Qazaqstandyq delegasııa halyqaralyq kongreske qatysty

QR Konstıtýsııalyq Keńesiniń tóraǵasy I. Rogov bastaǵan qazaqstandyq delegasııa Túrkııanyń Stambul qalasynda quqyqtaný salasy boıynsha ótken halyqaralyq kongresske qatysty. Kongrestiń ashylý saltanatynda Túrkııa Prezıdenti R.T.Erdogan, Túrkııaniń ádilet mınıstri Bekır Bozdag, Ázerbaıjannyń ádilet mınıstri Fıkret Mammadov, Aýǵanystannyń ádilet mınıstri Basır Haıdarı, Somalıdiń ádilet mınıstri Abdýllahı Ahmed Jama sóz sóılegen bolatyn. Jalpy halyqaralyq jıynǵa 47 elden 200-den astam delegat, sonyń ishinde Konstıtýsııalyq Keńesterdiń tóraǵalary men músheleri, prokýratýralar, advokatýralar, ádilet akademııalarynyń basshylary, memlekettik organdardyń, akademııalyq jáne bıznes ortasynyń ókilderi qatysty. Kongress sheńberinde 21 otyrys ótkizildi. Konstıtýsııalyq Keńes Tóraǵasy I.Rogov, Joǵarǵy Sot Keńesiniń Tóraǵasy A.Smolın, Astana qalasy Almaty aýdandyq sotynyń tóraǵasy Ǵ.Násirdinov, Joǵarǵy Sot janynydaǵy Sot tóreligi akademııasynyń rektory M. Beıbitov baıandama jasady. Kongress qorytyndysy boıynsha, lańkestiktiń barlyq el úshin eń birinshi qaýip ekeni aıtyldy. Lańkestikke qarsy turý halyqaralyq yntymaqtastyqty talap etetinine, lańkestikpen kúresti júrgizý azamattardyń quqyqtary men bostandyqtarynyń sheginde júzege asyrylýy tıistigine mán berildi. «Osyǵan baılanysty barlyq elde sot jáne quqyq qorǵaý organdary aralarynda birqatar qylmystar túrlerine lańkestikti, kıberqylmysty (aqparattyq tehnologııalar salasyndaǵy qylmysty) qarjylandyrýǵa, esirtki zattary saýdasyna, adam saýdasyna qarsy is-qımyl jasaýda yntymaqtastyqty damytý, sondaı-aq halyqaralyq uıymdasqan qylmystyq toptarmen kúresti úılestirýdi kúsheıtý usynyldy», - delingen Astana qalalyq soty taratqan baspasóz baıanynda.