Biraýyzdan qoldaýǵa shaqyrdy

«Nur Otan» HDP Tóraǵasynyń birinshi orynbasary, Qazaqstan Respýblıkasy prezıdenttigine kandıdat Nursultan Nazarbaevtyń respýblıkalyq qoǵamdyq shtabynyń jetekshisi Nurlan Nyǵma­týlın bastaǵan saılaýaldy úgit-nasıhat tobynyń músheleri 11 naýryzda Qyzyljar óńirine atbasyn tiredi. Onyń quramynda elimizge belgili qoǵam jáne saıası qaıratkerler, Parlament Senaty men Májilisiniń depýtattary, «Qazaqstan-2020» jalpyulttyq demo­kratııalyq kúshter koalısııasynyń ókilderi boldy. Pogodın atyndaǵy orys drama teatrynda ótken kezdesýge oblys jurtshylyǵy, ardagerler, jastar, úkimettik emes uıym jetekshileri, kásipodaq belsendileri qatysty. Jıyndy «Nur Otan» HDP ob­lys­tyq fılıaly tóraǵa­synyń birinshi orynbasary Áli­bek Qartov ashyp, birinshi sózdi N.Nyǵ­ma­tý­lın­ge berdi. Nurlan Zaı­rollauly óz sózinde elimizdiń Táýelsizdik al­ǵan­nan bergi 20 jyl ishinde qol jetken tabys­taryn atap kórsetti. Oblys halqyn saı­laýǵa belsene qatysýǵa, N.Na­zar­baevtyń kandı­da­týrasyn bir­aýyz­­dan qoldaýǵa shaqyrdy. Zalǵa jınalǵandar «Ádilet» de­mokratııalyq partııasynyń tór­aǵasy Maqsut Nárikbaevtyń sózin de uıyp tyńdady. Ol óz sózinde aldymyzda úlken tarıhı tańdaý tur. Memleketimizdiń, halqymyz­dyń bolashaǵyn aıqyndaıtyn ke­zeń. Olaı bolsa, tańdaýda qateles­peıik, dedi. «Aýyl» sosıal-demo­kra­tııalyq partııasynyń jetekshisi Ǵanı Qalıevtyń zalǵa qarata aıt­qan tolǵamdary da jalyndy shyq­ty. Ol «men Qyzyljardyń qasıet­ti topyraǵyn talaı ret bastym. Bul óńirdiń halqy shetinen eńbek­qor. Eginshilik salasyndaǵy tola­ǵaı tabystarynyń ózi nege turady? Bıylǵy prezıdenttik saılaýda da úlken uıymshyldyq tanytyp, birlik, yntymaq, dostyq úshin daýys beredi degen senimdemin, dese, senator Qýanysh Sultanov ta áńgimeni tereńnen órbitti. Jıynda «Qazaqstan azamat­tyq alıansynyń» tóraıymy, Par­­l­ament Májilisiniń depýtaty Aı­gúl Soloveva, Qazaqstannyń Eń­bek Eri Gennadıı Zenchenko, Parlament Senatynyń depýtaty Anatolıı Bashmakov sóılep, bir kisideı daýys berýge jumyl­dyrdy. Tústen keıin koalısııa mú­she­leri úsh topqa bólinip, ob­lys, aýdan turǵyndarymen júz­desýler ótkizdi. Júk vagondaryn shyǵarý­men aına­ly­satyn «ZIKSTO» zaýy­tynyń ujymy koalısııa múshe­le­rin qushaq jaıa qarsy alyp, saı­laýdy úlken saıası belsendilikpen ótkizetin­de­rin aıtty. «Zenchenko jáne K» komandıttik seriktes­tigi­niń jumys­shy-qyzmetkerleri qo­ǵam­dyq saı­laýaldy úgit-nasıhat top múshe­leri­ne atqarylyp jat­qan ıgilikti ister jaıly baıandap berdi. Tań­daý­dan qatelespeı­tin­derine sendirdi. Petropavl qala­lyq mádenıet úıin­de ótken kezdesý de áserli boldy. О́mir ESQALI, Soltústik Qazaqstan oblysy.