Beıbitshilik dáni

«Qazirgi tańda jer-jahanda ıadrolyq qarýdan resmı túrde ada dep jarııalanǵan bir óńir bar, ol – Ortalyq Azııa. Bul iste Qazaqstannyń alar orny erekshe. Búkil álemniń tarıhynda adamzat balasy qarýlaný jolymen kele jatty. Qaı zamanda da memleket joıqyn qarýǵa, adamdy qyryp-joıatyn qarý-jaraqqa ıe bolýǵa umtyldy. Biraq bir el ǵana óziniń qolynda turǵan qarýdan ózi bas tartyp, oǵan óz qolymen qum quıdy. Ol – Qazaqstan Respýblıkasy». Iá, keshe Astanada ótken halyq­ara­lyq jıynda Májilis depýtaty Saýyt­bek Abdrahmanov osylaı dedi. Bul «Nursultan Nazarbaevtyń «Álem. HHI ǵasyr» manıfesi: Ortalyq Azııadaǵy óńirlik biregeılik pen qaýipsizdik» taqyrybynda ótken Ortalyq Azııa ǵylymı-sarapshylyq keńesiniń Táýelsizdiktiń 25 jyldyǵyna arnalǵan otyrysy bolatyn. Oǵan Qazaqstan halqy Assambleıasynyń músheleri, Parlament depýtattary, otandyq jáne Qyrǵyzstan, О́zbekstan, Tájikstan, Úndistan, Pákistan, Ońtústik Koreıa elderiniń sarapshylary qatysty. Jıynda Ortalyq Azııadaǵy memleketterdiń beıbitshilik jolynda úlken qadam jasap otyrǵany aıtylyp, Elbasy manıfesiniń mańyzdylyǵy taǵy bir aıshyqtaldy. Sarapshylardyń paıymdaýynsha, «Nazarbaevtyń «Álem. HHI ǵasyr» manıfesi adamzatty úshinshi dúnıejúzilik soǵys qaterinen aryltý jolyna baǵyttalǵan. «Ortalyq Azııany ıadrolyq qarýdan ada etý jónindegi  elimizdiń usynysy barlyq taraptan qoldaý taýyp otyr. Elbasymyzdyń manıfesindegi oılardy júzege asyrý álemdegi qarýsyzdanýdyń kóshbasshysy retinde tanylǵan memleketimizdiń osy istegi bastamalaryn adamzatty úshinshi dúnıejúzilik soǵys qaterinen aryltý  úshin dúnıe júzi qolǵa alatyn sharalar tóńiregine uıystyrady», dedi depýtat S.Abdrahmanov. Shyndyǵynda, egemendigimizdiń eleń-alańynda, Táýelsizdigimizdiń tańsári shaǵynda el bolashaǵy týraly pessımıstik boljamdar kóp aıtylǵany ras. Sonyń ishinde bular kóp ultty, kóp tildi, kóp dindi el, basy qosylmaıdy, yryń-jyryńy shyǵady degender de bolǵan. Biraq olardyń aıtqany kelgen joq. Qazaqstan halqynyń, Elbasynyń aıtqany keldi. Biz eń aldymen óz aldymyzǵa úı boldyq. Elordamyz, Qazaqstan jahandyq jıyndar ótetin orynǵa aınaldy. Osylaısha Qazaqstan Eýropadaǵy qaýipsizdik jáne yntymaqtastyq uıymyna tóraǵalyq etti. Al jaqynda BUU Qaýipsizdik keńesiniń 2017-2018 jyldardaǵy  turaqty emes músheligine saılandyq. «Qazir Qazaqstan álem taǵdyryna aralasa alatyn elge aınaldy. Sondaı úlken quqyq aldyq. Munyń jarqyn kórinisi – Prezıdent Nursultan Nazarbaevtyń «Álem. HHI ǵasyr» atty manıfesi. Ol Birikken Ulttar Uıymynyń  resmı qujaty retinde qabyldanyp, búkil álemniń nazaryn aýdaryp otyr»,  dedi depýtat S.Abdrahmanov. Jıynda sóz alǵan Bilim jáne ǵylym mınıstrliginiń Ǵylym komıteti tóraǵasy Asqar Jarkenov te Elbasy manıfesiniń mańyzdylyǵyna toqtaldy. «Álem. HHI ǵasyr» manıfesi Elba­synyń álemdegi sońǵy saıası oqıǵalarǵa baılanysty adamzatqa joldaǵan arnaıy qujaty sanalady. Memleket basshysy aıtqandaı, soǵystyń tamyryna balta shabý adamzattyń eń kúrdeli mindeti. Manıfeske sáıkes, Elbasy memleket basshylaryn «HHI ǵasyr: soǵyssyz álem» atty keń aýqymdy baǵdarlamany bekitýge, ózin-ózi demılıtarızasııalaý jaǵyna qaraı batyl qadam jasaýǵa shaqyrady. Olaı bolmaǵan jaǵdaıda ǵalamshar radıaktıvti materıaldyń zor úıindisine aınalady», dedi A.Jarkenov. Komıtet basshysy, sondaı-aq, 2015 jyldyń 7 jeltoqsanynda ótken BUU Bas assambleıasynda Qazaqstan bastamasy boıynsha ıadrolyq qarýdan azat álem qurý týraly jalpyǵa ortaq deklarasııa qabyldaǵanyn eske salyp ótti. «Elbasynyń «Álem. HHI ǵasyr» atty manıfesi HHI ǵasyrda ómir súretin jáne jumys isteıtin óskeleń urpaq­tyń taǵdyryna shynaıy alańdaýshylyqtan týyndap otyr. Búginde qarýsyz beı­bitshilikti saqtaý – adamzat­tyń ja­han­dyq problemalary ara­syndaǵy negizgi basymdyq. Bul turǵy­da Qazaq­stan­nyń ǵylymı uıymdary irgeli jáne qoldanbaly ǵylymı-zert­teýler júrgizý kezinde mańyzdy ról atqara­dy», dedi A.Jarkenov. Sharada, sondaı-aq, QHA Tóraǵa­synyń orynbasary Leonıd Pıtalenko, Qyrǵyzstan halqy Assambleıasynyń tóraǵasy Tokon Mamytov, qoǵam qaırat­keri, mádenıettanýshy Murat Áýezov, Parlament Májili­siniń depýtaty Natalıa Jumadil­daeva jáne taǵy basqalar sóz sóı­lep, manıfest taǵylymyn keńinen talqy­lady. Jıyndy QHA hatshylyǵy meńge­rý­shisiniń orynbasary Leonıd Prokopenko júrgizip otyrdy. Qatysýshylar mundaı basqosýdyń Ortalyq Azııa elderiniń aımaqtyq biregeılik pen qaýipsizdigin qalyptastyrýda tájirıbe almasý alańy bolǵanyn jetkizdi. О́ıtkeni, Ortalyq Azııada, onyń ishinde Qazaq elinen kóktegen birlik dániniń dámin búginde búkil álem sezinip keledi. Dınara BITIKOVA, «Egemen Qazaqstan»