Oqytyp júrip, ózi de úırenedi

Gúlbaný Sarmýrzına mektep bitirip, úlken ómirge qadam basqan shaq – elimiz táýelsizdik alǵanyna nebary úsh-aq jyl bolǵan eleń-alań kez edi. Daǵdarystyń demi úskirik, bet qaratpaı soqqan kezde muǵalim, mádenıet qyzmetkeri syndy áleýmettik sala ókilderi ken oryndary men saýda salasyna jappaı bet burdy. Mektepterde muǵalimder jetispeı, tipti atalmysh mamandyqqa barýdy qolaı kórmeıtin túsinik paıda boldy. Al Shetpe kentindegi mektepti úzdik attestatpen bitirgen Gúlbaný Ońal­baıqyzy bolsa, ózge qurbylary se­­kil­di mamandyq tańdap, onyń bo­la­­shaǵyn oılap bas qatyrǵan joq, bir­­den «Muǵalim bolǵym keledi, ol – meniń bala kezden bergi armanym» dep qu­jattaryn Aqtaýdaǵy muǵalim­der daıar­laıtyn oqý ornyna tapsyr­dy. Ke­leshegine zor senimmen qaraý­ǵa bola­tyn, jalaqysy joǵary ju­mys oryndaryna daıyndaıtyn oqý meke­­melerine túsýge keńes ber­gen­­der de boldy jáne mundaı irge­li oqý oryn­daryna oqytýǵa otba­sy­­lyq jaǵ­daıy da sáıkes keletin. Bi­raq, qar­sh­adaı G.Sarmýrzına óziniń jan qa­­laýyn ustandy, óziniń ishki únin bas­­shy­­lyqqa aldy. Aldymen Mań­ǵys­­taý pedagogıkalyq kolledjinde, ke­­ıin­­nen Sh.Esenov atyndaǵy Aqtaý mem­­l­e­kettik ýnıversıtetinde bilim aldy. Búginge deıingi 20 jyldyq eńbek ótiliniń 11 jylyn Aqtaý qalasyn­daǵy №13 gımnazııa kommýnaldyq memlekettik mekemesinde bastaýysh synyp pániniń muǵalimi bolyp keledi. Izdenimpaz, oqýshylarmen qoıan-qoltyq jumys jasaıtyn jáne óz isine berilgen maman áriptesterine syıly. Birneshe jyl qatarynan mektep dırektorynyń jalpy bilim berý isi jónindegi orynbasary qyz­metin atqarǵan ol qazir bastaýysh synyp oqýshylaryna tereń bilim berý úshin berile eńbek etýde. – Ybyraı Altynsarınniń támsi­line súıensek, «aǵashtyń túzý ósýi – shybyqtyń durys bap­talýy­nan» ǵoı. Men – bastaýysh synyptyń, ári tarıh pániniń muǵalimimin. Biraq, shy­­byq­taı bolǵan balalarymyzdy basy­nan bastap tárbıeleý úshin bas­­taýysh synypty tańdadym, – deıdi ol. Negizi ustaz eńbegin túrli anyq­ta­­ma­larmen baǵalap, túrli ól­shem­­dermen ólsheýdiń qajeti joq. Búgingi tilmen aıtsaq, ustaz reıtın­gi shákirtteri arqyly kóri­ne­di, ıaǵnı shákirtter – ustaz eńbe­gi­niń aınasy. Únemi izdenip, bilim berý salasyndaǵy sońǵy tehnologııalar men ádisterdi meńgerip, túrli semı­nar, kýrstarǵa qatysyp, óz betin­she bilimin jetildirip júretin shy­ǵar­mashyl ustaz G.Sar­mýrzınanyń shákirtteri de qatysqan saıystardan júldesiz oralmaıtyny tańǵalarlyq. Qalalyq, oblystyq, respýblıkalyq deńgeılerde birneshe Alǵys hattarmen, Qurmet gramotalarymen marapattalyp, bilim salasyna, bastaýysh oqýshylaryna sapaly bilim, sanaly tárbıe berý baǵytyndaǵy ózi kórgen-bilgenderi men túıgenderin, is-tájirbıesin oblystyq, respýblıkalyq basylym betterinde bólisip otyratyn joǵary sanatty muǵalim G.Sarmýrzına «Oqytyp júrip ózimiz de úırenemiz» qaǵıdasyn ómirlik ustanym etken. Otbasynda ul men qyz tárbıe­lep otyrǵan ana, asyl jar, úlken­derge izetti kelin bola alǵan ol ekinshi otbasy sanalatyn jumys ornynda da úlken-kishimen til tabysyp, qyzmetin adal da aıanbaı oryndaýymen erekshelenedi. Muǵalim mártebesi tómendep, bul ma­man­dyqqa mensinbeı qaraý be­leń al­ǵan tusta uly maman­dyq­tyń ýyǵyn berik ustap qalǵan jáne sha­ńy­­ra­ǵyn shaıqaltpaı maman­dyǵy­na shyn berilgen Gúlbaný Ońalbaı­qyzy­­nyń eńbegine, taban­dylyǵyna súısine­siń. Gúlaıym ShYNTEMIRQYZY, «Egemene Qazaqstan» Mańǵystaý oblysy