Kóńil aýdaratyn másele kóp

Qazaqstan qaýymdastyqtary men kásiporyndarynyń «Ta­bı­ǵat» ekologııalyq odaǵynyń tóraǵasy, Qazaqstan Respýblıkasy prezıdenttigine kandıdat Mels Eleýsizov óziniń saılaýaldy shta­bynda aqparat quraldary ókilderimen kezdesip, saılaý naýqany kezinde atqarylar jumysy týraly, oǵan qandaı daıyndyqpen kelgeni týraly áńgimelep berdi. Bul jerde prezıdenttikke kan­dıdattyń saılaýǵa arnalǵan baǵ­darlamasyn júıeli baıandap ja­tý­dyń reti joq bolar, ol aldaǵy ýaqytta resmı túrde aqparat quraldarynda jarııalatyny belgili. Eleýsizov myrzanyń ózi de oǵan tolyq toqtalǵan joq, jýrnalıst qaýymy ókilderimen emin-erkin áńgime, suraqtarǵa jaýap turǵysynda baıandady. Respýblıka jurtshylyǵy Mels Hamzaulyn tabıǵattyń, týǵ­an jer­diń janashyry retinde ta­nı­dy. Resmı bolmasa da, ony jurt elimizdiń bas ekology dep ataıdy. Elimizdegi bas laýazymdy qyz­metke usynylǵan azamatqa daýys berýshiler de, eń aldymen osyny oılaıtyny anyq. Tipti alysqa barmaı-aq, osy búginderi onyń bıylǵy Naýryz merekesi kúni árbir qazaqstandyq bolmaǵanda bir aǵash ekse, elimizdiń biraz aýma­ǵy jasyl jelekke oranar edi degen bastamasy talaı­lar­dyń júregine jetken bolar. Bú­gingi áńgime barysynda da ekolo­gııa má­selesi biraz sóz boldy. Bul má­selege baılanysty bar­lyq bılik oryndarymen, qoǵam­dyq uıym­dar­men, jurtshylyq­pen qoıan-qoltyq jumys isteıtinin aıtty. Ekologııa kóp máseleniń biri ǵana, el prezıdentine júkteler mindet san-salaly, dedi prezıdenttikke kandıdat. Eń aldymen elimizdiń qýatty bolýyn, ekono­mıkasynyń qaryshtap damýyn oı­laýymyz kerek. Basqa máse­le­ler­diń sheshimi sodan týyndap ja­tady. Halyqtyń áleýmettik jaǵ­daıy qashanda kóńilde júredi. Zeınetkerlerge aıryqsha qamqor­lyq qajet. Bul rette zeınetaqy qorlary tıimdi paıdalanylsa, biraz másele sheshiler edi. Den­saý­lyq saqtaýǵa baılanysty máse­le­ler ushan-teńiz. Elimizdiń bola­sha­ǵyn oılasaq, bilim berýdiń kezek kúttirmeıtin máselelerin sheshýimiz kerek. Prezıdenttikke kandıdat Mels Eleýsizovpen kezdeskende attap ótpeıtin bir másele bar. Ol – memlekettik tildi meńgerý. Orys­sha oqyp, orysshalaý ortada júr­gen azamatqa bul aıtarlyqtaı qıyndaý másele bolǵanyn ańǵar­ǵandaısyń. Osyǵan oraı onyń lıngvıstıkalyq synaqtan oıda­ǵy­daı ótkenine kúmán keltirgender de bar. Osyǵan baılanysty su­raqqa ol baıypty túrde qa­zaq­sha jaýap berdi. – Bıyl da synaq tapsyrdym, ótken saılaýda da tapsyrǵanmyn. Saılaýshylarmen kezdeskende de synaqtan óte alatyn shyǵarmyn. Sóıtse de, memlekettik tildi jete meńgerýmen odan ári shuǵylda­ný­ym kerektigin úlken jaýapkershilikpen sezinemin,– dedi ol. Prezıdenttikke kandıdatpen onyń saılaýaldy shtabynda kezdesýden jýrnalıster qaýymy tolǵandyrǵan suraqtaryna jaýap alyp, jaqsy ásermen tarqasty. Mamadııar JAQYP. Almaty.