О́zara yqpaldastyqqa óris keń

Jaqynda óńirler arasyndaǵy kásibı biliktilik pen tájirıbe almasý maqsatynda Jambyl oblysynyń ákimi Kárim Kókirekbaev bastaǵan delegasııa Shyǵys Qazaqstan oblysyna baryp qaıtty. Sapar barysynda jambyldyqtar aldymen «Vostok-moloko» JShS-niń О́skemendegi sút zaýyty jumysymen tanysty. Munda táýligine 40 tonna sút óńdeledi eken. «Suranys kóbeıip jatsa, sút mólsherin 200 tonnaǵa deıin kóterip, qajet emes jaǵdaıda 10 tonnaǵa deıin túsire alamyz. Odan zaýyttyń shyǵyny artpaıdy» deıdi kásiporyn dırektory Seıiljan Saılaýbaev. Shyǵys Qazaqstan oblysynyń ákimi Danıal Ahmetovtiń aıtýyna qaraǵanda, «Vostok-moloko» JShS elimizde alǵash ret sút óndirisine robottandyrylǵan júıe engizgen kásiporyn. Endi tabıǵı ónimderin Qytaı naryǵyna shyǵarmaq. Árıne, «Kelgenshe qonaq uıala­dy, kelgen soń úı ıesi uıalady» de­gen, áýlıeatalyq kásipkerler ol jaqtaǵy jurttan uıat bolma­syn dep bir kerýen jetektep barýdy jón sanapty. Bıyl Jambyl oblysynyń qambasy toq. Bul kúni О́skemendegi «Fresh Naýket» logıstıkalyq ortalyǵynda aýyl­sharýashylyq jármeńkesi ótki­zilip, áýlıeatalyq taýar óndi­rýshileri jaımaǵa jalpy quny 95,7 mln teńgeni quraıtyn 154,3 tonnadan astam aýyl sharýashylyǵy taýarlaryn qoıdy. Onyń ishinde 20 tonna et, 1,4 tonna taýyq eti, 5 tonna shujyq, 16,2 tonna sút ónimderi, 5 myń dana jumyrtqa, 1,5 tonna kondıterlik jáne 6 tonna makaron ónimderi, 5 tonna qant, 0,5 tonna tuz, 5 tonna balyq, 1,2 tonna bal jáne 87,5 tonna jemis-jıdek pen kókónis ónimderi bar. Eń bastysy, bul jármeńkedegi taýar baǵalary naryq baǵasynan 5-20 paıyzǵa tómen boldy. «Merkide irimshik shyǵaratyn zaýyt bar. Sondyqtan sút ónim­derin kóptep jetkizdik. Bir ǵana Merki aýdanynan 15 kásipker óz ónimderin apardy. Halyqtyń jemis-jıdekke degen suranysy keremet boldy. Ásirese, ettiń saýdasy qyzdy», deıdi bul jóninde Merki aýdany ákiminiń orynbasary Baqythan Ábjapparov. Búginde Shyǵysta Jambyl oblysynyń 97 túlegi «Serpin» baǵdarlamasy boıynsha bilim alýda. Eki oblystyń ákimderi osy stýdenttermen kezdesip, hal­-­ jaǵdaılaryn surady. Arman qýyp, bilim jolyna túsken jam­­byldyq jastar qamqorshy aǵa­la­ryna alǵystaryn jaýdyryp, Shyǵys jerinde eńbek jolyn bas­taýǵa daıyn ekendikterin jet­­kizdi. Taǵy bir aıtary, bul kúni Ońtústik jaqtan kelgen stýdent­ter jármeńkege baryp, týǵan jerdiń dáminen aýyz tıip, arzan azyq-túlikti mol etip arqalap qaıtty. Glýbokoe aýdanynyń Sol­nech­­noe kentinde ornalasqan «Maı­­ly daqyldar tájirıbe sha­rýa­­­shylyǵy» JShS – maıly daqyldardyń tuqymyn irik­­tep, asyldandyrýmen shu­ǵyl­­­danatyn elimizdegi sanaý­ly kásiporyndardyń biri. Al «Bobrovka+» JShS-niń robot­tandyrylǵan sút óńdeý fermasynda qazirgi kezde 800-den astam iri qara maly bar eken. Barlyq jumys, ıaǵnı mal azyǵyn berý, saýý, sıyrlardyń jaǵdaı­yn baqylaý tolyǵymen avtomatty túrde júrgiziledi. Kásiporynda búginde 70 adam eńbek etýde. Kárim Kókirekbaev osy kásip­oryn­darǵa arnaıy mamandar jiberip, tájirıbe almasý jóninde usy­nys aıtty. – Bul kezdesý eki jaqqa da tıimdi bolady dep oılaımyn, – deıdi Jambyl oblysynyń ákimi Kárim Kókirekbaev. – Bizdiń óńir agrarlyq ólke sanalatyndyq­tan, bıyl aýylsharýashylyq sala­­synda mol ónim jınadyq. Sondaı-aq, elimizdegi hımııa salasynyń 30 paıyzy Áýlıeata óńiriniń úlesinde. Jambyl oblysynan mıneraldy tyńaıtqysh­tar, qurylysqa qajetti qospalar, un-makaron ónimderin tasymaldaý­ǵa ázirmiz. Kezdesý sońynda Shyǵys Qa­zaq­­stan oblysy men Jambyl oblystarynyń yqpaldastyǵy jónindegi memo­randýmǵa qol qoıyldy. Oralhan DÁÝIT, «Egemen Qazaqstan» Jambyl oblysy Sýretti túsirgen Aqádil RYSMAHAN