Máýlit múbárak bolsyn!

Almatydaǵy Balýan Sho­laq atyndaǵy sport sara­ıyn­da Qazaqstan musyl­man­dary dinı basqarma­sy­nyń uıymdas­tyrýymen Máý­lit merekesi atalyp ótildi. Onda Alla­ ta­ǵa­la­ny ulyq­tap, barsha musyl­man qaýymy ardaq tutar Muhammed Paıǵambarymyzǵa (s.ǵ.s) salaýat, madaq jyr­lar men ánder aıtylyp, onyń ónegeli ómiri barynsha na­sı­hat­taldy. Byltyrǵy jyly Respýblıka saraıynda ótken Máýlitke kelgen jamaǵat aýzy-murnynan shy­ǵyp, syımaǵan bolatyn. Sony eskergen bolýy kerek, dinı bas­qarma bıyl 5 myń adamǵa arnal­ǵan Sport keshenin tańdapty. Biraq, bul joly da saraıda ıne shanshar oryn bolmady. Sodan birqatar aǵaıyn tórt saǵatqa jýyq tapjylmaı turyp Máýlit tyńdady. Bul degenimiz – Qazaq­standa Máýlit merekesi jyl ótken saıyn búkilhalyqtyq sıpat alyp kele jatqanyn aıǵaq­tasa kerek. Eń bastysy, Máýlit­ti atap ótýde uıymdastyrylǵan is-sharalar mazmun jaǵynan ba­ıyp, ıslamnyń asyl qundyl­yq­taryn nasıhattaýda túrli taqy­ryptar qamtylyp, halyqtyń ynta-yqylasyn arttyrýda. – Qazir álemde 6 mıllıard halyq bar, – dedi quran oqylǵan soń muqym halyqtyń, Otannyń qa­mynda júrgen azamattardyń aman­dyǵyn tilep, bata jasaǵan Qa­zaqstan musylmandary dinı bas­qarmasynyń tóraǵasy, Bas múf­tı, sheıh Ábsattar qajy Der­bisáli. – Onyń 2 mıllıardy musylman bolsa, búginde olar osy Máýlit aıyn toılaýda. Máý­lit arab tilinde «týylǵan kún» degen maǵyna beredi. Bul Alla ta­ǵalanyń eń sú­ıikti pendesi, Adam atadan bastal­ǵan paıǵam­barlarymyzdyń soń­ǵy­sy, ári sar­dary hazireti Muham­med­tiń dú­nıege kelgen kúnine ataý etip qoıylǵan sóz. Odan ári Ábsattar qajy bıyl Qazaqstan Islam konferensııasy uıymyna tóraǵalyq etetinin aıta kelip, bul eleýli oqıǵaǵa qatysty da óz oıyn ortaǵa saldy. Osynyń barlyǵy yntymaqtyń, birliktiń arqasynda ekenin, «birligi bar el ozatynyn, birligi joq el toza­ty­nyn» eske saldy. Sodan keıin Máý­lit jyry oqylyp, Paıǵam­bary­myzǵa qarııalar salaýat aıt­ty. Bıylǵy merekeniń jańalyǵy, bes myń adam­ǵa Dinı basqarma men Islam má­de­nıeti jáne bilimin qoldaý qory­men birlesip shyǵarǵan birneshe kitaptardy syıǵa tartýy boldy. Salaýat aıtylǵan soń mem­­leket jáne qoǵam qaıratkeri, akademık Sul­tan Sartaev halyq­qa bata berdi. Jalpy Máýlit merekesi alǵash ret 909 jyly Mysyrda basta­lyp, 1207 jyldan resmı túrde atap ótilgen. Al XVI-XVII ǵa­syrlarda Osman ımperııasy­nyń resmı meıramy bolyp bekitilgen. Qa­zaq­standa bul mereke 2000 jyl­dan belsendi ótkizile basta­dy. Bıyl­ǵy Paıǵambardyń dú­nıe­­ge kelgen kúni 14 aqpan men 14 naý­ryz ara­lyǵynda elimiz bo­ıynsha úlken­di-kishili eldi-meken, qala, aýdan, oblys orta­lyq­tarynda atalyp, me­rekelený ús­tinde. Mereke barysynda Paıǵam­bary­myz týraly túsirilgen beınefılm usynylyp, keshtiń ón boıy madaq án-jyrmen kómkeri­lip otyr­­d­y. Ásirese, Jáken Oma­rov­tyń «Hıkmetýlla», «Zi­ki­­rýl­lasy­na» jurtshylyq erekshe yqy­­las tanytty. «Seriler», «Meloman», «Roıal» tobynyń ónerli jigitteri de ánderimen súı­ispenshi­l­ikterin bil­dirse, «Sát» trıosy­nyń oryn­daýyn­daǵy «Mi­nájat», «Kónemiz ǵoı» ánderi de tyńdar­manyn táýbe etýge sha­qyrǵandaı edi. Bıylǵy Máýlittiń taǵy bir ja­ńalyǵy – tanymal aqyn­dar Balǵynbek Imashev pen Jandarbek Bulǵaqovtyń din ta­qy­rybyndaǵy aıtysyn jurt­shy­lyqtyń jyly qabyldaýy. So­ny­men birge kókshetaýlyq aı­tys aqy­ny Arman Berdalın, Qur­man­ǵazy atyndaǵy Ulttyq konservatorııa stýdenti Ermek Esqojaev madaq jyrlaryn ar­nady. Paıǵambarymyzdyń hadısiniń birinde: «Kim maǵan bir ret salaýat aıtsa, Alla taǵala oǵan on ret rahmet joldaıdy, onyń on kúnási keshirilip, on dárejesi kóteriledi» degen. Endeshe, ár musylman júregindegi uly Alla men ardaqty Paıǵambarymyzǵa degen súıispenshiliktiń saǵynysh seziminiń orny ózge eshteńemen tolyqpasy haq. Gúlzeınep SÁDIRQYZY.