016 jylǵy 2 tamyzda qol qoıdy. Bul aǵymdaǵy jyldyń 5 qazanynda Parıj kelisiminiń kúshine enýi úshin qajetti sharttarǵa qol jetkizilip,  qazirgi tańda atalǵan kelisimdi jalpy shyǵaryndylar jıyntyǵy 60 paıyzdan asatyn 86 el ratıfıkasııalady», - dedi zań jobasyn tanystyrǵan QR Energetıka mınıstri Qanat Bozymbaev. Onyń aıtýynsha, Parıj kelisimi jahandyq ortasha temperatýra ósimin ındýstrııaǵa deıingi deńgeıden 2 gradýstan tómenirek deńgeıde ustaýǵa, parnıkti gazdar shyǵaryndylaryn tómen deńgeıinde klımat ózgerýiniń qolaısyz áserlerine beıimdelý jáne álsizdiktiń tómendeýine negizdeledi. Bul kelisim jahandyq ortasha temperatýranyń joǵarylaýyna jol bermeý baǵytynda jumys isteý, jasyl ekonomıkaǵa qarjy kózderin kóptep tartý sekildi negizgi máselelerdi qamtyp otyr. Kelisim aıasynda árbir tarap ulttyq deńgeıde aıqyndalǵan josparly júıeli úlesi týraly habarlap, ony oryndaıdy. 5 jylda bir ret elder ulttyq deńgeıde anyqtalatyn kezekti úlesterin aıqyndaıdy. «Qazaqstan 2015 jylǵy qyrkúıekte 2030 jylǵa deıingi merzimde bazalyq 1990 jylmen salystyrǵanda parnıkti gazdar shyǵaryndylaryn shartsyz túrde 15 paıyzǵa jáne shartty túrde 25 paıyzǵa qysqartý mindettemesin jarııalady. Usynylǵan úlesterge qol jetkizý Parıj kelisimimen zańdy túrde mindettelmeıdi. Olar erikti negizde oryndalady jáne hatshylyqtyń ashyq tiziliminde jarııalanady», - dedi Q. Bozymbaev.