Jańasha jabdyqtaldy

Eýrazııalyq Toptyń quramyna kiretin elimizdegi «Qazhrom» transulttyq kompanııasy» AQ fılıaly – Aqsý ferroqorytpa zaýyty alyp kásiporyndar qatarynda. О́ndiris ornynda 7 myńdaı adam eńbek etýde. Jylyna 1,2 mıllıon tonna ferroqorytpa óndiretin zaýyt elimizde ǵana emes, álemdik metallýrgııa naryǵyndaǵy alyp kásiporyndardyń birinen sanalady. Jýyrda zaýyttyń №1 balqytý sehynda kúrdeli jóndeýden ótken №15 pesh paıdalanýǵa berildi. Zaýyt dırektory Sergeı Prokopevtiń aıtýynsha, eski peshti jóndeý jumysy shilde aıynda bastalypty. Bul alyp peshte joǵary kómirtekti ferrohrom balqytylady. Ol jańǵyrtylyp, jóndelip, jańa zamanaýı júıe-tetik qondyrǵylarmen jabdyqtaldy. Iаǵnı mehanıkalyq, gıdravlıkalyq jáne energetıkalyq tehnıkalyq qajettilikteri avtomattandyrý júıesine aýystyryldy. Alyp elektr peshiniń kúrdeli jóndeýi zaýyttyń ınvestısııalyq baǵdarlamasy aıasynda júzege asty. Peshti jańa zaman talaptaryna saı jabdyqtaýǵa, jańartýǵa salynǵan ınvestısııa kólemi 1,4 mlrd teńge. Metallýrgııa salasyndaǵy ozyq qural-jabdyqtar ornatyldy. Qaýipsiz, ári ekologııalyq jaǵynan taza. Zamanaýı tehnologııa, jańa peshtiń qosylýy zaýyttyqtar úshin ónimdilikke, únemdilikke úles. Peshtiń jyldyq ónimdiligi shamamen 50 myń tonna joǵary kómirtekti ferrohrom. – Negizgi jáne qosalqy jabdyqty únemi jańalap turý – kásiporynnyń tabysty damýynyń kepili. Ekinshiden, qorshaǵan ortany qorǵaý jáne eńbekti qorǵaý salasyndaǵy zamanaýı talaptar eskeriledi. Kúrdeli jóndeý kezinde pesh qaıtadan jańalanyp, retteledi. Barlyq qurylys-montaj jumystaryn zaýyt mamandary júrgizdi. Bul biz úshin maqtanysh. Qazir zaýyttyǵy eń qýatty qurylymy №6 sehty qaıta jańǵyrtý jumysyna daıyndyq jasalýda. Aldaǵy jeltoqsan aıynda №64 pesh te kúrdeli jóndeýge shyǵarylady, – deıdi Sergeı Prokopev. Buǵan deıin de zaýyttaǵy №28, №№63, 46, 45 jáne 12 peshterdiń kúrdeli jóndeýden ótkenderin jazdyq. Bul – óndiris ornyndaǵy maqsatty ınvestısııalyq baǵdarlamalar tıimdi oryndalýda degen sóz. Qaıta jańarǵan peshter ekologııaǵa zııansyzdyǵy men qaýipsizdikke de kepil­dik beredi. Eski tehnıkanyń ýaqyty ketti. Jańǵyrtý ónimdilikti, sondaı-aq óndiristiń senimdiligi men qaýipsizdigin damytýdyń basty faktory. Zaýytta óndiristi jańǵyrtý jumys­tary kezeń-kezeńmen júrgizilýde. О́ndi­ristiń ozyq tehnologııalaryn qoldaný jáne jańǵyrtýdaǵy maqsat joǵary kómirtekti ferrohrom óndirisin arttyrý bolyp tabylady. Farıda BYQAI, «Egemen Qazaqstan» Pavlodar oblysy, Aqsý qalasy