2002
* 4 maýsymda Almatyda Azııadaǵy ózara is-qımyl jáne senim sharalary jónindegi keńestiń (AО́SShK) birinshi sammıtiniń ashylýy boldy. Onda Qazaqstan Prezıdenti Nursultan Nazarbaev sóz sóıledi. «Azııadaǵy ózara is-qımyl jáne senim sharalary jónindegi keńeske qatysýshy memleketter dúnıe júzinde munaı qory boıynsha jetekshi oryndardy alyp otyr, bul qor jer sharyndaǵy «qara altynnyń» 40 paıyzyn quraıdy. Bizdiń qurlyqtyń kólik-kommýnıkasııalyq múmkindikteri shyn máninde orasan. Osydan biraz burynǵy Azııa daǵdarysynyń Azııadaǵy elder ekonomıkasy úshin qıyn saldary boldy, biraq ol bul elderdiń tuǵyryn shaıa almady», dedi Elbasy.
* 5 maýsymda Qazaqstan Prezıdenti Azııadaǵy ózara is-qımyl jáne senim sharalary jónindegi keńestiń I sammıtine qatysýǵa kelgen Qytaı Halyq Respýblıkasynyń Tóraǵasy Szıan Szemın jáne Mońǵolııa Prezıdenti Nasagıın Bagabandımen kezdesti.
* 7 maýsymda Sankt-Peterbýrgte Shanhaı yntymaqtastyq uıymyna múshe memleketter basshylarynyń kezdesýi boldy. Sammıt jumysyna qatysyp, sóz sóılegen Elbasy Nursultan Nazarbaev: «Shanhaı yntymaqtastyq uıymy qazirgi ýaqyt pen tarıhı kezeńniń talaptaryna tolyq jaýap beredi jáne aımaqtyń órkenıetti damýyn onyń saıası turaqtylyǵy men qaýipsizdigin saqtaý mindetterimen óz qyzmetin jandandyrýy asa qajet», dedi.
Atalǵan basqosý týraly «Egemen Qazaqstan» gazetiniń 8 maýsym kúngi nómirinde «Shanhaı yntymaqtastyq uıymy saıasat álemindegi qadamyn nyqtap keledi» taqyrybymen maqala jarııalandy.
* 6 shildede Astanada Elbasy Nursultan Nazarbaevtyń tóraǵalyq etýimen Qazaqstan Respýblıkasy Prezıdenti janyndaǵy Shetel ınvestorlary keńesiniń jetinshi plenarlyq otyrysy ótti. Jıyn aıaqtalǵannan keıin jýrnalısterge arnaıy suhbat bergen Elbasy: «Qazaqstandy TMD-nyń basqa memleketterinen ózgeshelep turatyn úlken bir erekshelik bar. Ol ekonomıkamyzǵa ınvestısııanyń asa mol kólemde salynýy bolyp tabylady», dedi.
* 7 tamyzda Astanada Úkimettiń keńeıtilgen otyrysy boldy. Májiliste Elbasy Nursultan Nazarbaev sóz sóıledi. Elbasy óz sózinde el ómiriniń eleýli máselelerin atap kórsetti.
*29 tamyzda Astanada Qazaqstan Konstıtýsııasynyń 7 jyldyǵyna oraı saltanatty jıyn ótti. Oǵan qatysqan Elbasy Nursultan Nazarbaev Ata Zańymyz jóninde keńinen tolǵap sóz sóıledi.
* 3 qyrkúıekte Prezıdent Nursultan Nazarbaev Ońtústik Afrıka Respýblıkasynyń Iohannesbýrg qalasynda ótken turaqty damý jónindegi BUU sammıtiniń jumysyna qatysty. Sammıtte sóz sóılegen Elbasy adamzat balasy talassyz ǵylymı-tehnıkalyq progreske qol jetkizgenine qaramastan, jer jarylyp, sý aqqaly bergi sońynan qalmaı kele jatqan jarly-jaqybaılyq, ashtyq, aýrý, soǵys ataýlydan tolyq qutyla almaı otyrǵanyna basa nazar aýdardy.
*9 qyrkúıekte Prezıdent N.Á. Nazarbaev Qazaqstanǵa resmı saparmen kelgen О́zbekstan Prezıdenti I.Karımovti qabyldady. Kezdesý barysynda Qazaqstan men О́zbekstan arasyndaǵy shekara máselesin túpkilikti sheshken shartqa qol qoıyldy.
