Brazılııadan bıznesmender keldi

Álemdegi turǵyndar sanynyń kóptigi jóninen alǵashqy bestikke kiretin Brazılııa týraly  bizdiń biletinimiz az emes. Jazýshy Berdibek Soqpaqbaevtyń bir keıipkeri jahandy jaılaǵan jurttardy túgendep otyryp, eldiń esim-soıyn qazaqy tilmen tizbekteıtin edi ǵoı. Sondaǵy «Biraz el, á...» dep beıneleıtin Latyn Amerıkasyndaǵy memleketimiz – osy. Sońǵy 25 jyl ishinde Qazaqstan men Brazılııa arasyndaǵy baılanys jyl saıyn damyp, berik jippen baılanǵan áriptestikke ulasyp keldi. Al bıylǵy jyldyń  1 shildesinen bastap eki el dostyq qarym-qatynastyń jańa kókjıegine qadam basty. Kóp jylǵy kelisimderdiń nátıjesinde Astana men Brazılıa arasynda vızasyz rejim júzege asty. Bul ekonomıkalyq áriptestiktiń jańa kezeńge aıaq basqanyn bildiredi. 2015 jyly ekijaqty taýar aınalymy 61,3  mln AQSh dollaryn qurady. Munyń  55,7 mln dollary eksporttyq ónim bolsa, 105,6 mln dollary ımporttyń úlesinde júzege asqan. Endi osy eki jaqty baılanys jer­­gi­likti jerde jalǵasyn taýyp, brazı­lııalyq bıznesmenderdiń ishki naryqqa qyzyǵýshylyǵy artyp otyr. Buǵan Almatyda ótken Qazaqstan-Brazılııa iskerleriniń bıznes-forýmynda kóz­ jetkizdik. Almaty qalasynyń kásip­ker­ler palatasynyń muryndyq bolýymen Brazılıadan belgili bıznesmender toby kelip, Qazaqstan naryǵyna ınvestısııa salýdyń joldaryn talqylady.  Bul – iskerler arasynda ótip otyrǵan tuńǵysh jıyn. Forým aıasynda Brazılııanyń agro­ónerkásiptik jáne óndiristik salasyndaǵy úz­dik kompanııalardyń basshylarymen is­ker­lik kezdesýler ótti. Eki jaqtyń da úırenetin, úıretetin isteri ushan-teńiz eken. Máselen, Qazaqstanǵa álemdik et naryǵynda ózindik orny bar «JBS», «Minerva Foods», «Copacol» (taýyq etin óndirýshi monopolıst) sııaqty kompanııalardyń isinen úlgi alý artyq etpes edi. Kezdesý barysynda sheteldik kompanııalar bıznesti júrgizý týraly tájirıbelerimen bólisip, birlesip óndiris qurý múmkindikterin qarastyrdy. Qalmahanbet MUQAMETQALI, «Egemen Qazaqstan» ALMATY