«Jaltarma jaýapqa qanaǵattanbaımyz»

Májilistegi «Aq jol» depýtattyq frak­sııasynyń múshesi Merýert Qazbekova bas­tap, fraksııanyń basqa músheleri qostaǵan hat Ulttyq banktiń tóraǵasy Danııar Aqyshevtyń atyna joldandy. Onda bylaı delingen: «Biz ústimizdegi jyldyń 29 shilde jáne 7 qyrkúıek kúnderinde sizdiń atyńyzǵa sheteldik valıýtamen qaryz alǵan adal boryshkerlerdiń múddesin qorǵaý úshin «Ipotekalyq zaımdardy qaıta qarjylandyrý» baǵdarlamasyn jetildirý týraly usynys jasaǵan saýaldar joldaǵan edik. О́ıtkeni, baǵdarlamanyń sharty alǵan nesıelerin durys ótemeı júrgen boryshkerlerge jeńildik jasap, olardyń qaryzyn sheteldik valıýtanyń byltyrǵydan burynǵy kýrsymen qaıta eseptegenin, al qaryzyn ýaqtyly ótep júrgen adal boryshkerler úshin valıýtanyń qazirgi kýrsyn qoldanyp qaıta eseptelgenin, sonyń nátıjesinde olardyń qaryzy 70-80 paıyzǵa kóbeıip ketkenin jazdyq. Bizdińshe, baǵdarlamanyń sharty adal boryshkerlerdi qoldaýdyń ornyna ony tólegisi kelmeıtinderdi yntalandyrady. Ol-ol ma, bul Konstıtýsııadaǵy azamattar teńdiginiń normasyn buzady. Osyǵan baılanysty biz jaǵdaıdy túzetý sharalaryn qarastyrýdy suraǵan edik. Eki saýalymyzǵa da biz Ulttyq bank tóraǵasynyń orynbasary O.Smolıakov qol qoıǵan jaltarma jaýap formasyndaǵy jaýaptar aldyq. Onda bizdiń suraqtarymyzǵa jaýap berýdiń ornyna Baǵdarlamanyń jalpy somasynyń sandary, qatysatyn bankterdiń tizimi, baǵdarlamanyń sharttary jáne t.b. ǵana kórsetilgen. Osyǵan baılanysty «Aq jol» depýtattyq partııasynyń músheleri sizge tómendegilerdi habarlaıdy:

1. Mundaı jaltarma jaýapty bizdiń kó­ter­gen máselemizge jaýap dep sanamaımyz;
2. Bizdiń saýaldarymyzdy qaraýdy úshinshi ret talap etip, oǵan negizdelgen jaýap berýińizdi ta­lap etemiz;
3. Ulttyq banktiń atynan jaltarma jaýap­ty daıyndaǵan qyzmetkerlerińizdi jaýap­kershilikke tartýyńyzdy ótinemiz.