Máńgilik Eldiń mereıin jastar ústem etedi

Qostanaıda «Meniń elim – Máńgilik El!» respýblıkalyq aksııa­sy aıasynda oblystyq patrıottar forýmy ótti. Oǵan jastarmen qatar aǵa urpaq ókilderi qatysty. Elimiz Táýelsizdiginiń 25 jyldyq toıyna deıingi 25 juldyzdy kúnniń bastalýy qostanaılyq jas patrıottar forýmy ótken kúnge tuspa-tus keldi. Bul mereke el tarıhyndaǵy iri oqıǵa. Sonymen qatar, Elba­sy Nur­sultan Nazarbaevtyń basshylyǵymen 25 jylda elimizde buryn-sońdy bol­maǵan jetistikterge qol jetti, tarıh damýynyń ólshemimen qaraǵanda, osynsha az ýaqytta Qazaqstan degen eldi álem tanyp úlgerdi. Máńgilik El ıdeıasy da Táýelsizdik tuǵyryn bekite túsýdi meńzeıdi. Oblystan oblysqa berilip kele jatqan «Máńgilik el jastarynyń jetistikteri kitabynda» Táýelsizdik jyldary jastar atqarǵan ister, olar­dyń elimiz damýyna úlesi aıqyn kórinis tabady. Osy forýmda ob­lys ákimi Arhımed Muhambetov fo­rým­ǵa jınalǵandardy aldymyzda kele jatqan ulyq mereke – el Táýel­sizdigimen quttyqtady. – Jetisýdan bastalǵan estafeta Qostanaıǵa da kelip jetti. Táýelsizdik jyldary oblys jastarynyń qandaı jetistikke jetkeni kitapqa toltyrylady. Bizdiń óńirde tamasha dástúr qalyptasqan edi. «Qostanaı oblysy jastarynyń Altyn kitabyna» osy kúnge deıin ómirdiń ár salasynda jetistikke jetken oblystaǵy 72 jastyń esimi altyn árippen jazylǵan. Olardyń óndiriste, bızneste, óner men sportta, áleýmettik salada juldyzy jarqyrady. Elge qyzmet etýdiń úlgisine aınaldy. Sonymen qatar, Táýelsizdik jyldary memleket tarapynan jastarǵa jasalǵan qamqorlyq ta az bolǵan joq. «Bo­lashaq», «Jumyspen qamtý­dyń jol kartasy-2020», «Dıplom­men – aýylǵa!» sııaqty kóptegen baǵ­dar­lamalar arqyly jastar óz múm­kin­dikterin keńeıte tústi. Bola­shaqta olar jetken tabystar arqasynda Qazaqstan moıyny ozyq 30 eldiń qatarynan oryn alatyn bolady, – de­di Arhımed Begejanuly. Qazaq­stan Táý­elsizdiginiń 25 jyldyǵy ta­qy­­ry­­byna arnalǵan vıdeorolıkter ob­­­lys­­tyq baıqaýynyń jeńimpaz­da­ry­na oblys ákimi júldeler tabys etti. Forýmda ardager Kenjebek Úkın, Qazaqstan halqy Assambleıasy jastar qanatynyń kóshbasshysy Maksım Spotkaı forýmǵa qatysýshylardy quttyqtady. Kenjebek Úkiuly Táýelsizdiktiń arqasynda jańa elge aınalǵanymyzdy, kók Týymyzdyń BUU tórinde jelbirep turǵanyn tilge tıek etti. Jalpy, elimiz Táýel­sizdiginiń qolǵa qonýyna jastardyń úlesi az emes ekenin de aıtyp ótti. –  Kúltegin babamyz VIII ǵasyrda Máńgilik el ósıetin tasqa qashap jazyp ketken edi, ony Elbasymyzdyń bastaýymen búgingi urpaq qurdy. Jastar Máńgilik Eldi alǵa aparady. Máńgilik el bolý úshin aldymen búgingi urpaq Otandy, jerdi, eldi, dástúr men tildi súıýi kerek, – dedi Kenjebek Úkiuly. Táýelsizdik jyly týǵan ulandar qazir 25 jasqa toldy, olar bilim alyp, bir-bir mamandyq ıesi atanyp, elge qyzmet etip júr. Sahnaǵa Táýelsizdiktiń qostanaılyq qurdastary shaqyryldy. Solardyń biri «Qostanaı oblysy jastarynyń Altyn kitabynyń» laýreaty Oljas Dúısekov forýmǵa qatysýshy jastardyń Elbasyna úndeýin oqydy. Qostanaı jastarynyń Táýelsizdik jyldary jetken jetistikteri baıan etilgen mereıtoılyq kitap Pavlodar oblystyq «Qoǵamdyq kelisim» memlekettik mekemesi basshysynyń orynbasary Jaqııa Qaıratqa saltanatty túrde tabys etildi. Názıra JÁRIMBETOVA, «Egemen Qazaqstan» QOSTANAI