500 oqýshy fleshmob jasady

Aıtýly shara «Juldyzdy 25 kún» aksııasy aıasynda uıymdastyrylyp, El Táýelsizdiginiń shırek ǵasyrlyq mereı­toıyna arnaldy. Saltanatty túrde memlekettik Ánuran oryndalǵannan keıin aımaq basshysy Erik Sultanov jınalǵandarǵa quttyqtaý sóz arnady. Qazaqstandyqtar úshin ulyq mereke sanalatyn Táýelsizdigimizdiń 25 jyldyǵy jalpyhalyqtyq deńgeıde atap ótilýde. Osy kezeń ishinde Elbasynyń bastaýymen elimiz turaqty damý jolymen keledi. Kóptegen bıik belesterdi baǵyndyrdyq, deı kelip, Erik Hamzauly «Uly Dala eli–Táýelsizdiktiń 25 negizi» atty «Juldyzdy 25 kún» aksııasy aıasynda taǵylymy mol patrıottyq sharalar bastaý alǵanyn jetkizdi. Oblystyń qurmetti azamaty Nellı Iva­nova, Qyzyljar aýdanyndaǵy «Jas­tar bastamalary» ortalyǵynyń dı­rek­tory Dýman Zikirın, Nazarbaev zııatker­lik mektebiniń dırektory Nurǵalı El­shi­bekov óz sózderine Táýelsizdiktiń jarqyn tabystaryn, elimizdiń erteńi – jastar­dyń oqýyna, bilim alýyna, jumys isteýi­ne barlyq jaǵdaılar jasalǵanyn, bas­ty qundylyǵymyz Táýelsizdiktiń qa­dir-qasıetin jete uǵyný, kózdiń qarashy­ǵyn­daı qorǵaý basty mindet ekenin arqaý etti. Shara barysynda jastar qaýymyna «Táýelsizdik qurdastarynyń tilekteri» atty kitap tabys etildi. Bul kitap 25 jeltoqsanǵa deıin barlyq aýdandardy aralap, oblystyq murajaıǵa jetkiziletin bolady. Aksııa sonymen qatar, merekelik jıyndarǵa, kezdesýlerge, mádenı-sporttyq oıyndarǵa jalǵasatyn bolady. Egemendik alǵannan bergi kezeńde jetken jetistikter, ulttar men ulystar arasyndaǵy berik dostyq, birlik keńinen nasıhattalady. О́mir ESQALI, «Egemen Qazaqstan» Soltústik Qazaqstan oblysy