OQO-da lımon ósiriledi

Úndistan, Úndi Qytaı, Ońtústik Qytaıda ósiriletin sıtrýsty jemis - lımondy baptaýdy tólebılik sharýalar da meńgerip keledi, dep habarlaıdy Tólebı aýdany ákiminiń baspasóz qyzmeti. Lımon baptaýdyń tásilderin meńgergen jergilikti azamat Iýrıı Pak Kóksáıek eldi mekeninde kólemi 0,07 ga  jylyjaıda lımon ósirýdi qolǵa alǵan. Úsh jyl buryn egilgen kóshetter bıyl-aq alǵashqy nyshandaryn kórsetti. Kásipker Iýrıı Alekseevıch óz qarajatyna salǵan bul lımonarııdegi sıtrýsti jemisti baptaý úshin asqan tózimdilik qajet ekenin aıtady. Osyǵan qarap, ózge de banan, kıvı sııaqty tropıkalyq jemisterdi esh qoryqpastan jylyjaılarda ósirýge bolatyn sııaqty deıdi ol. Bıiktigi 3-6 metrge jetetin lımon jemisiniń bıiktigi úı jaǵdaıynda 2 metrge deıin jetedi. Baıaý ósip, alǵashqy jemisin 6-10 jylda bere bastaıtyn lımon aǵashy 60 jylǵa deıin ósedi. Ázirge, Tólebıde lımon ósirýdi qolǵa alyp, kásipke aınaldyrǵan azamattar saýsaqpen sanarlyq. Máselen, ondaǵy Kemeqalǵan aýyldyq okrýgindegi «Nematýlla» sharýa qojalyǵy da sońǵy 3-4 jyldan beri 5,5 gektar jerine qııar, qyzanaqtan bólek, lımon ósirip, ony ishki naryqta saýdalap júr.