*23 qyrkúıekte Prezıdent N.Á. Nazarbaev Qazaqstanǵa tuńǵysh ret resmı saparmen kelgen Slovenııanyń Prezıdenti M.Kýchanmen kezdesti. Dostyq, túsinistik jaǵdaıynda ótken basqosýda ekijaqty yntymaqtastyqtyń kókjıegin keńeıtý baǵytyndaǵy máseleler talqylandy.
* 26 qyrkúıekte Taraz qalasynyń 2000 jyldyq torqaly toıy bastaldy. Merekelik sharanyń ashylý saltanatynda Elbasy Nursultan Nazarbaev sóz sóıledi. Bul týraly «Egemen Qazaqstan» gazetiniń 27 qyrkúıektegi nómirinde «Máńgiliktiń altyn órmegi» taqyrybymen maqala jarııalandy.
*5-6 qazan kúnderi Elbasy Nursultan Nazarbaev Ortalyq Azııa yntymaqtastyq uıymyna múshe memleketter basshylarynyń tórtinshi kezdesýine jáne Araldy qutqarý halyqaralyq qorynyń otyrysyna qatysty.
* 7 qazanda Kıshınevte TMD elderi basshylarynyń sammıti ótti. Oǵan Prezıdent Nursultan Nazarbaev qatysty. Alqaly jıynda TMD qurylymyn jetildirýge baılanysty birqatar mańyzdy qujattarǵa qol qoıyldy.
*17 qazanda Qazaqstan Prezıdenti N.Á.Nazarbaev Qazaqstanǵa saparmen kelgen BUU Bas hatshysy K.Annanmen kezdesti. Elbasy BUU Bas hatshysynyń elimizge sapary respýblıka óńirindegi úlken saıası oqıǵa ekenin, onyń Qazaqstan men BUU arasyndaǵy yntymaqtastyqty damytýǵa jańasha serpin beretinin atap kórsetti.
* 23 qazanda Túrkistan qalasynda Dúnıejúzi qazaqtarynyń II quryltaıy ashyldy. Saltanatty jıynda Qazaqstan Respýblıkasynyń Prezıdenti, Dúnıejúzi qazaqtary qaýymdastyǵynyń Tóraǵasy Nursultan Nazarbaev bar qazaqtyń Otany bolyp tabylatyn Qazaqstannyń búgini men erteńi, onyń shetelderdegi qandastarymyzben baılanysy týraly baıandap berdi.
*27 qarashada Prezıdent Nursultan Nazarbaevtyń Nıderland Koroldigine resmı sapary boldy. Qazaqstan Prezıdenti Koroleva Beatrıks jáne Premer-mınıstr Iа.Petermen kezdesti. Sapar barysynda Elbasy Nıderland bıznesmenderin Qazaqstan naryǵyna qatysýǵa shaqyrdy.
*29 qarashada Brıýsselde Prezıdent Nursultan Nazarbaev Eýropalyq komıssııanyń tóraǵasy Romano Prodımen jáne Eýropalyq odaq keńesiniń bas hatshysy Haver Solanamen kezdesýleri boldy.
*18 jeltoqsanda Qazaqstan Prezıdenti Nursultan Nazarbaev Máskeýge keldi. Erteńine Elbasy Korolev qalasynda bolyp, Ushýdy basqarý ortalyǵynyń jumysymen tanysty. Osy kúni Nursultan Nazarbaev Reseı Prezıdenti Vladımır Pýtınmen kezdesti. Prezıdentter ekijaqty yntymaqtastyqty qandaı baǵytta damytqan jón degen saýal tóńireginde áńgimelesti.
*23 jeltoqsanda Prezıdent Nursultan Nazarbaevtyń Qytaı Halyq Respýblıkasyna memlekettik sapary boldy. Kelissózder nátıjesinde Nursultan Nazarbaev pen Szıan Szemın birqatar ekijaqty qujattarǵa qol qoıdy, onyń ishinde Qytaı men Qazaqstan arasyndaǵy dostyq, tatý kórshilik jáne yntymaqtastyq týraly shart bar.
*27 jeltoqsanda Astanada Ortalyq Azııa yntymaqtastyǵy uıymyna qatysýshy memleketter basshylarynyń tórtinshi sammıti boldy. Jıynda Elbasy Nursultan Nazarbaev uıym aıasyndaǵy jumystarǵa taldaý jasaı kelip, aımaq memleketteriniń yntymaqtastyǵyn tutastaı alǵanda oń baǵalady.
